Mbete Fe laɓna Tempuki 23
23
1Pɔl ko gel ma nun ŋgernzuk-kuŋ salɓayri ra, ke ɓahri : « Bah biri ke yi̧n biri, mi hȩk Ŋgerzah dan reh ful kpu̧ru ka̧h guri-ay. Ɓay mbew lu law bi ya. »
2Ananiya ŋgernzuk fe puhna Ŋgerzah sɔk nzukri ké ƴo ɓel Pɔl, kú vba̧ nzak ye. 3Ku vba̧ ni dale, Pɔl ɓah hi̧ Ananiya ɓahri : « Nzuk foh. A wo mí Ŋgerzah ɓay vba̧ mu. Mu kaɓ gel kaɓna nzuk-kuŋ salɓay, mu mbi bolkusol mbete Ŋgerzah ɓay kuŋ salɓay tul bi wa, ani mú-u to bolkusolu ma fal, mu ɓahri, ku vba̧ mi ley ? »
4Nzukri ké ƴo ɓel ye ɓahri : « Ŋgernzuk fe puhna Ŋgerzah mí mu ko gel gbak gbak ma nun ye-aw le ? »
5Mí Pɔl yih nzak woyri ɓahri : « Yi̧n biri, mi tu ra ni ɓa ŋgernzuk fe puhna le, mi ta far ni ya. Ɓay fe le, mbete Ŋgerzah sɔk ɓahri, í mgba nazi ku̧ tul ŋgernzuk woiri ya#23.5 Ɓayu na ɓil Mbete Exode 22.27.. »
6Pɔl tu ɓahri, ké sakra ŋgernzuk ziɓri-aw, nzuk a haniri ɓa sadusiri. A ɓoruri ba, ɓa fariziri, mí ke ɓah ɓay ɓa mgbe-u hi̧ niri ɓahri : « Yi̧n biri, a bi ra, mi ɓa farizi, mi ɓa gun fariziri gaŋ. Ɓayu ké mi ɓaŋ law bi te tul ti̧hna záhri ke pa̧ymun a foyu, mí ku mgba mi-ay. »
7Ke ɓah kaŋ bale, baw fahɓay ur gal gal ké sakra fariziri ke sadusiri, mí ku kehr hani gel seɗe. 8Sadusiri ra ƴo ɓahri, nzukri ta ti̧h ke pa̧ymun a foyu ya. Ku ɓahri, záhri ta-a, tem nzak pihnari kara ta-a pi. Mí fariziri ba, ɓahri, feri-aw gbam ƴo ri. 9Fahɓayu seh ma pol pol ke ŋgere ŋgere, mí nzuk-sɔk mbete bolkusol Ŋgerzah a haniri ké ɓa fariziri ur. Ku ɓah ɓay ke wo̧ro wo̧ro ɓahri : « Nah ko fe suya-u a hani mbew ké ta̧w gun wo̧ro-ay ya. Ko ya le, tem nzak pihna mini záh mí ɓah ɓay hi̧ ni-ay. »
10Fahɓayaw ŋger mbamba, nzukri ur ɗoŋ ni, mí hȩkme laɓ ŋgernzuk kumandah ɓay rɔkɔ ku gɔh Pɔl mbeɗek mbeɗek, mí ke sɔk sozeri rih sakra nzukri. Ku ten Pɔl ké ndɔk woyri, ku el ziŋ ni ma gel kaɓna sozeri.
11Suŋaw, Ŋgermbay, Gaŋ tul feri riw ti̧h nun Pɔl. Ke sɔk ni ɓahri : « Pɔl, mú su̧h law. Tehɓay bi ké mu ɓah ké Zurusalemay, mah ɓay mú si ɓah ké Rɔm, puh kaɓna mbay kaŋ pi. »
Lekɓay i Pɔl ke sina ye ma Rɔm
12Ziɓ a haniri mbu̧h ke tipele-u, ku lek ɓay. Ku hah mun woyri gbaɗ gbaɗ ɓahri, ku ta su̧ fe ya, ku ta nzo fe ya kpu̧ru mah nam ké ku í Pɔl. 13Nzukri ké mbu̧h nzak mbew ɓay i ni-aw, tul woyri kal bon niŋ kal. 14Ku si ta̧w ŋgernzuk fe puhnari ke ŋgernzuk ziɓ a haniri. Ku sɔk niri ɓahri : « A wah, nah hah mun wah gbaɗ gbaɗ ɓahri, nzak wah ta za fe a hani ya kpu̧ru mah nam ké nah í Pɔl. 15Kaŋ dale í pih si ta̧w ŋgernzuk kumandah ke riŋ ŋgernzuk-kuŋ salɓayri ɓahri, kú ten Pɔl gi hi̧ wuri ɓay í fakla sa̧wɓay ye ɓáy. A wah, nah lek mun wah ɓay i ni dan ké ka̧h ta̧w woiri. »
