Mbete 1 Piyer 2
2
1-2Kandɔk ké i poŋ sam fe laɓna suyari ɓoɗ ɓoɗ gbam kandɔk nzak rɔkna, mú̧h ketina, láɓ law si̧hna, mbí riŋ mbaŋ woiri dale, í na ɗaka ɓay a ketina ɓa pam nzona woiri kandɔk gun nzak pamri ké na ɗaka nzo pam kaŋ. Le i hú̧h keni ɓa nzuk pirmatulri ké ɓay ziŋ pa̧ymun a foyu ké ɔ-ɔkna ɓa ŋgɔh, 3a woiri ké i leh ke nzak rim woiri, i tu ɓahri, Gaŋ tul feri riw su-su#2.3 Ɓayay na ɓil Mbete Siŋ (Psaumes) 34.9., 4mí i gi wuri ké ta̧w ye, a ye ke ɓa kasaw ké ɔ-ɔkna, mí nzukri poŋ kan kpah. Ŋgerzah ba, mbi ɓa kasaw a kpakpaŋu mah mboh vul ye#2.4 Mahɓayu na ɓil Mbete Esaïe 28.16 ke Mbete Siŋ (Psaumes) 118.22,23..
5A woiri kara i ɓa kasaw ké ɔ-ɔkna pi. I ƴo ka̧y tul hani ɓa vul Tempuki, sa̧w záh woiri mbew. I ɓa nzuk kani Ŋgerzah ɓay í mbi mun woiri ké ɓa gel ƴona Tempuki ra hi̧ Ŋgerzah. I ɓa fe puhna ké rih law Ŋgerzah rih ɓay tumbɔl Ŋgermbay Zezu#2.5 Ɓay vul kani ké Ŋgermbay ƴo mboh-u, í ki̧ Mbete Efezeri 2.20, Mbete Za̧h 14.1-2, Mbete Matiye 16.18.. 6Ɓay fe le mbete Ŋgerzah mbu̧h tul ɓayu ɓahri :
Mú ko, mi mbi kasaw kan ké Siyoŋ # 2.6 Siyoŋ ɓa tul kasaw kú-u mboh ri vul kani Ŋgerzah..
Kasaw ra ɓa mah kasaw-mboh diŋ vul a kpakpaŋu.
Nzuk ké kan law sa tul kasawu le, su̧hru ta se ni ya gaŋ.
7A woiri ké i kan law sa tul ye le kasawu ndɔh ké nun woiri ndɔ-ndɔh.
Nzukri ké saŋ kasawaw ba,
kasawu mí el ti̧h ɓa mah kasaw-mboh diŋ vulu,
kasaw ké nzuk-mboh vul kani Ŋgerzahri poŋ kan kpah ra,
8 ɓa kasaw-ɓe bɔk,
ɓa kasaw lihna # 2.8 Ɓayay na ɓil Mbete Esaïe 28.16 ke Mbete Siŋ (Psaumes) 118.22.,
a woyri kú-u kan law tul ɓay Ŋgerzah ya.
A a̧w mí lek ɓay tul woyri. 9A woiri ba, Ŋgerzah lu wuri ɓa sa̧w ye, i ɓa sa̧wkani ké riŋ ɗina mbay ɗi tul woiri, law woiri pu ɓa sa̧w Ŋgerzah, i ɓa sa̧wnzuk ké-e ko kona ma tul woiri#2.9 Piyer ƴo mbi ɓay ké Ŋgerzah ɓah si tul gun Izarayelri lewsa̧ mí tuh ke nzukri ké kan law sa tul Ŋgermbay. Í ki̧ Mbete Esaïe 43.20-21 ke Mbete Exode 19.6 ɓay lah-u. ɓay hi̧ suki ye ɓá ten mun ké sakra woiri hi̧ nzukri ko a ye ké-e ɗi wuri ti̧h ke tirim si rih gel tehna ye ké teh gberere. 10A woiri, lewsa̧ i ta ɓa sa̧w Ŋgerzah ya, mí aŋay, i ɓa sa̧wnzuk ye. A woiri ra, lewsa̧ law in Ŋgerzah ɗih ziŋ wuri ɗi-ɗih, mí aŋay, ke mgba in ziŋ wuri#2.10 Mahɓayu na ɓil Mbete Osée 2.25..
