Luk 1
STB

Luk 1

1
Kilekithitsa
1Ningu lau kiu shikupuve keno timi kutomo no tipaqo ghili yepe qhinike pükapütsajue. 2Tiye abothu lo no thebei ithuluve kemi no atsa veküpha ighikeu eno ningu lau pikibe ighikeu ke. 3Ikehu, akiqheu Theophilus, ni ye O ghengu no ni ampi no hipaqo kümtsü abothu lo no tsaqütsaleyi phujuvea eno kiu shive keno apasü shi yekithipe qhitsünikeu shi xathaluvae. 4Tishikeu vecheo I no kiu O shikavea keno tipaqo ye kuchou kepi ithipeniyeke.
John Baptiz Punu Ghili
5Herod no Judea ghakhu lo akükau shi ake ghuloki lo achinemi lakhi Zachariah ipikeu ache, pa ye Abijah ipikeu achinemi mqo lo akemi lakhi ke; pa nipu Elizabeth ghi Aaron#1:5 Aaron ye Moses pamu ke. lagha lo no ighi kemi ke.#1:5 1Yeki 24:1-19 6Pama kinikujo Alhou zülo achipishi xüche, eno Ampeu zakütsü ngo ayeza kümtsü kupukülai peluche. 7Ikemu pama ye anuli küha, kughengu Elizabeth ye anuhami eno pama kinikujo ighono kitemi shive ke.
8Zachariah mqo kikiphi tsalani tsalakipe kümlla ghengu no pa no Alhou zülo achineu kümla mla ae, 9achineye kiqi lo no asaqhi kelo pa shou qhibelu no pa pelo Ampeu ki lo ilo no akümllagho kipiti-a lo msüghüta pitinike kishelu. 10Kughou msüghüta kipitido tove keno, mlla nike ighi kemi kümtsü khalacheu akighini shia.
11Ampeuʼw kungumi lakhi pa lau ipeghi no msüghüta piti akeu kümllagho kipiti-a ajeu küdau puthughoa. 12Kughou Zachariah no pa ithulu keno pa ye akümsa no thüghüyive. 13Ikemu kungumi hu no pa vilo pi: “Zachariah, msa kevi lo,” O kighini chiluve tsüae, O nipu Elizabeth ye anu lakhi punu nani eno no ye pa je John kütsü lo. 14Pa punu kelo, no eno timi kutomo no alokiqi eno alokivishi nani, 15kughengu pa ye Ampeu zülo kije shi ani. Pa ye khilemu aji jeli momu aji kümkaqo peithamo nani, eno pa ye punu mphi lonomu Aghungu Kimthe no chhitoi nani. 16Pa no Israelmi kutomo panongu Lhou Ampeu lau saideighi nani. 17Pa no Ampeu züu no Elijah gholo achekeu ghungu eno aküka lo no wu nani, pa no apuh eno anu dolo külakishi süghi nani. Hekipidemiqo pelo achipiu eno alokütsü shi penike pa no shika nani timiqo pelo Ampeu ghengu no kuto apenike qhitsü nani.
18Zachariah no kungumi vilo iniju, “ni ye kishi no hiye kuchou kepi ithini kea? Ni ye kichimi shivea eno inipu ghi kitemi shivai.”
19Kungumi no pa vilo pi, “Ni ye Alhou phivi lo puthugho achekeu Gabriel ke. I pelo atsakiviu O lau pe ighi eno O pütsa penike I puwue. 20Eno itehi no ye hipau shikupu moke tsala kuto lo atsa pimla no inaqhoive nani, kughengu nono kuchou no ado achipi lo no Alhou tsa shikupuniye akeu pülümoke.”
21Tishiake dolo timiqo ye achineki khalau Zachariah khea eno pa ye kushiye ado kushuwa ngoauvea kepi akümza ae. 22Kughou pa no khalau ipeghi keno, pa ye panongu pütsa mlave. Panongu no pa ye achineki lo kungunhetsü ithulu akena ipi ithive, kughengu pa no pau kulo pesü panongu piyea ikemu atsa pimla no ae.
