Yohanes 20

Si Yesus tumou sumawel

(Mat. 28:1-8; Mrk. 16:1-8; Luk. 24:1-12)

1Asi endo kataré asi duminggu itu, imamoondopé' keli wo ruméimbengé', si Maria Magdalena mangé ang kinuburan i Yesus. Séréna em batu aipénet ang kubur itu miléio. 2Wo sia tuméron mangé meta'up wo si Simon Petrus wo si murit walina si caupus i Yesus, wo icuana ai séra, “Si Tuang niindoo é tou ang kubur, ra'ica kailekan ami Sia aiweta' am bisa.”

3Si Petrus wo si murit walina itu mangé ang kubur. 4Séra in dua tuméron mewali-wali, taan si murit walina itu en tatéron wo si Petrus, akar sia en dior icateka' ang kubur. 5Sia asalo icumuru wo suméré in an untep ing kubur itu wo sérénna eng kaéng lénen an tana'o. Taan sia ra'ica imuntep an untep. 6Wo mai si Simon Petrus, si aitela'u i murit walina itu. Si Petrus muntep ang kubur, sérénna ka'i eng kaéng lénen itu an tana'o, 7wo eng kaéng si aisaput an do'kos i Yesus ra'io an tembir ing kaéng lénen itu, taan linepeto wo aicaérao an tampa walina. 8Wo muntepo ka'i si murit en diorai icateka' ang kubur itu, sinéréna waya wo pinercayana sapaoka si Yesus tinouo sumawel. 9Ampa'paan akar asi oras itu ka'i ra'ipé' kaangéan éra sapa en aipatic ang Kitap Le'nas sapaoka si Yesus musti tumou sumawel an uner é tou imaté. 10Kumawus in itu, sé rua murit itu maréng angé am balé.

Si Yesus mapaturu' in owak a si Maria Magdalena

(Mrk. 16:9-11)

11Si Maria Magdalena makatulungke' ang kesot ing kubur wo mengamé-ngamé'. Ang karapi i mengamé-ngamé' sia kumuru wo suméré in an untep ing kubur. 12Sérénna awéan rua malaékat sé mekarai ing kulo', makalukut asi tampa winetaan owo i mayat i Yesus. Si esa an duru in do'kos wo si esa an duru ing kécéi.

13Wo wuéien é malaékat itu ai sia, “Inang, kéitu réén ko maamé'?”

Isowat i Maria, “Si Tuangku niindoo é tou, wo ra'ica kailekanku am bisa em binetaan éra Sia.”

14Kekawusna icumua in taniitu, sia maréng in somoi, sérénna si Yesus makatulung am bitu, taan ra'ipé' kailekanna Sia itu si Yesus.

15Wo icua i Yesus a si Maria, “Inang, kéitu réén ko maamé'? Si séi réén em paéré-érénmu?”

Paweroten i Maria si tou itu mengatéir in taman, wo icua i Maria, “Tuang, sa si tuang e mindo i mayat-Na, icuao mai a yaku am bisa winetaanmu Sia, wosama' Sia ro'na indonku.”

16Wo icua i Yesus ai sia, “Maria!”

Wo si Maria ka'i maréng in somoi wo rumoma' a nunuwu' Ibrani, “Rabuni!”, eng kaangéanna, ‘Guru’.

17Icua i Yesus ai sia, “Tioo timboienmu en owak-Ku, ampa'paan Aku ra'ipé' imangé a si Amang-Ku. Taan mangéo taré ko a sé poo-poow-Ku, wo icuao mangé ai séra sapaoka intarépé' Aku maangém a si Amang-Ku wo ka'i Amangmu, siituo si Amang Kasuruan-Ku wo ka'i Amang Kasuruanmu.”

18Kumawus in itu si Maria Magdalena mangé a sé murit i Yesus, wo icuana ai séra, “Sinérékuo si Tuang!” Wo isisilna waya ai séra sapa sé aicuao i Yesus ai sia.

Si Yesus mapaturu' in owak a sé murit-Na

(Mat. 28:16-20; Mrk. 16:14-18; Luk. 24:36-49)

19Asi ari duminggu itu ka'i an tutuw imawengio, sé murit i Yesus mali'us an esa walé. Wo kusiin éra waya em papalen ampa'paan icaindé' éra sé kikiiten é tou Yahudi. Tumarépé'anke' mai si Yesus tumulung an uner éra wo icua-Na, “Eng kaeluran mewali-wali wo icamu.” 20Kekawus-Na kumua in taniitu, ituru'-Na ai séra eng kama wo em petic-Na. Sé murit-Na arui an tutuw éra suméré si Apo' Yesus. 21#Mat. 28:18-19; Mrk. 16:15-16 Wo icua-Na sumawel ai séra, “Eng kaeluran mewali-wali wo icamu! Yaku ayutuso mai i Amang-Ku ang kayo'baan, taniituo ka'i camu, yutus-Ku mangé am bisa-wisa ang kayo'baan anio'.” 22Kekawus-Na kumua in taniitu, sengon-Na séra im baya ang karapi ing kumua, “Terimano mangé e Roh Le'nas. 23#Mat. 16:19, 18:18 Sa ampungan iow eng kamesé-meséaan é tou, eng kamesé-meséaanna niampungano. Wo sa ra'ica ampungan iow eng kamesé-meséaan é tou, eng kamesé-meséaanna ra'ica niampungan.”

Si Yesus mapaturu' in owak a si Tomas

24Si Tomas si pengatuulen Didimus esaan asé sangapulu' rua murit i Yesus. An tutuw i Yesus mai mapaturu' in owak a sé murit-Na itu, si Tomas ra'ica mewali-wali wo iséra.

25Wo icua é murit itu a si Tomas, “Sinéréo ami si Tuang!”

Taan icua i Tomas ai séra, “Sa ra'ipé' sinéréku eng kalat pinakuan am palara ing kama-Na, wo ra'ipé' aitopokku en tuturu'ku ang kalat im pinakuan itu, wo ra'ipé' aitopokku en tuturu'ku am petic-Na, wutu-wutul ra'ipé' percayanku.”

26Kekawus i walu ngando, mali'us ka'i sumawel sé murit Yesus am balé itu, wo si Tomas mewali-walio wo iséra. Mandé ka'i pakasa em papalen kinusi', tumarépé'anke' si Yesus mai wo tumulung an uner éra. Icua-Na, “Eng kaeluran mewali-wali wo icamu!” 27Wo icua-Na a si Tomas, “Iweta'o mai en tuturu'mu am bia'i wo séréno mai eng kama-Ku. Yuluro mai eng kamamu wo itopoko mai am petic-Ku. Tioo ka'i ko ra'ica mercaya, taan percayano mai!”

28Wo icua i Tomas, “Icoo si Tuangku wo ka'i Amang Kasuruanku!”

29Wo icua i Yesus ai sia, “Ampa'paan Aku sinérémuo, akar ko mercaya. Kinamango sé tou ra'ica suméré taan mercaya.”

Kéitu eng kitap anio' aipatic

30Wutul keliané' sé tuu-tuus kakaya'kaan walina si niéma' i Yesus an dior é murit-Na, sé ra'ica aipatic asi kitap anio'. 31Taan pakasa sé aipatico asi kitap anio', en itu aipatic wosama' percayan iow si Yesus ituo si Mesias wo Toyaang i Amang Kasuruan, wosama' percayan iow Sia wo kéréan iow eng katouan akar ing kauré-uré.

Currently Selected:

Yohanes 20: TNT

Highlight

Copy

Compare