Mbete Kolosiri 1
1
1-2A bi Pɔl gun nzak pihna Mbay Zezu kandɔk ké Ŋgerzah yih, a bi ke yi̧n wahri Timote nah vbeh mbete-ay hi̧ wuri ké i ƴo ziŋ Ŋgermbay, ké i ƴo mbu̧h hani ké Kolosi, ké i ɓa sa̧w nzuk Ŋgerzahri, ké law woiri te sa tul Ŋgermbay. Nah vah wuri ke lawsuki ke ɗeŋ ké ur ké ta̧w bah wah Ŋgerzah.
3Ɓil góŋ Ŋgerzah wah, nah el ke tumbɔl hi̧ ni kpatara ɓay tul woiri a ye ké-e ɓa bah Ŋgermbay Zezu Gaŋ wah. 4Nah lah ɓahri se, i kan law sa tul Mbay Zezu, i el laɓ law sana ziŋ sa̧w nzuk Ŋgerzahri pi. 5Kerɓay woiri na kaŋ ɓay tul suki ké ƴo geŋ wuri ké nunmbam. I lah ketina suki-aw ke seh ké i lah ɓaysuki hul Ŋgermbay. 6Ɓaysuki ra gi ka̧h wuri kandɔk tusiɓa a ɓoruri gbam. Ɓaysuki-aw ɓa mi̧hri kú-u ruh, ké ti̧h mí lehna-u ŋger, kaŋ pi mí lehna ɓaysuki ƴo ŋger ké sakra woiri ur ke seh ké i lah, ké i tu ketina lawsuki Ŋgerzah tu. 7Lehna ɓaysuki ra ŋger si ke fe firma ké Epafara firma wuri, a ye ké-e ɓa maŋlaw wah, ɓa bɔh pihna wah. Ke ƴo tul pihna Ŋgermbay ɓa kpuh-u soh gel wah#1.7 Mahful-sɔɓ sa̧w nzak a ɓoru mí na-ay : ɓay tul woiri.. 8Law sana Tempuki ké i ƴo keni ké na law woiri, ke ndazi ɓayu hi̧ na gaŋ.
9Sa̧wu mí a wah kara ur ke seh ké nah lah ɓay woiri-aw, nah yȩkre goŋ Ŋgerzah ɓay tul woiri ya. Nah ƴo vbi ni, ké hi̧ wuri í tu fe ké-e yih ra ka̧h gbu̧h-u ɓil ru̧na a Tempuki pi, ɓil goso fe tuna a Tempuki pi 10hi̧ í si siŋ sina ké si ke riŋ Gaŋ tul feri riw. Sam siŋ sina-aw mí Ŋgerzah ya̧ ke law rihna. Ke fe laɓna-awri gbam i ɓa nzukri ké leh lehna a suki, ké tu Ŋgerzah ma pol pol ɓa teh-u. 11Ke fe laɓna-awri gbam i ziŋ ŋgerna ké si mbew ke huhrumun riŋ ɗina Ŋgerzah ra, i su̧h law, i ik law dara mí 12i el ke tumbɔl ke law rihna hi̧ baah a ye ké-e sɔɓ wuri ti̧h ɓa gun gel tehnari ké mah ya̧ fe ye ké-e mbek geŋ sa̧w nzuk yeri gbam pi. Nah ƴo vbi ni kaŋ.
13A ye ké-e ten na ke ndɔk záh tirim, ke loh na gi ɓil lák mbay gun sana ye.
14A ye gun sana ra ke soh tul wah sel na ké ndɔk hul. Salɓay suya ké mgba tul wah lu da.
15A ye ké nzuk ko ni ke nun ra, ke ba Ŋgerzah ké nzuk ko ke nun ya ɓa fe tem mun Ŋgerzah.
Ke ɓa gun pol ké tul feri gbam ké Ŋgerzah laɓ.
16Ɓay fe le feri gbam ƴo le, ƴo ɓay gun ra,
feri ké ƴo nunmbam ke feri ké ƴo tusiɓa gbam,
feri ké nzuk ko ke nun ke feri ké nzuk ko ke nun ya,
ɓa ra záh ŋgermbayri, ɓa ra záh gaŋri, ɓa ra záh mbayri, ɓa ra záh-lak mbayri.