11-12Gun sanari, mi ƴo hew wuri, a woiri ké i ɓa nzuk a gi-uri, ké i ɓa gahruri ké tukala-ay, í poŋ fal tasa̧y fe laɓna tukalari ké ƴo ruh ŋgermu ziŋ wuri ma fal ɓay hi̧ sa̧wnzuk a ɓoruri ɓá ko siŋ sina woiri a suki. Mí ku ƴo ra mbi riŋ woiri ɓa nzuk-laɓ sa̧nari kara ku hekre fe laɓna suki woiri le, ku pír riŋ Ŋgerzah ke nam gina ye.
Mahful-dim nzukri ɓay hi̧ riŋ Ŋgerzah mgbe
13Í hȩk wuri ŋgernzuk tusiɓari ɓay riŋ Gaŋ tul feri riw kandɔk mbay tusiɓa ke riŋ ɗina ye, 14guvener-ri kú-u ɓa gun nzak pihna Gaŋ tul feri riw kara pi. Ku ƴo kuŋ salɓay tul nzuk-laɓ suyari, ku ƴo pir nzuk-laɓ sukiri. 15Kaŋ mí Ŋgerzah yih ɓay í laɓ suki rim keni kɔk ɓay ɓahna kpo̧k nzukri. 16I ɓa gun puh lakna Ŋgerzah ɓay mbi riŋ ɗina gun puh-aw laɓ keni fe rɔɗ rɔɗ ya. Le i ɓa mgbal Ŋgerzah.
17Dale í dim wuri nzukri gbam : í mgba yi̧nri ɓil Ŋgermbay ma law, í hȩk wuri Ŋgerzah, í dim wuri mbay tusiɓa woiri pi. 18A woiri mgbalri, í ɗiŋ tul hi̧ bahgaŋ woiri. Í hȩk bahgaŋ a sukiri ké sa wuri kaŋto ya, mí bahgaŋri ké ƴo kpuh ziŋ wuri kara pi. 19Ku laɓ wuri koseh, mí i su̧h law ɓilu ɓay law woiri ké te-teh ké pol Ŋgerzah le, ɓa lawsuki Ŋgerzah munu. 20Gelke ku vba̧ wuri ɓay tul kpuhna woiri, mí i su̧h law wa, pirna fe mí ƴo ri le ? I ko seh ɓayu ké i laɓ suki, mí i su̧h law ɓilu le, a a̧w mí ɓa lawsuki ké i ziŋ ké ta̧w Ŋgerzah munu.
21Sa̧wu mí ɓa riŋ ɗina woiri. Ɓay fe le Ŋgermbay ke mun ye gaŋ ko seh ɓay tul woiri, mí ke sɔk wuri mahful koseh ye ɓay í mbi ziŋ ni#2.21 Ɓayay si mah hani ke gel ki̧na Mbete Matiye 16.24-26..
22 A ye ra, suya ta ta̧w ye ya,
nzak rɔkna ti̧h ké haw ye ya pi.
23 A ye ra, ku far ni, mí ke el ke farna ya,
ku laɓ ni koseh, mí ke el ke ɓay a se-u ya.
Le ke poŋ mun ye hi̧ Nzuk-kuŋ salɓay a ketina.
24 A ye ra, ke hi̧ nazi hul ké mgba tul wah ɓay suya wah ta ni ye, ke hu soh bol wah ké tul kpuh ɓay hi̧ a wah ké suya wah hu poŋ na-aw náh ka-kaɓna mbew ke Ŋgerzah ɓa záh wah. Ɓay ye ɓah kandɔkay : Vba̧nari ké hi̧ mun ye te ɓutuk ɓutuk ɓa no̧k mí gah wuri, 25ké i zi wuri kandɔk samiri, mí aŋay, i el wuri gi ta̧w nzuk-hɔl sami, a ye nzuk-ko tul woiri#2.25 Ɓayuri ké gel ki̧na 22-25 na ɓil Mbete Esaïe 53.4-9 ke Mbete Ézéchiel 34.11-13..
Currently Selected:
Mbete 1 Piyer 2: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
