Mbete Fe laɓna Tempuki 27
27
Sina Pɔl ma Rɔm ké tul mahmbih
1Kandɔk kú-u lek ɓay hi̧ nah si Rɔm ké tusiɓa Itali ke kumbon, ku poŋ Pɔl ke mgbal a ɓoruri ku̧ ndɔk kumandah a hani ke soze yeri. Riŋ kumandah ra ɓa Zul. A ye ke soze yeri, ku ɓa soze mbay a luki. 2Nah hil kumbon ké ur ke Adaramiti ɓay ka̧h Sidoŋ. Kumbon ra gaɓ ké ɓil mahmbih ɓa ɗih-u tɔɓ ke ɓel sew. Ku dah kumbon puh ke puh ké tusiɓa Azi. Tɔrna wah-aw, Arisitar nzuk Tesaloni ké tusiɓa Maseduwan si ziŋ na pi. 3Tipele-u, nah ka̧h Sidoŋ. Ya̧h Pɔlri ƴo ri. Law Zul rih ni ké tul Pɔl, mí ke hi̧ ni ful si ta̧w woyri. Ku mgba ni ɓa suki. 4Ké gelaw, nah ur. Nah gaɓ ke ɓel tusiɓa Siper ɓayu ké kuna nzɔh nun wah ke ŋgere. 5Nah kal ɓil mahmbih ɓel tusiɓa Silisi ke Pamfili, mí nah ka̧h Mira ké tusiɓa Lisi. 6Ké gelaw, kumandah ziŋ kumbon ké ur ke Aleksandere ƴo si ma Itali. Mí ke fa̧h na ku̧ ɓilu. 7Nah si ɗaka ɗaka ɓay kuna ké nzɔh nun wah laɓ namri ɓa ŋgi̧-u. Nah kah rohna dara mí nah ka̧h Kinidi. Kuna ké nzɔh nun wah ra, nah si ɓa ndaru ya, nah ra̧h ti̧h ɓel Salmoneh ké tusiɓa Kereɗ. 8Nah si ke ɓel Kereɗ kpu̧ru kpu̧ru mí nah ka̧h gel-dah kumbon ké puh a hani ké riŋu ɓa Gel-dahna a suki. Puh-u na ɗih ya ke puh a ɓoru ké riŋu ɓa Lase. 9-10Nah laɓ nam ŋgi̧-ŋgi̧ ké tul mahmbih. Nam saŋ mbih-lu suya ziɓri kara, kal da. Fal namaw, mahful sí gahru ké tul mbih ta-a, ɓay kuna ké ku mbamba. Mí Pɔl hew niri ɓahri : « Nzukayri, mi ko ɓahri, sina wah-ay ɓay kpuh mbamba. Fe suknari ke kumbon mbɔk ɓay ɓeɓu. Mí ta ɓa feri-aw kaŋto ya. Le a wah kara, nah zíŋ ɓeɓna pi. »
11Mí kumandah ya̧ ɓay nzuk-hehre kumbon ke ɓay nzuk kumbon poŋ ɓay Pɔl. 12Gel-dah kumbon ra mah ɓaŋ kumbon kan ri ke few kuna a yi̧ŋ mbamba ya. Ŋgi̧na nzukri ké ɓil kumbonaw lek ɓay tɔr si Fenik, gelke mahful ƴo ri ɓay kaɓ ri few kuna a yi̧ŋu-aw. Puh-u ɓa gel-dah kumbon a hani ké tusiɓa Kereɗ ké nzaku sɔɓ ma fál ɓel ɓil seh a fál ndɔk kperu nzuku a riŋ seh ke fál ndɔk lakna nzuku a riŋ seh. 13Kuna ur ke ɓel ɓil seh a fál lakna ku feehl bale, ku ker ɓahri, lekɓay woyri laɓ da. Ku sel kumbon, mí ku gaɓ ke ɓel tusiɓa Kereɗ. 