Feri ɓoɗ ɓoɗ gbam laɓ ke ndɔk ye, mí ɓay el ma ta̧w ye.
17A ye ra, ke ƴo ri pol hi̧ feri gbam. Feri gbam ƴo kaɓ ɓay tul ye.
18A ye ra, ke ɓa tul sa̧w in Ŋgermbay, ku ɓa mun ye.
Ke ɓa sa̧w woyri. Ke ɓa gun pol ké ti̧h ɗekrekrek ké sakra hulri, ke ƴo ke titilu hi̧ feri gbam.
19Ɓay fe le law Ŋgerzah na sa tul ye hi̧ mun ye ya̧ mun gun pol ra ɔh gbam,
20law ye na sa tul ye ɓay mgba nzak nzaw ziŋ feri gbam ké tusiɓa, ké nunmbam ɓay gun. Mí feri gbam el ma ta̧w gunu.
Ke sem ye ké ku̧ tul kpuh vbatay mí ɗeŋ gi tul feri gbam ké-e laɓ.
21A woiri kara lewsa̧ sa̧w woiri na ɓoɗ, i ɓa nzukbaa ɓay tul kerɓay woiri ké ɓil fe laɓna a pipiri-uri. 22Mí aŋay ba, ke haymun ye ke mgba nzak nzaw ɓay hul ye hi̧ i ƴo pol ye ɓa sa̧w ye, hi̧ i ɓa fe ké ndɔh ké nun ye, hi̧ sék wuri ta mba. 23Mgbá nzak nzaw ra le la-laɓ gaŋ. Dale law woiri ké ɓar sa̧w ɓa kpuh-u tul kanlaw ra í ƴo tulu ɓa ketina. Suki ké i ƴo geŋu ur ke seh ké i lah ɓaysuki hul Ŋgermbay, law woiri ra ɓá laŋ ké tulu ya. Ɓaysuki kú-u ka-kah-u ɔh gelri gbam, mí a bi Pɔl mi ti̧h ɓa gun nzak pihna-u.
24Aŋay mi ƴo zay mun ɓay koseh ké Ŋgermbay ko ɓay tul woiri, mí haymun bi ɓa nzak ndɔk Ŋgermbay ké ziŋ kosehri ɓay tul sa̧w in ye kú-u na ɓa mun ye. 25Mi ti̧h ɓa gun-laɓ pihna hi̧ wuri a woiri sa̧w in ye kandɔk ké Ŋgerzah ɓaŋ kan ndɔk bi ɓay hi̧ ɓay ye ɓá laɓ ɔh. 26Sɔk ɓahri, sa̧wɓay ké-e mu̧h ke titilu da̧y ra aŋay ke ten ɓayu ké gel a teh-u hi̧ sa̧w nzuk yeri ko da. 27A woyri le Ŋgerzah yih ɓay hi̧ kú tu baw riŋ ɗina ye ké ŋgi̧ hɔtɔk hɔtɔk. Riŋ ɗina-aw ra mu̧h ɓil sa̧wɓay ké-e ten hi̧ sa̧wnzuk a ɓoruri lah, sɔk ɓahri, Ŋgermbay ƴo mbew ké mun woiri mí ɓa riŋ ɗina ké law woiri te tulu ké i ƴo geŋu. 28A ye mí nah ka-kah ɓay ye ke sam ru̧nari ɓoɗ ɓoɗ gbam. Nah ƴo hew keni nzukri gbam, nah ƴo firma nzukri gbam keni pi ɓay hi̧ nzukri gbam ké riŋ Ŋgermbay kan tul woyri, náh sɔk niri hi̧ Ŋgerzah ɓa nzukri ké ŋger ɓa gun yeri. 29Kaŋ mí-i ƴo laɓ pihna-u. Mi ƴo ruh mun ke ŋgerna ké si ke huhrumun Ŋgermbay ké ƴo ŋger mi keni.
Currently Selected:
Mbete Kolosiri 1: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
