Kisah Para Rasul 19
19
Si Paulus an Efesus
1An tutuw i Apolos ang Korintusé', si Paulus maya'o mangé an doo-roong an sangkum ing Galatia wo am Frigia wo icateka' an Efesus. Am bia'i, sia meta'up wo piraan tou sé maémano. 2Icuana ai séra, “An tutuw iow imaémano, tumerimao réén i Roh Le'nas kamu?”
Isowat éra ai sia, “Ra'ipé', wo ka'i ra'ipé' sumangkum ako pinalinga ami sa e Roh Le'nas itu awéan.”
3Wuéien ka'i sumawel i Paulus ai séra, “Sa taniitu, nibaptis réén im baptisan sapa kamu?”
Isowat éra, “Kami nibaptis kumiit im baptisan i Yohanes.”
4 #
Mat. 3:11; Mrk. 1:4, 7-8; Luk. 3:4, 16; Yoh. 1:26-27 Wo icua i Paulus ai séra, “Em baptisan i Yohanes itu mamuali tuus sapaoka sé tou imape'diso. En aicua ka'i i Yohanes a sé tou itu sapaoka kekawusna, awéan oka ka'i esa Tou e maai wo séra musti maéman ai Sia, Siao si Yesus.”
5Kelinga in itu, wo séra baptisen ang karapi ngaran i Apo' Yesus. 6Wo an tutuw i Paulus maro ing kama an dangka' in do'kos éra, e Roh Le'nas tumumpa mai ai séra. Wo séra tumo'tolo maroma' a nunuwu' i roh wo ipakua éra en taar i Amang Kasuruan a sé tou am bitu. 7Séra im baya, awéan wona' sangapulu' rua tou.
8Telu ngaserap eng kauréna, si Paulus mengauntep am balé paapo'an é agama Yahudi. Am bitu sia maroma' ang karapi in da'- ica wana kaindé'an wo meindo-indoan roma' wo sé tou Yahudi wosama' percayan éra andumoro' ing kakolanoan i Amang Kasuruan. 9Taan awéan piraan tou ra'ica kiim tumerima in sususuien i Paulus ampa'paan séra keté até. Wotaré ipemaa-maar éra in léwo' an dior é tou keli andumoro' im basa i Amang Kasuruan en lumowir sé tou iméma' ing kamesé-meséaan. Ampa'paano in itu itela'u i Paulus séra wo towanna sé tou maéman a si Yesus kumesot am balé paapo'an é agama Yahudi. Wo susur in endo sia maroma' ang karapi é tou am pakuliaan, si ningaranan Tiranus. 10En itu niéma'na akar in dua ngata'un, akar pakasa sé tou maento' an Asia luminga in Abar Kaaruien andumoro' i Yesus Kristus. Sé iluminga in itu, tou Yahudi wo tou ra'ica Yahudi.
Sé toyaang i Skewa mepé' e musér si sétang maké i ngaran i Yesus
11Si Amang Kasuruan méé kawasa a si Paulus e méma' ing kakaya'kaan sé ra'io icakua. 12Mandé ka'i wayake' in lénso kuma'pa kaéng ipapules in licur si sumangkumo pinaké i Paulus wo iweta' a sé tou sumakit, séra makala'us masama'. Taniitu ka'i wo sé tou rinasuk i roh léwo', sé roh léwo' itu makala'us kumesot.
13Awéan piraan tou Yahudi sé mengasihir, séra mawaya-waya' mangé am bisa-wisa e musér sé roh léwo' asé tou rinasuk. Yepé' éra imaké i ngaran i Apo' Yesus. Icua éra a sé roh léwo' itu. “Ang karapi i ngaran i Yesus si aicua i Paulus, yusérku kamu!” 14Awéan pitu toyaang tuama i esa kikiiten é imam agama Yahudi si makangaran Skewa, séra itu musér si roh léwo'. 15Taan aicuake' i roh léwo' ai séra, “Si Yesus katuusanku taniitu ka'i si Paulus, taan si séi réén kamu?” 16Makanuwu' mai, si tou rinasuk i roh léwo' itu tumulung wo sumerang iséra, akar séra imakala. Wésoonna ka'i eng karai éra wo séra tumincas meke'da' tumela'u im balé itu akar i mapéla-péla'.
17Pakasa sé tou Yahudi wo sé tou ra'ica Yahudi an Efesus makalinga ing kamamualian itu. Kelinga in itu wo séra maindé' wo marayo-rayo i ngaran i Apo' Yesus. 18Kelian sé ai séra e mamuali tou maéman, mai wo mangaku an dior é tou keli sapaoka séra sumangkumo mengéma-ngéma' tanu siitu. 19Wo kelian ka'i ai séra sé mengapaké in sihir, umungen éra eng kitap-kitap sihir wo tunun éra an dior é tou keli. Em bééna ing kitap-kitap itu, sa takséren wona' lima ngapulu' riwu roit pérak. 20Ang karapi i méma' in taniitu, en taar i Casuruan makaseraro am bisa-wisa wo makakelio ka'i sé tou maéman.
