Kisah Para Rasul Kata Pengantar
Kata Pengantar
Ni kitab Kisah Para Rasul ini yang da tulis dokter Lukas, dia itu lei yang da tulis tu kitab Injil Lukas. Kisah Para Rasul ini jadi sambungan for beking lengkap tu Injil Lukas (Kis. 1:1; Luk. 1:1-4). Di surat ini, Lukas se cirita tentang bagimana rasul-rasul tu Yesus pe utusan-utusan kase tau tu Kabar Bae tentang Yesus kamana-mana, deng bagimana tu Roh Kudus da bantu pa dorang beking itu. Dua rasul yang utama tu Lukas da tulis di sini tentang Petrus (pasal 1-12) deng Paulus (pasal 13-28). Lukas se cirita tentang bagimana tu jemaat yang pertama, dia cirita bagimana tu orang yang percaya da mulai dari orang Yahudi (Kis. 11:19), kong tasebar sampe pa tu orang yang bukang Yahudi (Kis. 13:45-46, 18:6, 28:28). Waktu tu orang-orang bukang Yahudi mulai percaya pa Yesus, muncul pertanyaan: apa orang yang percaya pa Yesus perlu iko tu atoran-atoran di kitab Taurat ato nyanda. Jadi di pasal 15 ada sidang basar, di situ samua pemimpin dari orang percaya pa Yesus bakumpul kong dorang ambe keputusan kalu orang yang bukang Yahudi tu so percaya pa Yesus, tu orang itu nyanda perlu iko lei tu atoran-atoran di kitab Taurat (pasal 15). Trus di kitab ini, hal yang paling banya Lukas se tau tentang tu Roh Kudus pe karja pa orang-orang percaya, kong bagimana Roh Kudus kuasai tu orang-orang percaya di Yerusalem mulai di hari Pentakosta. Seblum itu, Roh Kudus cuma kuasai orang-orang tertentu, mar waktu orang percaya pa Yesus Kristus, tu Roh Kudus kuasai pa dia. Samua tu kejadian yang da tatulis di sini, itu samua se tunjung deng jelas kalu tu Tuhan Allah pe Roh slalu ada sama-sama deng tu orang-orang yang so percaya pa Yesus sbagai Juruslamat.
Currently Selected:
Kisah Para Rasul Kata Pengantar: MDO
Highlight
Share
Copy
Want to have your highlights saved across all your devices? Sign up or sign in
Perjanjian Baru Bahasa Manado @ Lembaga Alkitab Indonesia 2017