1 Timotius 5

Em pakasina'u a sé tou walina

1Timotius! Ico tioo tarepet masina'u a si tuama matu'a mai ai co. Aweso taré' sina'uenmu mangé in sama' sia tanu ko manuwu' a si amangmu. Wo a sé mangalitou, pasina'uenmu mangé in sama' séra tanu ko manuwu' a si tuarimu in esa. 2Taniitu ka'i wo sé wéwéné sé matu'a mai ai co. Musti sina'uenmu mangé in sama' séra tanu ko manuwu' a si inangmu in esa. Wo sé mangala'un, sina'uenmu mangé ka'i séra ang karapi ing kale'nasan in atému tanu ko manuwu' a si tuarimu in esa.

En andumoro' é balu wéwéné

3Pawéanmu mio' rékén sé balu wéwéné sé uli-ulit pinatéano i penanaanna wo ra'io wana sé masémbo-sémbong. 4Taan sa sé balu wéwéné awéané' toyaang kuma'pa poyo', sé toyaang wo sé poyo'na itu en suma'li ai sia. Musti susuian éra tambisa en sumuli' ing kalooran i inang wo si néné éra. Wo in taniitu, séra maruio in até i Amang Kasuruan. 5Si balu wéwéné si ra'ica wana toyaang wo ra'ica wana poyo' en suma'li, sia asalo mamangén a si Amang Kasuruan. Endo wo em bengi sia menomba-nombayang meki-kiupus a si Amang Kasuruan. 6Taan si balu wéwéné masalé'ke' menonou ang kaaruian, sia tanu imatéo mandé ka'i sia menonoué'. 7Ita'néi angé sumama-sama' a sé balu wéwéné pakasa en anio' wosama' séra menonou ang kale'nasan akar ra'ica wana tou muruk i ngaran éra. 8Ampa'paan sa awéan tou ra'ica kiim murus sé poo-poowna wopé'ka'i kapoownapé' in esa, sia itu isumangkalo im paémanenna a si Yesus. Si tou itu lumébémai eng kaléwo' wo sé tou sé ra'ica maéman a si Casuruan.

9Anaé, si balu wéwéné e ro'na daftar é jamaat en tawangen, en atorana tana'i: en umurna ra'ica maina' an enem ngapulu' ngata'- un, wayake' i makasa kawéngen, 10wo kailekan ka'i é tou sapaoka sia matawoi in loor tanumai: pengaurusenna in sama' sé toyaangna, pengasungkulenna in sama' sé tou mengaai am baléna, pengaselewiranna in sama' sé tou maéman wo pengatawangenna sé tou ang kasusaan wo mengéma-ngéma' in loor a sé pakasa in tou.

11Taan sé balu wéwéné wo'basé' sé ra'ipé' imangé in enem ngapulu' ngata'un, ra'ipé' toro daftar en tawangen. Ampa'paan sa séra kinawasao ing kasalé'an in owak si ra'ica wutul, tantu séra masalé'pé' kawéngen sumawel wo ra'io mengaselewir a si Kristus, 12wo in taniitu, séra kumélongo in janji éra indior en sumelewir a si Yesus. Ampa'paan ituo séra ukumen oka i Amang Kasuruan. 13Séra itu asalo mengéra-ngéra asi walé esa wo mangé am balé walina, wo in taniitu séra numaram in owak mengena-ngena'ke'. Wo ra'ica mengena-ngena'ke', séra ka'i mengapaar andumoro' ing kawurukan é tou, marambét in urusan é tou walina wo ka'i memaa-maar sé ra'ica patus. 14Ampa'paan ituo icasalé'ku sé balu wéwéné wo'basé' wosama' séra masalé'pé' kawéngen sumawel. Sa séra kawéngené' sumawel, séra ro'napé' makéré toyaang wo murus im pamalé éra in esa. Wo in taniitu si kikiiten é sétang ra'- ica wana témpo e maké sé tou e muruk i ngaranta tou maéman. 15Ampa'paan awéan piraan balu wéwéné wo'basé' icasélé'kowo wo icumiito ing kasalé'an i kikiiten é sétang.

16Taan sa awéan wéwéné maéman a si Casuruan wo an uner im pamaléna awéan wéwéné balu, si wéwéné maéman itu musti tumawang si balu itu wosama' sia ra'ica mamuali pamuléngen é jamaat. Wo in taniitu sé jamaat ro'na tumawang sé balu walina sé wutu-wutul ra'io wana kapoow.

Em pakatawoi é penatua an jamaat

17Sé penatua an jamaat sé mengaéma' in tawoienna ang karapi in loor, séra itu patus pasiri-siriin makarua lumepet. Wopé'ka'i sé re'dem makua in Taar i Casuruan wo masusui a sé jamaat. 18#Ul. 25:4; Mat. 10:10; Luk. 10:7 Ampa'paan ang Kitap Le'nas aipatic in tana'i, “Sa awéan sapi ang karoro'an i matawoi, ra'ica toro wa'kesenta em ba'ba'na wosama' sia ro'na kuman.” Wo awéan ka'i aipatic in tana'i, “Sé tou matawoi, patus makéré laasa.” 19#Ul. 17:6, 19:15 Sa awéan tou matudu sé penatua an jamaat, ra'ica toro terimanmu em patudunna itu. Taan sa awéan rua kuma'pa telu sairi eng kumeter in tuduan itu, ro'nao terimanmu en tuduan itu wo ro'nao urusenmu si penatua itu. 20Sa sia wutu-wutul méma' ing kamesé-meséaan, sina'uenmu mangé sia an dior é tou maéman. Wo in taniitu sé tou maéman walina maindé' méma' ing kamesé-meséaan. 21Timotius, iwééku en tawoien anio' ai co an dior i Amang Kasuruan wo si Kristus Yesus wo sé malaékat sé sinisir-Nao. Pangilekenku ai co wosama' émaano waya sé aicuaku anio' an jamaat wo ra'ica marapit. 22Tioo ko taporak maro ing kama a si séike' mangé en lumantik sia mamuali kikiiten an jamaat. Sa awéan tou méma' ing kamesé-meséaan, tioo ko kumiit mengaéma' ing kamesé-meséaan kaputé éra. Téirano mangé eng kale'nasan ing katouanmu.

23Timotius, kailekanku ko pengasakitan in tina'i wo awéan sakit walina. Anaé, ko tioo asalo mengaelep rano kulo'ke', taan maelep angé toyo' anggor en sumama' in sakitmu itu.

24Awéan piraan tou sé kinailekano mengaéma' ing kamesé-meséaan. Mandé ka'i séra ra'ipé' niakim i Casuruan, taan eng kamesé-meséaan éra kailekano waya é tou. Wo sé walina ka'i méma'o ing kamesé-meséaan taan ra'ipé' kinakailekan. Eng kamesé-meséaan éra itu kakailekan oka asi endo mengangai. 25Taniitu ka'i awéan tou si méma'o in loor en itu uli-ulit kinakailekano. Taan awéan ka'i sé mengaéma' in loor taan ra'ica kinailekan, kakailekan oka asi endo mengangai.

Currently Selected:

1 Timotius 5: TNT

Highlight

Copy

Compare