Kisah Para Rasul 28

Si Paulus wo sé kara-karapina am pulou Malta

1Wo kami icateka' ang karapi in sama' ang katanaan, an tutuw ituo kailekan ami sa em pulou itu makangaran Malta. 2Sé tou am bitu sama' keli ai cami. Séra méma' api wangker wo towan éra kami im baya mangé am bitu, ampa'paan asi témpo itu matampelo wo utingo. 3Wo si Paulus mangé mangéré panga-pangana rintek en iruruk an api. An tutuwna i rumuruk im panga-pangana itu an api, tumarépé'anke'mai kumesotai ula' rumacu-racung ampa'paan paso' keli wo kumarét ing kama i Paulus.

4An tutuw é tou am pulou itu suméré si ula' itu makawérén ang kama i Paulus, séra mengkuanan, “Si tou anio' wutul mengapaté tou. Mandé ka'i sia icawekaro ang kawangkuran an ta'sic, ra'ica iwaya i Dewi Keadilan sia menonou.” 5Taan aipe'peske' i Paulus si ula' itu an api wo si Paulus ra'ica sapa-sapa. 6Wo paweroten éra eng kamana sumega kuma'pa tumarépé'anke'mai sia icarepa wo maté. Uréo pengento-ngentoon éra sapa e mamuali ai sia, taan sérén éra, sia ra'ica sapa-sapa, ampa'paan in ituo paweroten éra sapaoka sia itu opo'.

7Ra'ica tayang asi tampa itu, awéan esa tana' anu i gubernur Publius si makakawasa im pulou itu. Sungkulenna kami wo selewirenna kami ang karapi in sama', eng kauréna telu ngando. 8Asi témpo itu, si amang i Publius icatekel ampa'paan in sumakit paso' wo menomo-nomoi. Wo si Paulus mangé am pakatekelan i amang i Publius wo sia maro ing kamana an do'kos i amang itu ang karoro'anna i masombayang. Wo si amang itu masama'. 9Kumawusai eng kamamualian itu, sé tou sumakit am pulou itu mai ka'i a si Paulus wo séra ka'i sinama'na. 10Sé tou am bitu masiri-siri' icami. Wo an tutuw ami meséngkoto, aitu'tul éra ka'i pakasa eng kaperluan ami.

Si Paulus cateka' a Roma

11Telu ngaserap kami am pulou Malta, kekawus in itu kami suméngkot sumaké ang kapal si mai an Aleksandria owo, wo eng kapal asi témpo itu itumuli am pasuwaan ing kapal asi pulou itu an oras ing kautingan. Eng kapal itu awéan gambar tanu tuus ‘Opo' Kambar, Kastor wo Poluks’.

12Wo kami tumuli ka'i am pasuwaan ing kapal an Sirakusa am pulou Sisilia, wo mento' am bitu telu ngando eng kauréna. 13Wo kami suméngkot kumiit an tembir in ta'sic im pulou itu wo kami icateka' ang kota Regium. Mando mai en deges a mékona rumegeso mai, ampa'paan in ituo eng kapal ami ro'na maya' lébé repet wo mando mai ka'i kami icateka' ang kota Putioli. 14Am bitu, kami meta'up wo sé tou maéman a si Yesus wo enoten éra kami mento' ang karapi éra pitu ngando eng kauréna. Kekawus in itu kami suméngkot mangé a Roma. 15Sé tou a Roma sé maéman a si Yesus imakalingao sa kami maangé am bitu. Ampa'paan in ituo mai sungkulen éra kami an uner im bawayaan ami. Awéan sé meta'up icami am Pasar Apius wo sé walina ituma'up icami an tampa makangaran Patulian Telu [Tres Taberne.] An tutuw sérén i Paulus séra, sia kumua i makapulu'sama' a si Casuruan wo en aténa maketer.

Si Paulus meta'up wo sé tou Yahudi a Roma

16Ampa'paan kami icateka'o a Roma, si kikiiten am bitu méé kaloasan a si Paulus wosama' ra'ica tangen an untep im bui. Sia ro'na mento' an esa walé mewali-wali wo si esa suraro si makatéir sia.

