1 Yohanes 5

Sé tou maéman a si Yesus Kristus kumala si léwo'

1Si séike' e maéman sapaoka si Yesus itu Kristus, sia toyaango i Amang Kasuruan. Wo en tou si mengaupus a si Amang, sia ka'i mengaupus sé tou i mamualio toya-toyaang-Na. 2Wo sa kita mengaupus si Amang Kasuruan wo le'tek maéma' im perénta-perénta-Na, en itu mamuali tuus kita ka'i mengaupus sé toyaang-Na. 3#Yoh. 14:15 Anaé, sa kita mengaupus si Amang Kasuruan, tantu émaanta em perénta-perénta-Na. Em perénta-perénta-Na itu sa émaanta ra'ica uter. 4Kita anio' mamualio toya-toyaang i Amang Kasuruan, ampa'paan in itu kawooanta kumala si léwo' asi cayo'baan anio'. Wo kita muntung ampa'paan kita maéman a si Casuruan. 5Si séi réén e makawoo kumala si léwo' ang kayo'baan anio'? Tantu si tou maéman sapaoka si Yesus itu Toyaang i Amang Kasuruan.

Eng kasairian andumoro' si Toyaang i Amang Kasuruan

6Si Yesus Kristus imayo ang kayo'baan ang karapi in dano ipabaptis-Na wo in enda' im papaté-Na. Sia maai ra'ica ang karapi in danoke', taan ang karapi in dano wo in enda'. Wo e Roh i Casuruan in esa e méé kasairian sapaoka pakasa en itu wutul. 7Wo awéan telu e mawéé ing kasairian sapaoka si Yesus itu Toyaang i Amang Kasuruan [an sorga: si Amang, Taar, wo Roh Le'nas. Wo sé telu itu méé kasairian meputé. 8Wo awéan telu sairi ang kayo'baan]: Roh Le'nas, rano, wo enda'. Wo sé telu méé kasairian i meputé sapaoka si Yesus itu Toyaang i Amang Kasuruan. 9Kanaramen terimanta eng kasairian é tou, taan eng kasairiané' i Amang Kasuruan en lébé keterai wo ing kasairian é tou, anaé en lébé ro'na terimanta eng kasairian i Amang Kasuruan andumoro' i Toyaang-Na. 10Si séi si maéman a si Toyaang i Amang Kasuruan, sia itumerimao ing kasairian itu an aténa. Taan si séi e ra'ica maéman a si Amang Kasuruan, sia iméma'o si Amang Kasuruan kotowo ampa'paan sia ra'ica maéman ing kasairian i Amang Kasuruan andumoro' si Toyaang-Na itu. 11#Yoh. 3:36 Eng kasairian itu icumua in tana'i: Si Amang Kasuruan imééo mai ing katouan akar ing kauré-uré ai cita, wo eng katouan akar ing kauré-uré itu kéréanta ampa'paan maéman a si Toyaang-Na. 12Si séike' e makaanu si Toyaang i Amang Kasuruan, sia itu makaanu ing katouan akar ing kauré-uré. Taan si séike' ra'ica makaanu si Toyaang i Amang Kasuruan, sia itu ra'ica makaanu ing katouan akar ing kauré-uré.

Eng kakailekan andumoro' ing katouan akar ing kauré-uré

13Aipaticku waya en itu ai camu sé maéman a si Toyaang i Amang Kasuruan, wosama' kakailekan iow sa kinéréano miow eng katouan akar ing kauré-uré. 14Wo kita ra'ica maindé' meta'up wo Sia, ampa'paan sa kita sumombayang kumiit ing kasalé'an-Na, percayanta lingan-Na oka sapa em pangilekenta. 15Wo sa kailekanta sapaoka pinalinga-Nao em pinangilekta, émanenta ka'i sapaoka pakasa sé pinangilekta kinéréantao.

16Sa awéan tou isuméré si poowna mengaéma' ing kamesé-meséaan, wo eng kamesé-meséaan itu ra'ica imakawali si poowna itu am papaté, si tou isuméré in itu musti sumombayang angé a si Amang Kasuruan wosama' si poow itu wéan-Na katouan akar ing kauré-uré. Taan awéan kamesé-meséaan imakawali si tou am papaté. Wo andumoro' si tou mengaéma' ing kamesé-meséaan tanu siitu, ra'ica icuaku sapaoka kita musti sumombayang torona i tou itu. 17Pakasa eng kaléwo-léwo'an itu kamesé-meséaan, taan awéan kamesé-meséaan si ra'ica imakawali sé tou am papaté.

18Kailekanta sa pakasa in tou sé imamualio toya-toyaang i Amang Kasuruan, séra ra'io ka'i mengéma-ngéma' ing kamesé-meséaan, ampa'paan séra pakaloindongen i Toyaang i Amang Kasuruan. Wo taniitu si kikiiten é sétang ra'ica makawoo méma' sapa-sapa ai séra. 19Kailekanta sa kita anio' asi Amang Kasuruan owo, wo pakasa sé ang kayo'baan anio' pakakawasaan i kikiiten é sétang. 20Kailekanta ka'i sa si Toyaang i Amang Kasuruan imayo wo mééo ing kakailekan ai cita wosama' katuusanta si Amang Kasuruan si Wutul. Wo kita menonou meesao wo si Amang Kasuruan si Wutul itu, ampa'paan kita esa wo si Toyaang-Na Yesus Kristus. Si Yesus itu Kasuruan si Wutul wo Siake' e méma' sé tou ro'na menonou akar ing kauré-uré.

21Toya-toyaang sé icaupusku, kamu musti mareti-reti, oréoka kamu maapo' a sé opo-opo'.

Currently Selected:

1 Yohanes 5: TNT

Highlight

Copy

Compare