16Gun nah Pɔl lah ɓay ndaw kú-u hɔl ɓay tul nah ye bale, ke si gel kaɓna sozeri, mí ke si sɔk Pɔl ɓay ra. 17Pɔl ɗi kumandah gi. Ke ɓah hi̧ ni ɓahri : « Kumandah, í maŋ wuri gun seke-ay si ta̧w ŋgernzuk woiri. Ke ƴo ke ɓay, ɓay sɔk ni. »
18Mí kumandah ra maŋ ni si ta̧w ŋgernzuk woyri. Ke ɓahri : « Mbay, Pɔl ké ɓa mgbal ra, ɗi mi. Ke sɔk mi, mí maŋ gunay gi keni ta̧w woiri. Ke ƴo ke ɓay, ɓay ɓah hi̧ wuri. »
19Ŋgernzuk kumandah mgba ndɔk gun ra, ku loh tɔɓ ké ta̧w nzukri, mí ke vbi ni ɓahri : « Ɓay fe mú-u yih sɔk mi le ? »
20Ke yih nzak ye ɓahri se : « Bah bi ziɓri lek ɓay gi vbí wuri ɓay í ten Pɔl pele hi̧ ŋgernzuk-kuŋ salɓay woyri ɓahri, ku yih lah tehɓay ye ra ɓáy. 21Mí í ya̧ wuri ɓay woyri ya. Ku hɔl ndaw geŋ ni ɓay i ni. Ku kal bon niŋ kal. Ku hah mun woyri gbaɗ gbaɗ ɓahri, ku ta su̧ fe ya, ku ta nzo fe ya kpu̧ru mah nam ké ku í ni. Ku lek mun woyri da. Ku geŋ ɓay lah nzak woiri wara. »
22Ŋgernzuk kumandah ra bak ni ɓahri, ko-ko ké sɔk nzuk a ɓoru ɓay ké-e ten sɔk ni-ay. Mí ke poŋ ni tɔr.
23Dale ke ɗi kumandahri seɗe. Ke sɔk niri, « Í mbu̧h sozeri sɔɗ sɔɗ seɗe, soze-kaɓ tul ɗeŋeri ɓa bon toŋndɔk say, soze-mgba nzawri ɓa sɔɗ sɔɗ seɗe dɔɓ tul woyri pi. Kú ƴo tul bɔk woyri ɓay tɔr si Sezareh ke sa̧wseh toŋndɔk mbew suŋ dan sɔk ɓayu hi̧ ziɓri. »
24Ke el sɔk niri, kú mgba ɗeŋe ɓay hi̧ Pɔl ɓá kaɓ ri. Kú si ziŋ ni ɓa suki hi̧ guvener Filiksi. 25Mí ke vbeh mbete kandɔkay :
26Soko guvener Filiksi, nzuk a luki. A bi Koloɗ Lisiya, mi vah wuri. 27Gunwo̧ro-ay, mi pih ni hi̧ wuri. Ziɓri mgba ni. Ku yih ɓay i ni. Mi lah, ke ɓa nzuk Rɔm bale, mi si ke sozeri rih haŋsekle woyri, mí-i ya̧ ni ké ndɔk woyri. 28Mi yih tu sa̧wɓay gohna kú-u goh ni, mí-i ɗer si ta̧w ŋgernzuk-kuŋ salɓay woyri ziŋ ni. 29Ɓay a hani ké mah i ni mini mgba ni kara, ta-a. Mi ziŋ ɓa fahɓay tul bolkusol woyri kaŋto. 30Mí-i el lah ɓahri, ziɓri lek ɓay i ni. Sa̧wu mí-i takra pih ni ma ta̧w woiri. Mi sɔk nzukri ké goh ni ra, kú si sek ni ma ta̧w woiri.
Ɓay bi ɔh da.
31Kandɔkaw mí sozeri lah bolkusol ŋgernzuk woyri. Ku maŋ Pɔl ke suŋaw gaŋ si ka̧h Antipatiri#23.31 Salful ur ke Zurusalem si Antipatiri mah hani ke salful bon ndiɓi falu toŋndɔk say.. 32Tipele-u, sozeri ké si ke bɔk el ma gel kaɓna woyri ké Zurusalem. Soze-si ke ɗeŋeri ba, si ziŋ ni ma pol. 33Ku ka̧h Sezareh, ku hi̧ guvener mbete ra, mí ku poŋ Pɔl ndoh ndɔk ye. 34Ke ki̧ mbete ra, ke el vbi Pɔl, sa̧w puh ye. Mí Pɔl sɔk ni, ke ɓa nzuk tusiɓa Silisi. 35Bale ke ɓahri : « Nzuk-sek muri ɓá ka̧h dara, mí fakla ɓay wo ɓáy. »
Ke el sɔk soze yeri ɓá kɔr Pɔl ké ɓil kerpuh ké Mbay Eroɗ a titilu mboh.
Currently Selected:
Mbete Fe laɓna Tempuki 23: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
