YouVersion Logo
Search Icon

Lukas 16

16
Prumpamaan tentang tu orang yang nyanda jujur ja urus tu orang kaya pe kepunyaan
1Abis itu Yesus cirita lei satu prumpamaan pa De pe murit-murit, “Ada tu satu orang kaya, dia ada satu orang yang ja baurus tu samua de pe kepunyaan. Trus ada yang da balapor pa dia kalu tu de pe orang itu ja pake tu de pe kepunyaan for se foya-foya. 2So itu dia pangge tu de pe orang itu kong babilang, ‘Kita dengar-dengar ngana ja pake tu kita pe kepunyaan for foya-foya. Skarang ngana kase pa kita laporan lengkap tentang tu kita pe kepunyaan yang ngana ja urus. Soalnya ngana so nimbole lei mo urus tu kita pe kepunyaan.’
3Tu orang yang ja baurus tu orang kaya itu pe kepunyaan itu babilang dalam hati, ‘Kita pe bos so pecat pa kita dari kita pe karja ini. Apa kang tu kita musti beking skarang? Kalu mo bapacol, kita nyanda kuat. Kalu mo baminta-minta, kita malo. 4Oh, kita tau apa tu kita mo beking supaya kalu nanti kita so nyanda karja, ada orang tu mo trima pa kita pa dia pe ruma.’
5Kong dia pangge satu-satu tu orang-orang yang da bautang pe de pe bos. Kong dia bilang pa tu orang yang pertama, ‘Brapa ngana pe utang pa kita pe bos?’
6Tu orang itu manyao, ‘Kita ada utang minya zaitun sratus tampayang.’
Kong dia bilang pa tu orang yang bautang itu, ‘Napa ngana pe surat utang. Ngana dudu di situ kong capat jo tulis lima pulu tampayang.’
7Abis itu, dia bilang lei pa tu orang kadua yang da bautang, ‘Brapa ngana pe utang pa kita pe bos?’
Tu orang itu manyao, ‘Sribu karong gandum.’
Kong dia bilang pa tu orang yang da bautang itu, ‘Napa ngana pe surat utang. Kong skarang tulis jo dlapan ratus karong.’
8Waktu tu orang kaya itu dengar tu de pe orang yang nyanda jujur itu da beking, dia puji pa tu de pe orang itu lantaran tu orang itu jago cari akal for de pe bae sandiri. Memang orang-orang yang iko dunia pe mau lebe jago cari akal for dorang pe bae di dunia ini daripada tu orang-orang yang hidop dalam trang Tuhan. 9Kita bilang pa ngoni, pake jo tu kekayaan dunia ini for tolong orang supaya bole dapa banya tamang. Jadi kalu tu kekayaan di dunia so abis, nanti ngoni mo dapa trima di tampa yang ngoni mo tinggal akang for slama-lamanya.
10Sapa yang bole mo se percaya akang tu hal-hal kacili, dia lei bole mo se percaya akang tu hal-hal basar. Kong sapa yang nimbole mo se percaya akang tu hal-hal kacili, dia lei nyanda mo se percaya akang tu hal-hal basar. 11Jadi, kalu ngoni nimbole mo se percaya akang tu kekayaan dari dunia ini, nyanda ada tu mo se percaya akang pa ngoni tu hal-hal yang dari sorga. 12Kalu ngoni nimbole se percaya akang orang laeng pe kekayaan, sapa lei tu mo kase sesuatu pa ngoni for jadi ngoni punya? Nyanda ada to?
13 # Mat. 6:24 Satu orang karja nimbole mo bakarja pa dua bos. Soalnya kalu dia ada dua bos, dia pasti mo binci tu bos yang satu kong sayang tu bos yang laeng, dia lei mo setia pa tu bos yang satu kong nyanda farduli deng tu bos laeng. Bagitu lei deng ngoni, nyanda mungkin ngoni mo layani pa Tuhan Allah kalu ngoni lei masi ja pikir-pikir tu kekayaan dunia.”
Yesus togor pa orang-orang dari golongan Farisi
(Mat. 11:12-13, 5:31-32; Mrk. 10:11-12)
14Waktu itu, tu orang-orang dari golongan Farisi yang gila doi itu, dorang da dengar samua tu Yesus da bilang, kong dorang tatawa akang pa Dia. 15Kong Yesus bilang pa dorang, “Ngoni se lia pa orang-orang kalu ngoni pe diri itu butul, mar Tuhan Allah tau ngoni pe isi hati. Soalnya apa yang orang anggap paling bagus, itu yang Tuhan Allah paling binci.