14-15Zah bale, kuna a bawu ur bivbiɗ ké ɓel ɓil seh a fál ndɔk kperu nzuku a fál tí̧h seh ku bivbiɗ bivbiɗ sɔkrɔ kumbon ɓa ɗih-u ke tusiɓa. Ku ɗi sam kuna-u ɓa Urakuloŋ. Nzuk-hehre kumbonri ta̧h vana hi̧ nzak ho̧k kumbon ɓá nzɔh nun kuna kpu̧y, mí ku poŋ kuna sɔkrɔ kumbon kandɔk ké-e yih. 16Mí nah kal ké ɓel tusiɓa a hani ké haŋsekle mahmbih ké riŋu ɓa Koda. Tusiɓa-aw kuŋ kuna ndi̧, gun kumbon ké baw kumbon kɔklɔ dih fal ye-aw zɔklɔ fe. Kaŋ mí nah ruh mun wah ɓa ŋgi̧-u, nah kɔklɔ gun kumbon hak síɓa ké ɓel baw kumbon. 17Mí nah ŋga̧h ɓa suki. Nzuk kumbonri kahra fál diŋ kumbon a bawu, ku ŋga̧h baw kumbon ɓa kpuh-u kparaŋ kparaŋ rɔkɔ ɓá ɓeɓ. Ku laɓ hȩkme si gɔ́r ké gel sikɔkre haŋsekle mbih kú-u ɗi ɓa Sirti ɓel tusiɓa Libi. Kuna ƴo zɔklɔ fe pihna kumbon ké ƴo síɓa, mí ku ɗer kan ɓil kumbon. Kuna ƴo sɔkrɔ kumbon kaŋ. 18Kuna a bawu ra toŋ laŋ na baŋlaŋ baŋlaŋ. Tipele-u, ku vbuk fe sukna a hani-uri ku̧ mbih rɔkɔ kumbon ɓá riŋ. 19Nam a sayu, nah vbuk fe pihna kumbon a hani-uri ke ndɔk wah ku̧ mbih. 20Nam ro-ro ké nah ko nun seh ya, nah ko gunwu̧y nunmbam ya pi. Kuna a bawu ba, toŋ ku ke ŋgerna hi̧ kerɓay yá̧ mun wah a ndi̧ ké toŋ kara, lu ƴoɗ.
21Laɓ nam ro-ro nzukri ké ɓil kumbon su̧ fe ya, wara mí Pɔl ur ƴo pol woyri. Ke ɓahri se : « Ya̧h biri, titilu mi sɔk wuri ɓahri, náh ur wuri ké Kereɗ ya. I ya̧ ra wuri ɓay bi le, feri ké zi ke ɓeɓna a bawu-ay ta ziŋ nari ya. 22Mí aŋay, mi ƴo sɔk wuri ɓahri se, í su̧h law woiri. Nzuk mbew ké ɓay ziŋ ɓeɓna ta-a. Sa ɓa kumbon kaŋto mí ɓay ɓeɓu. 23-24Ŋgerzah bi ké mi ƴo dim ni pih tem nzak pihna ye gi ta̧w bi ke suŋay ɓah hi̧ mi ɓahri, mí laɓ hȩkme ya. Mi ƴó pol sezar ɓay lu lakna ɓay Ŋgermbay gaŋ. Mí ko, tumbɔl lawsuki Ŋgerzah, nzukri riw ké kaɓ ɓil kumbon ziŋ mi-ay, ke yá̧ niri ɓay bi. 25Kaŋ dale ya̧h biri, í su̧h law woiri. Mi kan law bi sa tul Ŋgerzah. Fe-u ɓay laɓ kandɔk ké-e sɔk mi. 26Mí nah ɓay gɔr ké ɓel tusiɓa a hani ké haŋsekle mahmbih-ay. » Pɔl ɓah kaŋ.