Si Demetrius méma' ing kalicokoan an Efesus
21Kekawus ing kinamamualian itu, iru'du' i Roh i Amang Kasuruan si Paulus e mangé an Yerusalem lumangkoi i Makedonia wo Akhaya. Wo icua i Paulus, “Kekawusai mangé an Yerusalem, yaku ka'i musti mangé a Roma.” 22Wo iru'du'na si Timotius wo si Erastus, sé rua kara-karapina matawoi wosama' rumior mangé a Makedonia, taan si Paulus in esa mento' uré-uréan toyo' an Asia.
23An tutuw itu, an Efesus imarinca'o ampa'paan en sususuien andumoro' im basa i Amang Kasuruan en lumowir sé tou, ra'ica icasalé' é tou. 24Pakasa en itu imamuali ampa'paano i esa tuama makangaran Demetrius. En tawoienna mengaéma' sé kuil-kuil teké' i opo' Artemis am pérak owo. Asi tawoienna itu sé tou matawoi ang karapina makéré roit keli. 25Asi makasa, li'usenna waya sé tou matawoi ai sia wo sé tou walina sé maéma' im barang-barang am pérak owo. Icuana ai séra, “Poo-poow, tantu kailekano miow sa kita mekéré roit keli ampa'paan in tawoienta anio'. 26Intarépé' sinéréo wo liningao miow in esa, ampa'paano taré i Paulus akar sé tou ra'io maapo' a si opo'ta Artemis. Pemaso-masoonna in léwo' sé tou wo ipakuana, sé patong paémaanta ra'ica wutul. En itu aicuana ra'ica asaloke' an Efesus, taan misio am pakasa in Asia. 27Anaé, sa pakasa en tou kumiit im pakua i Paulus, en tawoienta anio' iséro' oka é tou. Wo ka'i si caindé'ta sa eng kuil i opo'ta Artemis ra'io wana ka'i torona. Eng kasiwakana em patong i opo'ta Artemis si pengaapo'an é pakasa in tou an Asia wo am pakasa ing kayo'baan ra'io ka'i paapo'an éra.”
28Kelinga in itu, sé tou keli itu mae'bow keli wo yangko' éra, “Rayo si Artemis, si opo' é tou Efesus!” 29Wo malicokoo waya sé ang kota itu. Tangkaan éra si Gayus wo si Aristarkhus wo iwali éra an stadion. Séra in dua itu tou Makedonia sé mewali-wali mai wo si Paulus am bawayaanna. 30An tutuw itu si Paulus masalé' muntep an uner in stadion e numuwu' a sé tou keli itu, taan pinéro'ke' é muritna. 31Am bitu, awéan ka'i piraan pejabat Asia sé mekarapi sama' wo si Paulus. Ru'du' éra tou e mangé mekiupus a si Paulus wosama' sia tioo muntep an stadion itu.
32Sé tou imali'us an stadion itu mengangko-ngangko', awéan sé maangko' in tana'i awéan sé maangko' in taniitu. Sé imali'us am bitu malicokoo, ampa'paan kinakelian ai séra ra'ica makailek sapa en torona éra imali'us. 33Wo am bitu awéan esa tou makangaran Aleksander. Ruké é tou Yahudi sia an dior é tou keli ampa'paan icasalé' éra sia en tumerangkan sapaoka si méma' im perkara anio' ra'ica tou Yahudi. Wo si Aleksander masalé' méla in owak an dior é tou keli, anaé sia mangkai ing kama en suméin wosama' sé tou menes. 34Taan tutuw kailekan éra sia tou Yahudi, séra mewali-wali mangko' wona' dua jam eng kauréna, “Rayo si Artemis, si opo' wéwéné é tou Efesus!”
35Wo iru'du' i jortulis ing kota itu wosama' séra menes, icuana, “Éi tou Efesus! Kailekan waya é tou ang kayo'baan anio' sapaoka tinéiran é tou Efesus sumama-sama' eng kuil i opo' Artemis si wangko' wo ka'i em patongna si tumumpa mai an langit. 36En itu ra'ica toro sangkalen, ampa'paano in itu menes owo tioo mario-rior mindo in tindakan. 37Ampa'paan aiwalio miow sé rua tou anio' am bia'i mandé ka'i séra ra'ica irumombit in sapa-sapake' ang kuil i opo'ta wo ra'ica ka'i maroros i ngaran i opo'ta. 38Anaé, sa si Demetrius wo sé mengatawoi ai sia awéan ipatudu a si séike' mangé, lébé loor paalin éra en itu am pangadilan kuma'pa a si gubernur. A mangé mbitu ro'na icua éra em ipatudu itu. 39Wo sa awéan masala walina si tuntuten iow, lébé loor lekepen iow en itu an sidang im pengadilan. 40Ampa'paan sapa e imamuali asi endo anio' iméma'o cita ang kawangkuran. Sé pemerénta Romawi ro'na tumudu icita iméma' ing kalicokoan. Sa en anio' mamuali kita ra'ica wana alasan en icua ai séra.” Ampa'paan i nuwu'na itu sé tou imali'us itu metalicur. 41Kekawus i jortulis kumua in itu, iru'du'na sé tou keli itu e maréng.
Currently Selected:
Kisah Para Rasul 19: TNT
Highlight
Copy
Compare
Share
Want to have your highlights saved across all your devices? Sign up or sign in
En Taar Weru a nunuwu' é Tontemboan @ LAI 2018