16 # Mat. 11:12-13 Tu atoran-atoran yang ada di kitab Taurat deng yang da tatulis di kitab-kitab nabi-nabi, samua itu torang orang Yahudi ja iko akang, kong torang ja iko itu sampe Yohanes Pembaptis datang. Trus mulai dari situ, tu Kabar Bae tentang Tuhan Allah Berkuasa sbagai Raja ja se tau pa orang-orang, kong dorang brusaha kras for jadi orang-orang dari Tuhan Allah yang Berkuasa sbagai Raja. 17#Mat. 5:18Samua atoran di kitab Taurat deng samua yang da tatulis di kitab nabi-nabi nyanda mo ilang biar lei cuma satu huruf, samua itu pasti mo jadi. Lebe gampang kalu tu langit deng tu bumi ilang daripada samua yang da tatulis itu nyanda mo jadi.
18 # Mat. 5:32; 1Kor. 7:10-11 Kalu ada laki-laki yang kase cere de pe bini kong kaweng ulang deng parampuang laeng, dia itu so bersina. Kong kalu ada laki-laki yang kaweng deng tu parampuang yang de pe laki da se cere, tu laki-laki itu lei so bersina.”
Prumpamaan tentang orang kaya deng Lazarus yang miskin
19Yesus se cirita lei satu prumpamaan, “Ada tu satu orang kaya yang ja pake juba warna pars deng baju dari kaeng alus. Kong tiap hari dia hidop basnang-snang deng dia pe kekayaan. 20Kong ada lei satu orang miskin tu de pe nama Lazarus. Dia itu punung skali deng kado. Orang-orang bawa pa dia di muka pintu pa tu orang kaya itu pe ruma. 21Dia lapar kong suka mo makang tu makanan yang da ciri dari pa tu orang kaya itu pe meja. Kong lei katu tu anjing-anjing datang pa dia kong jilat-jilat tu de pe kado.
22Waktu tu orang miskin itu mati, tu malaekat-malaekat bawa pa dia di sabla pa Abraham. Kong tu orang kaya itu lei mati trus orang se kubur pa dia. 23Di tampa orang mati, tu orang kaya itu siksa skali. Kong dia bahaga ka atas, trus dari jao dia lia pa Abraham kong tu Lazarus ada pa Abraham pe sabla. 24Trus dia babilang deng kuat bagini, ‘Bapak Abraham, kasiang akang dang pa kita. Suru jo pa Lazarus supaya kase colo tu de pe ujung jare ka aer, trus dia se basa akang tu kita pe lida. Soalnya kwa kita so siksa skali di dalam api ini.’
25Mar Abraham cuma da manyao bagini, ‘Ngana inga bae-bae ne, dulu waktu ngana masi hidop, ngana so trima samua tu bagus. Mar kasiang tu Lazarus waktu dia hidop, dia cuma ja trima tu besae-besae. Kong skarang dia dapa hibur di sini, ngana dapa siksa. 26Kong lei di antara pa torang deng ngana, Tuhan da beking jurang yang pe basar deng pe dolong skali, supaya tu orang yang ada di sini nyanda dapa pigi ka sana, kong tu orang yang ada di sana nyanda dapa datang kamari.’
27Trus tu orang kaya itu bilang lei, ‘No kalu bagitu dang, kita minta tolong pa bapak supaya bapak suru akang pa Lazarus pigi pa kita pe papa pe ruma. 28Soalnya kita masi ada lima sudara laki-laki di sana. Suru jo dang pa Lazarus pi se inga akang pa dorang for bertobat, supaya nanti dorang lei nyanda maso di tampa pendritaan ini.’
29Mar Abraham manyao, ‘Pa dorang itu so ada kitab Taurat yang dari pa nabi Musa deng tu kitab-kitab dari nabi-nabi laeng. Jadi biar jo dorang iko apa tu da tulis di kitab-kitab itu.’
30Tu orang kaya itu manyao, ‘Ado, itu kasiang nyanda cukup bapak Abraham. Mar kalu ada satu orang yang so mati kong dia hidop ulang trus pigi pa dorang, dorang itu mo bertobat.’
31Mar Abraham bilang pa dia, ‘Kalu dorang nyanda mo iko tu nabi Musa deng nabi-nabi laeng da bilang, dorang lei pasti nyanda mo percaya, biar lei tu da babilang itu orang yang so mati kong hidop ulang.’ ”

Currently Selected:

Lukas 16: MDO

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy