MOEKLESIA 12
12
1O mpe o hopole Mmopi wa hao matsatsing a botjha ba hao, ho eso ho tle ditshiu tsa tlokotsi, ho eso ho fihle le dilemo tseo ka tsona o tla re: Ha ke sa kgahliswa ke tsona; 2ho eso ho fifale letsatsi le lesedi, kgwedi le dinaledi; le maru a eso ho latele pula; 3ho eso ho tle tsatsi leo balebedi ba ntlo ba tla thothomela, le banna ba dinatla ba tla kobama, le basadi ba silang ba tla ema, ka ho re, palo ya bona e fokotsehile, le basadi ba tadimang ka difensetere ba tla fifatswa, 4le mamati a menyako a tla kwalwa ka nqa kantle; mohla modumo wa lelwala o tla fokola, mohla ho tla tsohuwa ha ho lla dinonyana, mohla ho tla kgathala dikgeleke kaofela;
5mohla batho ba tla tshaba ho ya dinqalong tse phahameng, mme ho tla tsamauwa ditseleng ka ho tshoha; mohla amanda e tla palesa, le tshitwe e tla kgathatsa, le dijo di tla kgobohela motho, hobane o se a ikela tlung ya hae e sa feleng, mme balli ba potoloha lepatlelong; 6mohala wa silefera o eso ho khaolwe, lampi ya kgauta e eso ho shwe, nkgo e eso ho thuhwe mohloding, lebidi le eso ho pshatlelwe sedibeng, 7lerole le eso ho kgutlele leroleng, moo le tswileng teng, moya o eso ho kgutlele ho Modimo o neng o o nee.
8Lefeela la mafeela, ho bolela Mmoledi, tsohle ke lefeela!
Kakaretso ya ditaba.
9Mmoledi o ne a le bohlale. A boela a ruta setjhaba ho hlalefa, a botsisisa, a batlisisa, a lokisa dipuo tsa maele tse ngata. 10Mmoledi o nnile a phehella ho fihlela dipapiso tse kgahlehang, mme tse ngodilweng ka ho loka ke taba tsa nnete. 11Mantswe a ba bohlale a jwaloka ditsenene, maele a bokeletsweng a jwaloka dipekere tse kgokgothetsweng; ke a filweng ke modisa a le mong. 12Oho mora ka, elellwa, etswe dibuka tse ngata tse etswang di sa fele, mme ho ithuta ka ho tlodisa ho kgathatsa mmele.
13Bofello ba taba tseo kaofela ke jona: Tshaba Modimo, o boloke ditaelo tsa wona, hobane, ke yona tshwanelo yohle ya motho; 14hobane Modimo o sa tla isa mesebetsi yohle kahlolong, le tse patilweng kaofela, leha e le tse ntle, leha e le tse mpe.
Currently Selected:
MOEKLESIA 12: SSO61-SO
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1961. Used with permission. All rights reserved.