1 Timotius 3
3
En atoran-atoran é tou mengatilik an jamaat
1Ulito si nunuwu' anio': “Sé tou masalé' mamuali tou mengatilik an jamaat, sia sumisiro in tawoien loor.” 2#Tit. 1:6-9 Si mengatilik an jamaat, sia itu musti ra'ica wana tou e ro'na méé kaséaan, si wéwéné penanaanna waya in esa, makawoo tumang in owak, mengapaké ing kapinteran asi Casuruan owo, makaperi sumoma, tansaléén mengaterima sé tou am baléna, pinter masusui sé tou, 3ra'ica lalangun, ra'ica tae'bow taan sama' a sé tou, masalé' meelu-eluran wo sé kakélé in tou wo ra'ica ata in doit, 4mamuali kikiiten loor am pamaléna, pasiri-siriin wo pengalingan é toyaangna. 5Ampa'paan sa sia ra'ica makawoo en tumu'tul im pamaléna in esa, ra'ica kawisa ka'i sia ro'na tumu'tul sé jamaat i Amang Kasuruan!
6Sé tou mengatilik an jamaat ra'ica toro sé werupé' maéman a si Casuruan, wosama' sia ra'ica matirayo, ampa'paan sa sia matirayoo, ukumen oka i Casuruan sia tanu si Casuruan mukum si kikiiten é sétang. 7Sé tou mengatilik an jamaat, e ngaran wo em perina musti loor a sé tou ra'ipé' maéman, wosama' sia ra'ica iséro' é tou wo ra'ica katawéran in ta'kong i kikiiten é sétang.
En atoran-atoran torona é maselewir sé jamaat
8Taniitu ka'i wo sé maselewir sé jamaat, séra sumémbong tumu'tul sé jamaat, em peri éra musti loor akar pasiriin é tou, ra'ica punek, ra'ica lalangun wo ra'ica longi'. 9Séra musti menonou ang karapi in até weresi wo uli-ulit makiit in sususuien si aituru'o i Casuruan. 10Wo an tutuw éra ra'ipé' niangkai mamuali maselewir an jamaat, séra ujin owo sumama-sama' é jamaat sapaoka eng katouan éra ra'ica wana tou e ro'na méé kaséaan. 11Taniitu ka'i wo sé penanaan éra, em peri é penanaan éra musti loor akar pasiri-siriin é tou, ra'ica mengawuruk i ngaran é tou walina, makailek matang in owak wo ro'na papercayan am baya-waya. 12Sé maselewir e masémbong tumu'tul sé jamaat itu, musti wayake' in esa wéwéné em penanaanna. Sia musti makailek maurus ang karapi in loor sé toyaangna wo em pamaléna. 13Sa pengaselewiran éra in sumama-sama' sé jamaat, tantu sé mengaselewir itu ka'i pasiri-siriin é jamaat, wo in taniitu ra'ica wana eng kaindé'an éra manuwu' a sé jamaat andumoro' im paémanen éra a si Yesus Kristus.
Em patuuran im paémanenta
14Timotius, yaku maarap ra'io uré kita in dua meta'up. Taan mandé ka'i kita ra'ipé' imeta'up, yaku matico in surat anio' ai co, 15sa aku icasomoi maai, en suratku anio' icateka' owo mangé ai co. Wo asi suratku anio', ro'nao kakailekanmu musti tumambisa eng katouan é tou maéman sé imuntepo am pamalé i Amang Kasuruan. Séra itu mamuali tuura wo totombol an esa walé. Tanu siituo sé jamaat-Na musti menonou, tanu tuura wo totombol in sususuien wutul itu.
16Indior en sususuien wutul itu ra'ica kailekan é tou, taan intarépé' sé icaenep andumoro' in sususuien wutul sé ra'io cakua itu, winuka'o i Amang Kasuruan. Sé icaenep itu tana'i:
“Si Yesus imayo wo mamualio tou,
wo aituru' i Roh Le'nas sapaoka Sia itu wutul.
Sia mapaturu'o in owak-Na a sé malaékat,
wo en sisisilen andumoro' Sia itu icaseraro a sé bangsa.
Wo Sia émanen é pakasa ing kayo'baan,
wo Sia niangkaio mangé an sorga ang karapi i rarayo wo in sisiri'.”
Currently Selected:
1 Timotius 3: TNT
Highlight
Copy
Compare
Share
Want to have your highlights saved across all your devices? Sign up or sign in
En Taar Weru a nunuwu' é Tontemboan @ LAI 2018