17Teluo ngando kami am bitu wo enoten i Paulus sé tou Yahudi sé pasiri-siriin e meta'up wo sia. Wo an tutuw éra imali'uso, icuana ai séra, “Poo-poow! Yaku am bia'i ampa'paan tinangka' é tou Yahudi an Yerusalem wo isarakan éra aku a sé pemerénta Romawi. Taan aku ra'ica iméma' kaséaan sapa-sapa en sumundur sé taranakta wo ka'i ra'ica kumélong ing kanaramen é apo-apo'ta. 18An tutuw é tou Romawi itu meriksa yaku a mangé mbitu, ra'ica kinéréan éra eng kaséaanku si ro'na méma' yaku makéré in ukuman patén. Ampa'paan in ituo aku aiwekar éra. 19#Kis. 25:11 Taan ra'- ica teriman é tou Yahudi sa aku iwekar. Ampa'paano in itu aku lumesé' sumosor im perkaraku a si Kaisar. Niéma'ku in taniitu ra'ica ampa'paan aku tumudu sé taranakku in esa. 20Ampa'paan in ituo pinangilekku kamu meta'up wo mepaar ang karapiku wosama' kailekan iow sa pakasa en aitudu éra a yaku ra'ica wutul. Ampa'paan aku maarap wo maéman a si Mesias si aijanji i Amang Kasuruan ai cita tou Israel, ampa'paan in ituo aku pakawa'kesen tanu sia'i.”

21Taan icua éra a si Paulus, “Kami ra'ica itumerima surat an Yudea owo si mai icumua andumoro' ing katouanmu. Taniitu ka'i sé karapi ami sé imaréngai an Yerusalem owo, mandé esake' ai séra ra'ica wana en sumisil in léwo' andumoro' ico. 22Taan kami in esa masalé' luminga ai co andumoro' in sususuien é golongan Nasrani itu. Kailekan ami am bisa-wisa awéan sé tou makélong in sususuien itu.”

23Wo séra tumantu esa endo e meta'up sumawel wo si Paulus. Wo asi endo itu kelian sé imai an tampa pakaento'anna. Wo sia kumua wo masairi ai séra andumoro' si Amang Kasuruan Kumawasa tanu Kolano. Sia ka'i maké in tuu-tuus an ukum Torat wo eng kitap é nabi e rumaméji wosama' kailekan éra wo émanen éra sa si Yesus itu si Mesias. En itu imamuali tumo'tol i mamoondo akar im bawaando. 24Awéan sé ro'na émaanna mercaya wo ka'i awéan sé ra'ica. 25Anaé, pakasa séra ra'ica esa wewerot andumoro' in itu wo séra mentalicuran asi tampa itu. Taan, ra'ipé' mentalicuran séra, icua ka'i sumawel i Paulus ai séra, “Wutulo en aicua i Roh Le'nas a sé apo-apo'ta si aipatic ang kitap i nabi Yesaya.

26 # Yes. 6:9-10 ‘Mangéo a sé taranak é Israel wo icua ai séra:

Pelinga-lingan oka miow, taan ra'ica kaangéan iow.

Penéré-nérén oka miow, taan ra'ica kailekan iow.

27Ampa'paan en até i bangsa anio' kumetéo,

en lunteng éra imawengelo

wo em beren éra aicili'o wutul,

wosama' em beren éra ra'ica suméré

wo en lunteng éra ra'ica luminga,

wo ka'i en até éra ra'ica makailek,

wosama' séra ra'ica maréng sumawel en samaan-Ku.’ ”

28Wo icua ka'i i Paulus, “Musti kailekan iow sa en abar andumoro' ing kalowiran itu aicuao a sé tou ra'ica Yahudi wo tantu teriman éra oka, anaé séra tantu lowiren oka.” [29Kekawusai i Paulus kumua in taniitu, sé tou Yahudi maréng, wo em ipakawerot éra membam-balinaan.]

30Si Paulus mento' asi walé si sinéwana itu rua ngata'un eng kauré. Pakasa en tou sé mengaai ai sia pengaterimanna.

31Si Paulus masusui in abar andumoro' i Amang Kasuruan Kumawasa tanu Kolano wo ipasusuina ka'i ai séra andumoro' i Apo' Yesus Kristus. Sia masusui a sé tou ang karapi in da'ica wana eng kaindé'an wo ra'ica wana e mangapéro.

Currently Selected:

Kisah Para Rasul 28: TNT

Highlight

Copy

Compare