Тімотеге 1-хат 4

Қате ілімдерден сақтанып, Мәсіхтің ізгі қызметшісі болу

1Құдай Рухы: «Соңғы дәуірде#4:1 Яки: Осы заманның аяғында (Жақ 5:3; Елш 2:17). кейбіреулер сенімдерінен бас тартып, жалған рухтарға құлақ салып, жындар үйреткен ілімдерге еретін болады», — деп анық айтады. 2Осындай ілімдер ар-ұжданнан әбден безген,#4:2 Немесе: ар-ұждандары «ыссы темірмен күйдірілгендей» сезімсіз. екі жүзді өтірікшілер арқылы тарайды. 3Олар: «Үйленуге және белгілі бір тағам түрлерін жеуге болмайды!» — деп үйретеді.#4:3 Бұны үйрететін «білімпаздық» деп аталған қате ілім туралы хаттың алдындағы «жазба туралы мәліметті» қараңыз. Алайда сол тағамдарды Құдай Өзіне сеніп, шындықты білетіндердің шүкірлік ете отырып жеулері үшін жаратты. 4Құдай жаратқандардың бәрі де адал; шүкірлік етіп қабылданған тамақтарға тыйым салуға болмайды.#4:4 Немесе: шүкірлік етіп Құдайдан қабылдаған еш нәрсе де арам емес (Жар 1:31; Заң 32:4; Рим 14:14,20; Қор1 10:23,25). 5Олар Құдайдың сөзін оқып, Оған сиынуымыз арқылы Оған бағышталып адал#4:5 Яки: қасиетті (Елш 10:11-16). болады.

6Осы нұсқауларды бауырластарға білдіріп, сеніміміз туралы сөздерден, ұстанған игілікті ілімнен нәр алсаң, онда Иса Мәсіхтің ізгі қызметшісі боласың. 7Сол бір кексе әйелдердің бос аңыздарынан бойыңды аулақ ұстап, Құдайға ұнамды жүруге жаттыға бер. 8Денені шынықтырудың біраз пайдасы бар, ал Құдайға ұнамды жүру барлық жағынан да пайдалы: Құдайдың уәдесі бойынша ол осы және болашақ өмірде де игілікті. 9Бұл — дәл айтылған шынайы сөз; оны түгелдей қабылдау қажет. 10Біз барлық адамдардың құтқарылуын қалайтын әрі Ізгі хабарға сенушілердің бәрін құтқаратын мәңгі тірі Құдайға сенімімізді арттық. Сол себептен жан сала еңбек етіп қорлыққа төзудеміз.#4:10 Немесе: еңбек етіп күресудеміз.

Қауымға үлгі болып, кеңес пен тәлім беру міндеті

11Осыларды нық уағыздап үйрет. 12Ешкімнің де өзіңді жас деп менсінбей қарауына жол берме. Қайта, сенушілерге сөйлеген сөзің, мінез-құлқың, сүйіспеншілігің, сенімің және пәктігіңмен#4:12 Немесе: сүйіспеншілігің, (рухың,) сенімің және пәктігіңмен. үлгі бол. 13Мен барғанша Киелі жазбаларды оқып беріп, насихаттап сенімдерін нығайтып, тәлім берумен айналыса бер. 14Қауым жетекшілері сенің үстіңе қолдарын қойып бата берген кезде Құдайдың Рухы білдірген хабарымен саған сыйлаған рухани дарынын елемей жүрме! 15Осыларды орындап, өзіңді соған арна; бәрі де бұдан сенің алға басуыңды көре алсын. 16Өзіңе де, үйретіп отырған іліміңе де мұқият ықылас аудар. Осыларды ұдайы атқара бер, сонда өзіңді және тыңдаушыларыңды күнәнің ықпалынан аман сақтайтын боласың.

Currently Selected:

Тімотеге 1-хат 4: КК 2010

Highlight

Copy