YouVersion Logo
Search Icon

Mbete Rɔmri 1

1
Ŋgerzah ƴo tul ɓay ye ɔh ke gelu gelu
1A bi Pɔl mgbal Mbay Zezu, ké riŋ gun nzak pihna Ŋgermbay kan tul bi. Ke mbi mi hi̧ mí mi ka-kah ɓaysuki Ŋgerzah ké si tul gun ye.
2-4Ɓaysuki gun ye-ay, Ŋgerzah wahɓayu lewsa̧ kaŋ, mí ke hi̧ gun nzak pihna yeri vbeh ɓayu ku̧ ɓil mbete ye kandɔkay :
Gun ye ra, ke ti̧h ɓa nzuk pirmatul, sa̧w mbuŋna ye ɓa som siɓa#1.2-4 Ŋgerzah za som siɓa mboh keni nzuk pirmatul. Í ki̧ Mbete Sa̧w fe 2.7 ɓay tu ɓayu.
ɓil mi̧hri Daviɗ mbay a luki.
Ke ti̧h ɓil sakra hulri ɓa nzuk pirmatul, sa̧wu ɓa Tempuki.
Ke el sɔk ni ke huhrumun ɓa gun Ŋgerzah.
A ye Ŋgermbay Zezu Gaŋ wah.
5Tumbɔl ye mí nah ziŋ lawsuki. Nah ti̧h ɓa gun nzak pihnari ké si ta̧w sa̧wnzuk a ɓoruri gbam hi̧ kú lah nzak Ŋgerzah ɓay law woyri ké te sa tul ye hi̧ riŋ Ŋgermbay mgbe. 6Mí a woiri kara i ƴo haŋsekle nzukri-aw ké riŋ Ŋgermbay Zezu kan tul woyri pi.
7Mi vah wuri, gun sana Ŋgerzahri gbam ké i kaɓ Rɔm, ké Ŋgerzah ɗi wuri ɓa sa̧w ye. Mi vah wuri ke ɗeŋ ke lawsuki ké ur ké ta̧w Bah wah Ŋgerzah, ké ur ké ta̧w Gaŋ tul feri riw a ye Ŋgermbay Zezu.
8Titil ɓay bi le, mi el ke tumbɔl hi̧ Ŋgerzah bi kpatara ke riŋ Ŋgermbay Zezu ɓay tul woiri gbam ɓay fe le, mberem kanlaw woiri ké tul ye ya̧ gelri gbam ké tusiɓa-ay. 9Ŋgerzah tu-tu, a ye ké tem bi ƴo dim ni ke nzak pihna ɓaysuki gun ye ra, ke ƴo lah goŋna bi, mi ɗi riŋ woiri ɗi kpatara. 10Mi ƴo goŋ ni dan ɔkna, ke poŋ ful hi̧ mi le, mi sí ta̧w woiri ɓáy. 11Mi tasa̧y si kó wuri ɓay mí wal fe hi̧na Tempuki a hani ziŋ wuri le, í ŋger keni. 12Kaŋ dale seh ké mi ká̧h sakra woiri le, náh so wuri haniri ɓay law wahri ké te sa tul Ŋgermbay mbew, law woiri te sa tul Ŋgermbay kandɔk a bi ké law bi te sa tul ye pi. 13Mi yih ɓay í tu wuri yi̧n biri, mi lek mun bi le, mi lek ra ɓáy ɓay si ta̧w woiri, mí kpu̧ru ka̧h aŋay, mi ziŋ si-u ya. Mi ka̧h le, mi só wuri hi̧ í leh lehna lawsuki le, mi zíŋ lehna a hani ké sakra woiri kandɔk ké mi ziŋ ké ta̧w sa̧wnzuk a ɓoruri pi.
14Mbɔl na tul bi ɓay mí puh-u. Mbɔlu ɓa sí ta̧w sa̧wnzukri gbam, ta̧w nzuk ru̧nari ke kɔk nzukri, ta̧w nzuk nun a mgbururi ke ra̧wri, mi puh-u gaŋ. 15Kandɔkaw mí mi tasa̧y sí ka-kah ɓaysuki Ŋgerzah ké si tul Ŋgermbay Zezu ra hi̧ wuri, a woiri ké i kaɓ Rɔm pi. 16Su̧hru ɓaysuki ra se mi ya. Ɓaysuki-u mí ɓa huhrumun Ŋgerzah ké hi̧ nzukri gbam ké kan law tulu el ma ta̧w ye ɓa záh woyri, gun Izarayelri a woyri ziɓri pol dara mí sa̧wnzuk a ɓoruri kara pi. 17Ɓayu ké Ŋgerzah ƴo tul ɓay ye ké-e ŋga̧h ɓa záh woyri, ketina ye ten mun ké ɓil ɓaysuki-aw. Sa̧w ŋga̧hna-u ti ké ta̧w Ŋgerzah si ka̧h ta̧w nzukri hi̧ ku ƴo ziŋ ni kandɔk kú-u vbeh lewsa̧ ɓahri, nzuk ké ƴo tul sal in ké Ŋgerzah ŋga̧h ziŋ ni ɓa záh ye le, sa̧w ɔkna nzuku ɓa law mbew ké ɗɔr sal in ya#1.17 Ɓayay na ɓil Mbete Habakkuk 2.4..
