Kisah Para Rasul 14

Si Paulus wo si Barnabas an Ikonium

1An tutuw i Paulus wo si Barnabas an Ikonium, séra muntep am balé paapo'an é agama Yahudi, tanu ing kanaramen paémaan éra an tampa walina. Am bitu séra kumua in Abar Kaaruien andumoro' i Yesus Kristus ang karapi in sumama-sama' akar keli sé tou Yahudi wo sé tou ra'ica Yahudi maéman a si Yesus. 2Taan awéan tou Yahudi sé ra'ica kiim mercaya in aicua i Paulus wo si Barnabas, séra memaso-maso' in léwo' sé tou ra'ica Yahudi wosama' icasuut éra sé poo-poow esa paémanen itu. 3Anaé, si Paulus wo si Barnabas mento' uré toyo' am bitu. Wo ang karapi in da'ica wana kaindé'an pengua-ngua éra en abar andumoro' in upus aitambér i Casuruan. Séra in dua winéan-Na kawasa e méma' in tuu-tuus sé ra'io icakua wo kakaya'kaan-kakaya'kaan. 4Taan sé tou keli ang kota itu mamuali rua ngareru'. Awéan sé marapit a sé tou Yahudi ra'ica maéman, wo awéan ka'i sé marapit a sé rua ruru'du'an itu.

5Eng kasiwakanna, sé tou Yahudi wo sé tou ra'ica Yahudi mewali-wali wo sé kikiiten éra meesa. Séra rumaméji e mokoi wo mangkil im batu a si Paulus wo si Barnabas. 6Taan kailekano éra in dua em pawasa-wasan léwo' itu. Ampa'paano in itu séra sumingkir angé ang kota-kota an Likaonia. Eng kota-kota itu, Listra wo en Derbe wo an tampa-tampa walina an sangkum itu. 7Wo am bitu ka'i séra kumua in Abar Kaaruien andumoro' i Yesus Kristus.

Si Paulus wo si Barnabas an Listra wo an Derbe

8Ang kota Listra, awéan esa tuama si asalo meluku-lukut ampa'paan eng kécéina késo' ketounake' mai wo ra'ipé' sumangkum ako maya'. 9Si tou itu makalinga si Paulus maroma'. Wo téintengen i Paulus si tou itu, kailekanna si tou itu maéman a si Yesus anaé ro'na masama'. 10Wo si Paulus rumoma' in taangko' ai sia, “Tumulungo!” Wo sia makala'us lumo'tic tumulung wo tumo'tolo menguru-nguri mawaya'.

11An tutuw sérén é tou keli sapa e niéma' i Paulus, séra makala'us mangko' maké i nunuwu' é Likaonia, “Sé opo-opo' itumumpao mai an unerta meputé tou!” 12Wo tumo'tolo séra mengatuul si Barnabas itu Zeus, wo si Paulus pengatuulen éra Hermes ampa'paan sia si mengaroma'. 13Ang kesot ing kota, awéan esa kuil i opo' éra makangaran Zeus. Asi témpo itu si imam éra wo sé tou keli maali-ali sé sapi bongko wo im bunga-bungang mangé am papalen wangko' ing kota. Séra mawasa méma' raragésan a sé ruru'du'an itu.

14Taan Kelinga i Barnabas wo si Paulus sapa en émaan é tou keli itu, wo késéén éra eng karai éra wo sumolisip angé an uner é tou keli itu ang karapi i maangko', 15“Éi camu im baya, kéitu réén kamu méma' in tana'i? Kami anio' tou kaputé miow. Kami am bia'i eng kumua in Abar Kaaruien andumoro' i Yesus Kristus ai camu, wosama' kamu ro'na tumela'u sé opo-opo' sé ra'ica wana torona wo kamu maémano mangé a si Amang Kasuruan si menonou. Siao si méma' in langit wo ing kayo'baan, ta'sic wo im pakasa sé an untepna. 16Indior aiwaya i Amang Kasuruan pakasa sé bangsa menonou makiit in lalan éra i esa wo i esa. 17Taan si Amang Kasuruan kasake' tumambérai in upus-Na a sé pakasa sé tou ang karapi in tumumpa mai in uran an langit wo winéan-Na oras i maupu' ai cita. Winéan-Na ka'i mai kakanen wo kaaruian an atéta.”

18Mandé ka'i si Paulus wo si Barnabas irumoma'o tanu siitu, misike' ra'ica katangan éra sé tou keli itu e méé raragés ai séra.

19Wo asi témpo itu mayo sé tou Yahudi a mangé en Antiokhia wo an Ikonium owo. Séra memaso-maso' in léwo' a sé tou keli itu akar si Paulus wangkilen éra im batu wo wésoon éra icesot ang kota, ampa'paan paweroten éra sia imatéo. 20Taan, an tutuw é tou maéman am bitu matulung wo lumi'cir sia, makala'us sia tumulung wo muntep sumawel an Listra. Asi woondona mai, sia mangé an Derbe mewali-wali wo si Barnabas.

Si Paulus wo si Barnabas maréng sumawel an Antiokhia

21An Derbe, si Paulus wo si Barnabas ka'i kumua in Abar Kaaruien andumoro' i Yesus Kristus, wo keli tou maémano a si Yesus. Kekawus in itu séra in dua maréng sumawel an Listra, wo melala'- us an Ikonium wo ka'i an Antiokhia an sangkum im Pisidia. 22An tampa-tampa itu, si Paulus wo si Barnabas kumeter in até é tou maéman wo sumina'u iséra wosama' le'tek am paémanen. Wo icua i Paulus wo si Barnabas, “Sa kita masalé' mamuali tou i Amang Kasuruan si Kumawasa tanu Kolano, kita musti meta'up ing keli kawenduan.” 23Wo séra in dua sumisir sé penatua torona é jamaat itu. Séra sumombayang wo muasa en sumarakan sé penatua itu a si Casuruan si paémanen éra.

24Kekawus i Paulus wo si Barnabas lumi'cir am pakasa im Pisidia, séra mangé an sangkum im Pamfilia. 25Am Pamfilia, séra kumua in Abar Kaaruien andumoro' i Yesus Kristus am Perga wo séra meros an Atalia. 26A mangé em bitu oka séra suméngkot angé an Antiokhia. Indior séra ayutus é jamaat itu eng kumua in Abar Kaaruien itu. Sé jamaat ituo ka'i en sumombayang sumarakan iséra in dua a si Amang Kasuruan wosama' Sia tumambérai in upus-Na ai séra en tumo'tol in tawoien. Intarépé' séra mangé am bitu ampa'paan linekepo éra en tawoien.

27Icatéka' mangé an Antiokhia, towan éra sé jamaat e maumung. Wo sisil éra in dua pakasa sé niéma' i Amang Kasuruan ai séra. Sisil éra ka'i tambisa si Casuruan muka' in lalan akar sé tou ra'ica Yahudi ro'na maéman a si Yesus. 28Am bitu séra mento' uré toyo' wo sé poo-poow esa paémanen.

Currently Selected:

Kisah Para Rasul 14: TNT

Highlight

Copy

Compare