27Kuna toŋ sɔkrɔ kumbon kal ɓil mahmbih suŋ boh falu niŋ. Riŋ mbih-u ké ɓil mahmbih ra ɓa Adiri. Haŋgel laɓ, mí fe na nzuk kumbonri kandɔk kú-u ɗih ya ke tusiɓa. 28Ku vbu sal-leh ɗihna mbih le, ku ziŋ ɗihna mbih ɓa metere bon say falu toŋndɔk say. Nah si tɔɓ ma pol ɓáy, ku vbu le, ku ziŋ metere bon seɗe falu toŋndɔk seɗe wara. 29Ku laɓ hȩkme ɓay rɔkɔ kuna ɓá sɔkrɔ kumbon si vba̧ haŋ kasaw gba̧y, mí ku vbuk kura niŋ ké ɓa yih-u yih-u, ké na fá-fal kumbon ɓay tuŋ diŋ mbih hi̧ kumbon ɓá dah tul mbih. Ku ƴo goŋ záh woyri ɓay hi̧ tipele ɓá teh gah, ku kó tusiɓa. 30Nzuk kumbonri yih ɓay ƴahra-u. Ku sel gun kumbon ra ɗer kan tul mbih. Ku laɓ mun woyri kandɔk kú-u yih ɓay vbuk kurari a fál pol kumbon. 31Mí Pɔl ɓah hi̧ kumandah ke soze yeri ɓahri : « Nzukri-aw kaɓ ɓil kumbonay ya le, mahful yá̧ mun woiri ɓay ta-a. »
32Bale sozeri kuŋ sal gun kumbon ra hi̧ mbih kal keni yoroŋ.
33Gel fa̧h hoh, mí Pɔl goŋ niri ɓay kú su̧ fe. Ke ɓahri : « Laɓ nam boh falu niŋ mí na-ay i ƴo tul bɔk woiri dan su̧ fe. 34Sa̧wu mí-i goŋ wuri, í su̧ fe. I zíŋ keni ŋgerna yá̧ mun woiri. Pirmatul nzuk mbew kara, ta zi ya. »
35Ke ɓah kaŋ bale, ke mbi peŋ, ke yih soko hi̧ Ŋgerzah ké pol woyri gbam, ke gɔh, mí ke titil su̧-u. 36Bale law woyri gbam voh, mí ku su̧ fe. 37Tul wah laɓ sɔɗ sɔɗ seɗe ke bon toŋndɔk say falu tɔtɔklɔ (276) ké ɓil kumbonaw. 38Ku su̧ fe mah gel ɗaka woyri, mí ku fa̧h naŋ farin vbuk ku̧ mahmbih rɔkɔ sukna ɓá yih kumbon.
39Tipele teh bale, nzuk kumbonri ko tusiɓa, mí ku tu ɓa tusiɓa a suŋ ya. Ku ƴo ko gel ké ɓel sew ɓay kú tu fál a suŋ mí mah hi̧ kumbon ɓá gɔr ké ri bale, ku ziŋ gel sikɔkre a hani-u. 40Mí ku sel sal kurari ké niŋaw. Ku poŋ ma ɓil mahmbih. Ku el sel fe-hehre kumbon kú-u ŋga̧h. Ku ɔr gar a ah-u ké fál pol kumbon hi̧ kuna sɔkrɔ kumbon. Nzuk-hehre kumbon hi̧ kumbon si ma gel sikɔkre ra. 41Bale kumbon ka̧h gel a hani ɓil mahmbih ké mbih uh fál seɗe dɔh sikɔkre gaŋ tul hani ndur, mí nzak ho̧k kumbon gɔr ɓil sikɔkre maŋ. Mbih su gbɔksɔ gbɔksɔ ra, toŋ vbar fal kumbon.
42Sozeri lek ɓay i mgbalri rɔkɔ ku uh mbih le, kú ɗuk. 43-44Mí kumandah yih ɓay ya̧ Pɔl. Ke gboh niri laɓ fe kú-u lekaw. Ke hi̧ nzuk a a̧yri ké tu uh mbih tu zo toh mbih pol. Ku uh mbih, ku ka̧h tusiɓa dara mí tɔr nzuk a ɓoruri gi fal ɓáy. Nzuk a haniri mgba palaŋse. A ɓoruri ba, mgba kpuh kumbon ké haw. Kaŋ mí gbam wah, nah ka̧h keni tusiɓa ɓa suki.
Currently Selected:
Mbete Fe laɓna Tempuki 27: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