Kehrna nzuk pirmatulri a sa̧w mbuŋna a som siɓa ta-a, gbam sɔɓ fal ti Ŋgerzah
18Haŋ fa̧hna Ŋgerzah ten mun ké nunmbam gi ka̧h tusiɓa da, mí na tul fe laɓna nzuk pirmatulri kú-u poŋ ni ɓa záh woyri. Hȩ́k ni ta-a. Ku poŋ ni, ku el gɔɓrɔ ketina ɓil kuŋɓay woyri. 19Keni-aw gbam, nzuk pirmatulri mah tu Ŋgerzah ɓa teh-u ɓay fe le, Ŋgerzah mí hi̧ niri ku tu ni. 20Ur ke sew-laɓ nunmbam ke tusiɓa kaŋ mí nzuk pirmatulri ko ni ke nun ya kara, ku ƴo ko ŋgerna ye ké na ɓa ŋgɔh ɓay feri ké-e laɓ, ku ƴo ko riŋ ɗina záh ye ɓa teh-u ɓay fe-uri pi, mí ku mah tu ni keni, sɔk ɓahri, mahful ya̧m mun woyri ta-a. 21Ku tu Ŋgerzah tu, mí dimna le, ku sa dim ni ɓa záh woyri ya. Ku sa el ke tumbɔl hi̧ ni ya pi. Bale kerɓay woyri na kpo̧k hi̧ ku ti̧h suk ya. Law woyri sih nduŋ ke kɔk ɓay. 22-23Ku ɗi mun woyri ɓa nzuk ru̧nari, mí ku ti̧h ɓa kɔkɔri dara mí ku mboh fe tem záhri ké ba hani ke nzukri ké ɓay pu-puŋ#1.22-23 Ɓay fe tem záh feri ke fe ké ba hani le, í mgba Mbete Sa̧w fe 1.22-25 ke Mbete Siŋ (Psaumes) 106.20 tuh ke gel ki̧na-ay., nayri, gundoyri, fe kuhru ke selhaŋri soh keni gel dimna Ŋgerzah a ye Ŋgɔhnzuk.
24Wara mí Ŋgerzah poŋ nzuk pirmatulri hi̧ ku laɓ fe kandɔk ké law woyri yih. Ku mbi mun woyri laɓ fe-se su̧hru keni ké haŋsekle haniri. 25Ku el kom ketina Ŋgerzah ke kuŋɓay. Ku hȩk feri ké-e laɓ, ku el dim fe-uri poŋ ni ye Nzuk-laɓ fe-uri-aw ké-e mah pirna sew ke sew gelu munu. 26Sa̧wu mí Ŋgerzah poŋ nzuk pirmatulri rih ɓil fe laɓna su̧hru woyri kandɔk ké law woyri tasa̧yu. Wu̧yri poŋ sa̧w fe laɓna woyri, ku kom ná ke wo̧rori el na ke haniri wara. 27Wo̧rori ba, poŋ sa̧w fe laɓna woyri. Ku kom ná ke wu̧yri el na ke haniri. Ɗaka ná ke wo̧ronzuk mbaŋ woyri mí se niri. Wo̧ronzuk ke wo̧ronzuk ƴo laɓ fe-se su̧hru, mí ku ƴo ziŋ kpaŋndɔk fe laɓna-reh ful woyri keni.
28Kandɔk ké nzuk pirmatulri sa tu ni ɓa Ŋgerzah ya ra, ke poŋ niri ku dih fal kɔk kerɓay woyri, mí ku ƴo laɓ fe ké mah laɓna ya. 29Sam fe laɓna a pipiri-uri ɓoɗ ɓoɗ gbam mbah law woyri : póŋ wahɓay, law a sih-u, kó nun fe, láɓ suya. Ku mbah ke sere, í hul, ɓala, kér law, gak law, láɓ nani. 30Ku ƴo mbi riŋ haniri, ku fu̧y Ŋgerzah, ku pahra nzak, ku hu̧h tul, ku gar ɓay, law woyri ƴo ker ɓay laɓ suya, ku poŋ ɓay nzuk-mbuŋ niri. 31Kerɓay woyri na kpo̧k, ku sel wahɓay woyri. Mgbá in ta-a, kerseh ta-a. 32Ku tu salɓay Ŋgerzah tu-tu. Ku tu ɓahri se, nzukri ké laɓ sam fe a kandɔkawri mah hul, mí ku ƴo tul laɓu kaŋto ya le, ku haŋ ndɔk hi̧ nzukri ké ƴo laɓu pi.

Currently Selected:

Mbete Rɔmri 1: SIAFNK

Highlight

Share

Copy

None

Want to have your highlights saved across all your devices? Sign up or sign in