Galatia 1

En siri'

1En surat anio' a yaku owo Paulus. Yaku mamuali ruru'du'an, ra'ica airu'du' é tou wo ra'ica ka'i niangkai i esa tou. Taan aku mamuali ruru'du'an ampa'paan i Yesus Kristus wo si Amang Kasuruan, Amangta, si tumou sumawel si Yesus an uner é tou imaté. 2Aicirimku en surat anio' a sé jamaat ang Galatia. Yaku wo pakasa sé poo-poow maéman am bia'i ka'i méé in siri' ai camu.

3Pekiupusenku a si Amang Kasuruan Amangta wo a si Apo' Yesus Kristus wosama' Sia méé mai in upus aitambér#1:3 “Upus aitambér” tanu istilah é tou Krésten si tumuru' asi upus i Amang Kasuruan a sé tou mandé ka'i séra ra'ica patus in tumerima. wo eng kaeluran ang katouan iow. 4Kumiit ing kasalé'an i Amang Kasuruan Amangta, si Yesus si sumarakano in owak-Na en tumu'bus ing kamesé-meséaanta wosama' kita icawekar asi kaléwo'an si awéan ang kayo'baan intarépé'. 5Si Amang Kasuruanke' si parayo-rayo wo si pasiri-siriin akar ing kauré-uré! Ulit.

En Abar Kaaruien andumoro' i Yesus Kristus itu wayake' in esa

6Yaku mangaya'ka' keli ampa'paan kamu taloso rior tumela'u si Amang Kasuruan kekawus iow maéman a si Kristus. En ulitna kamu tinowa i Amang Kasuruan wosama' kamu makéré ing katouan akar ing kauré-uré, si aitambér i Kristus. Taan kamu icumiitke' in sususuien asi abar walina. 7En ulitna ra'ica wana lalan walina e makéré ing kalowiran. Taan kamu tinawéro é tou sé mengalicoko icamu ang karapi in sususuien andumoro' in abar sé mengasélé'kow. Em peangé-angén éra en sumali'si' in Abar Kaaruien andumoro' i Yesus Kristus si pakua ami. 8Sa woo awéan tou an uner ami kuma'pa esa malaékat ang sorga owo, sé mengakua ai camu andumoro' in abar walina si ra'ica puté wo in Abar Kaaruien sé aicuao ami ai camu, sia kutuken in ukuman si mute-uter. 9Kaputé sé aicuao ami indior, intarépé' waréngenku sumawel ing kumua ai camu: Kutuken in ukuman si mute-uter sa awéan tou mengakua ai camu andumoro' in sususuien walina si ra'ica puté wo in Abar Kaaruien, si tinerimao miow ai cami.

10Tioo mengawerot sa aku rumaméji marui in até é tou. Yaku rumaméji marui in até i Amang Kasuruan. Sa aku asaloke' rumaméji marui in até é tou, yaku anio' ra'ica ata i Kristus.

Tambisa si Paulus mamuali ruru'du'an

11Poo-poow, si casalé'ku kailekan iow sapaoka en Abar Kaaruien andumoro' i Yesus Kristus si ipakuaku itu ra'ica asé tou owo. 12Ampa'paan en Abar Kaaruien itu ra'ica tinerimaku asé tou, wo ka'i ra'ica wana tou en sumusui in Abar Kaaruien a yaku. Taan si Yesus Kristus in esa en cumua in Abar Kaaruien itu a yaku.

13 # Kis. 8:3, 22:4-5, 26:9-11 Liningao miow en andumoro' ing katouanku indior si mengakiit in agama é Yahudi. Yaku wutu-wutul mengaokoi sé jamaat i Amang Kasuruan wo rumaméji maté iséra im baya. 14#Kis. 22:3 Tanu tou si mengakiit in agama é Yahudi yaku en lébé incaya' miara ing kanaramen é apo-apo'ku, sa ipeputé wo sé kinakelian asé tou Yahudi sé merengan wo yaku.

15 # Kis. 9:3-6, 22:6-10, 26:13-18 Taan si Amang Kasuruan sumisiro yaku tumo'tolai aku an untepé' im poot i inangku wo tumowa yaku e mamuali ruru'du'an-Na ampa'paano in upus aitambér-Na. 16Wo ituru'-Na si Toyaang-Na a yaku, wosama' ipakua-kuaku en andumoro' i Toyaang-Na an uner é tou ra'ica Yahudi. Wo aku ra'ica mangilek sina'u asi séike' mangé mandé esake' nuwu' andumoro' in taar si tinerimaku itu. 17Yaku ka'i ra'ica mangé an Yerusalem e meta'- up wo sé tou en diorai mamuali ruru'du'an wo yaku. Taan aku mangéke' an tana' Arab, wo am bitu oka aku maréng sumawel ka'i an Damsyik.

18 # Kis. 9:26-30 Kekawus in telu ngata'un, aku mangé an Yerusalem e meta'- up wo si Kefas,#1:18 Kefas ngaran walina i Petrus. wo aku mento' am baléna sangapulu' lima ngando eng kauré. 19Taan ra'ica ipeta'upku sé ruru'du'an walina, yaku asalo meta'up wo si Yakobus, poow i Apo' Yesus. 20Sapa sé aipaticku ai camu anio' wutul, wo kailekan i Amang Kasuruan aku ra'ica matowo. 21Kekawusku tumela'u in Yerusalem yaku mangé an Siria wo ang Kilikia. 22Akar asi témpo itu sé jamaat maéman a si Kristus an Yudea ra'ipé' kawisa isuméré ing gioku. 23Séra asalo luminga i nunuwu' é tou andumoro' yaku in tana'i, “Indior si tou itu mengaokoi cami, taan intarépé' sia e mengakua a sé tou en andumoro' im paémanen a si Kristus, si indior em paémanen itu icasalé'na ing ka'pun.” 24Ampa'paan sapa e niéma' i Amang Kasuruan a yaku, séra rumayo wo sumiri' Sia.

Currently Selected:

Galatia 1: TNT

Highlight

Copy

Compare