Wahyu 8

Si Toyaang i Domba muka' in ségél kapitu

1An tutuw i Toyaang i Domba muka' in ségél kapitu, pakasa sé an sorga ra'io kalingaanai en suara eng kauréna wona' sténga jam. 2Wo sérénku sé pitu malaékat sé makatulung an dior i Amang Kasuruan, séra si esa wo si esa winéan esa terompét.

3 # Kel. 30:1, 3; Am. 9:1 Wo mai si esa malaékat walina, wo tumulung an dior im pawetaan i raragés. Sia makatimboi im patemburan in dupa si niéma' a mas owo. Sia winéan kumeli-keli kamenyan e iragés mewali-wali wo in somba-sombayang im pakasa é tou le'nas am bawo im pawetaan i raragés niéma' a mas owo si pakatulir an dior im palukutan pasiri-siriin itu. 4Wo ang kama i malaékat itu en tembur ing kamenyan wo in somba-sombayang é tou le'nas sumosor mewali-wali akar a si Amang Kasuruan. 5#Kel. 19:16; Im. 16:12; Yeh. 10:2; Why. 11:19, 16:18 Wo si malaékat itu mindo im patemburan in dupa itu, pumpunanna in api asi pawetaan i raragés owo. Wo iwangkilna em patemburan in dupa itu ang kayo'baan. Wo tuméngé mai en erut, parapiten ing kilat wo im pangéro'.

Sé epat malaékat sumengo in terompét

6Wo sé pitu malaékat sé makatimboi mekélé esa terompét itu tu'tulo en sumengo in terompét.

7 # Kel. 9:23-25; Yeh. 38:22 Wo si malaékat kataré sumengo in terompétna, wo mamualio mai en uran éis wo api kinemu in enda'. Wo pakasa in itu iténdél ang kayo'baan. Sangapetelu ing kayo'baan wo sangapetelu in tuu-tuura ing kayu wo pakasa en dukut makatunu-tunu.

8Wo si malaékat karua sumengo in terompétna, wo awéan tanuoka kuntung wangker si mengembu-ngembung aiténdél an ta'sic. Wo sangapetelu in dano an ta'sic imamuali enda', 9wo sangapetelu é menonou an ta'sic me'delo waya, wo ka'i sé sangapetelu eng kakelina ing kapal an ta'sic materio.

10 # Yes. 14:12 Wo si malaékat katelu sumengo in terompétna, wo rumongkorai ka'i an langit owo si esa sumesendot wangker si mengembu-ngembung tanuoka im pakaembung in obor, wo irumongkor an sangapetelu in doyo-royongan wo ka'i am pakasa im palemboian in dano. 11#Yer. 9:15 E ngaran i sumesendot itu Apsintus. Sangapetelu asé pakasa in dano mapentu', wo kelian tou imaté ampa'paan in dano pentu' itu.

12 # Yes. 13:10; Yeh. 32:7; Yl. 2:10, 31, 3:15 Wo si malaékat kaepat sumengo in terompétna, wo sangapetelu i yéndo, serap wo sé sumesendot kinapasutan akar sangapetelu asé im pakasa sé kinapasutan itu mariréimbeng. Wo in taniitu sangapetelu in endo mariréimbeng, taniitu ka'i sé sangapetelu im bengi.

13Wo kaséréanku awéan esa rajawali tuméléw rumangka-rangka' an langit. Wo linganku si rajawali itu mengangko-ngangko', “Icawangkur, icawangkur, icawangkuro sé tou sé maento' ang kayo'baan, ampa'paan awéané' telu malaékat walina sé sumengo oka in terompét éra.”

Currently Selected:

Wahyu 8: TNT

Highlight

Copy

Compare