Rommi 7
7
Külakupu pesü Kiche-piye
1Athiküzümi eno achelimiqo—ni ye nongu ayeza ithi akemiqo vilo piani—ike ayeza ye timi lakhi no xü ake dolo likhi pa shou kükagha acheni kepi mtha keshea? 2Kiche-kipiye, külave kemi totimi lakhi ye li kimi no xü ake kutólo ayeza no li kimi gholo tsüghape acheni, ikemu li kimi no thive aye, li ye li kimi gholo tsüghape achekeu yeza lono kuqhopheve cheni. 3Ike tighenguno, tsalá li kimi xü aphi lono li no kipitimi kütami sasü ashi-aji küqhave aye, li ye shupumi lakhi ke ipi cheni. Ikemu li kimi no thive aye, li ye tsüghape akeu yeza tipau lono kuqhophevae eno li no kipitimi kütami sasü külauve aye, li ye shupumi kumoe.
4Ikehu, I thiküzümi eno I chelimiqo, nongu ghí Khristo phimpi vechewo ayeza küdau ye thivea ke, tishi keu vechewo nongu ye khuu akithí lono xüputhuvea keno pa laumi shilu peniye ke, tishianguno ningu pelo Alhou ghenguno athi pithílu peniye ke. 5Kughengu ningu no kughou ashi kükaqha qholo ache keno, ayeza vechewo minemighei keu xiné hakutho keu no ningu lolo mülà acheke, ikehu ningu ye akithipu xathi pithí acheke. 6Ikemu itehi ye ayeza lono ningu kuqhophevae, kughengu ningu ye tipau lo thivae eno tipau küká kütsügha lono ipeghivae. Itehi ningu ye aqau küxü lo yèpüa keu yeza gholu keu vechewo kumo no Aghungu lono aküxü kithé xü keu lono Alhou qeluni ake.
Ayeza eno Axiné
7Tishiaye ningu ye kiu pìní kea? Ayeza ye axiné keshea? Tiye kumo pütsa! Tishiaghi namu, ayeza ghenguno ke thono ni ye axiné ye kiu keno mtha no aghíni cheke. Kughengu ni ye ayeza no, “No ye jumine kevilo,”#7:7 Ipe 20:17; Zaki 5:21 ipimo no aghí ke aye ni ye jumine keu ye kiu keno ithimoni cheke. 8Ikemu axiné no azakütsü vechewo adokivi süghi keu hu no I lolo jumine keu thowkha jeli xukutho tsüke. Kughengu ayeza küha kelo ye axiné ye aküka küha ke. 9Ghuthu lakhi lo ayeza küha no akelo ni ye xüache ke; ikemu kughou azakütsü ighive keno axiné no xü ithughive eno ni ye thive ke. 10I no phulu keu no azakütsü khikhi aküxü süghi niye shi akeno aküxü süghi nike züqhulo akithí süghive ke. 11Kughengu axiné no azakütsü vechewo adokivi süghi keu hu no I pishiqhive ke, eno azakütsü vechewo I pìthíve ke. 12Hi ghenguno ayeza ye akimthe eno azakütsü ghí akimthe, achipiu eno akivi ke.
13Imaye kiu no akivipu keno tipau ye kíshi püzü akithipu I lau süghive cheni kea? Tikumo thono! Tishiaghi namu, axiné ye axiné kepi kimchipheve nike ghenguno kiu no akivi keno tipau pesü axiné no akithí I lau süghi ke, tishianguno azakütsü vechewo axiné lhoaye ye kuchou no kiu keno pephe-piye peniye ke.
14Ningu no ithi akeu no ayeza ye Alhou lau no ke; ikemu ni ye ashilomi eno aqüaxemi shi axiné lau jesüve kemi ke. 15I no kiu shi ani keno ni ye vethalu chemoe. Kughengu I no kiu shinishi cheni keno tipau shichemoe, ikemu I no kiu shinishi chemo keno tipau shi cheni. 16Eno I no kiu shinishi chemo keno tipau shi aye, ayeza ye akivi kepi I no tipau lo pulosü tsü ani. 17Tishiaye, tiye I likhi I no shi anike kumovae, ikemu I lolo axiné xü akeu hu no shi anike. 18Kughengu I no ithi akeu no I lolo I xiné lhoaye lo pa kutoshi no akivi achemoe. Kughengu ni ye kiu no akivi keno tipau shinishiqhiyi acheni, ikemu ni ye tipau shilu chemoe. 19Kughengu I no akivi shinishi keu shichemoe, ikemu I no shinishi chemo keu küsakügha kümlà I no shi acheni. 20Ikehu, tsalá I no kiu shinishi chemo keno tipau shi aye, tiye I no kumoe ikemu I lolo axiné xü akeu hu no tipau shi anike.
21Ike ayeza no hitoi mülà akeu I no phulue: I no akivi shinishi aghí namu küsakügha shini keu kisheluve aghíe. 22Kughengu ni ye I lolo Alhou yeza lo alokiqi acheni; 23ikemu I lolo ayeza kütau ghí mülà akeu I no ithulu ani. Hipau no I lolo I kükümsü yeza sasü kichighi acheni eno hipau vechewo ni ye axiné yezaw akughumi lakhi shi acheni. 24Ni ye kiutoi keu ahasapu timi kea! Khuu no thiveniküau phimpi hipau lono I xaphelu nani kea? 25Jisü Khristo ningu Mpeu vechewo I xalu keu Lhou shikimthi!
Tishiaye, I kükümsü lo I likhi ni ye Alhou yeza qüaxemi lakhi kepi kümsülu ani, ikemu I xiné lhoaye lo ni ye axiné yeza qüaxemi lakhi ke.
Currently Selected:
Rommi 7: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