23Kughou pa kümla kishekhave keno pa ye aki lo idewove. 24Hipathiu pa nipu Elizabeth ye mishiluve eno li ye aqhi pungu kuto aki lo akulhoqhi auve. 25Li no pi: “Ampeu no I ghengu no mlavetsüae” eno “Kughou pa no kimiyeqhiyi keu I shou jupüku keno tipau tsala lo no timi zülo no I kukujo ikhipeve tsüe.”
Jisü Punu Nikeu Piputotsü
26Elizabeth no mishikeu aqhi tsügho shiake lo Alhou no kungumi Gabriel hape Galilee lo mishiphughi Nazareth lo puwu, 27eno pa pesü totimi athathe lakhi lau puwu. Li ye David laghami Joseph ipikeu no küsükha püa eno li je ye Mary ke. 28Kungumi no li lau ighi eno pi, “Alokivi shilo, no ye shishe müghavai! Ampeu ye O gholo ani.”
29Ikemu Mary ye kungumi no pikeu tsa chilu no shishe amlosave eno asütsa hipau kiqi ye kiu kela pi akümza ae. 30Ikemu kungumi no li vilo pi: “Msa kevi lo, Mary. Alhou mlokiqi O lau ani. 31No ye anu lakhi mishi no punu nani eno nono pa je Jisü ipi kutsü nani. 32Pa ye kije shi nani eno Alhou Akiqheu Nu ipi ku nani. Ampeu Alhou no pa puh David lakhü pa tsü nani. 33Panongu ye Jacob lagha lo no ighikemiqo ke eno tipau kükaphu ye khilemu ashekha shimo nani.”
34Mary no kungumi vilo iniju, “Ni ye athathe lakhi aphike kishi no hi shilu nani kea?”
35Kungumi no li khochile: “Aghungu Kimthe no O shou ikughi nani eno Alhou Akiqheu küka no O shou ngo nani. Highenguno akimthe nga khikhi punu nani keno tiye Alhou Nu ipi ku#1:35 Anu lakhi punu ni akeu ye Akimtheu ipi ku nani nani. 36No sholokumi Elizabeth ghi kitemi shivemu anu lakhi punu nani. Timiqo no li ye anuhau ipi cheni ikemu li ye mishikeu hi aqhi akütsüghou shi ani. 37Kughengu Alhou no pikeu lo shimlakeu kiumu küha nani.”
38Mary no khochile, “Ni ye Ampeu qeliu, nono pikeu toi I lau shikupulu peniu.” Eno kungumi no li lau no wuve.
Mary no Elizabeth Xüju
39Tipathiu Mary no aghili kutope mtazü chesü Judea ghakhu lo naghuto küdau mishiphughi lakhi lo wu. 40Eno li no Zachariah ki lo ilo no Elizabeth sasü küpütsae. 41Kughou Elizabeth no Mary sasü küpütsa keno li po lo anga no pakütakeu shi ithae, eno Elizabeth ye Aghungu Kimthe no chhitoive. 42Li no asütsa qhemghai keu lo no pi: “Alhou no totimi kütami nguno alau O kümghave tsüae. Eno O po lo xüthiye akümghapue! 43Ikemu kushiye Alhou ye ighono I kimiye kea? Kushiye I mpeu pa za ye I lau ighi kea? 44Nono I pütsakeu sütsa chilu kemtsa I po lo anga no alokivi lau no pakütakeu shi ithawuvei. 45No ye Alhou no kümghatsü keu totimi lakhi ke. No ye Alhouʼw tushokiqhi shou pülübelu ke!”
Mary le
46Mary no pi:
“I ngulho no Ampeu she ani,
47I ghungu no I Xakulu Lhou lau alovilu ani,
48Kughengu pa no
paw aqhokigheu qeliu kümsülue.
Hinguno hilau ye tiqhelimi kümtsü no I vilo akümghau ipi kuniae,
49kughengu akumto Lhou no I ghengu no akümla kije mlatsüe,
Pa je ye akimthe ke.
50Pa sümsakemi kümtsü shou
tiqheli no tiqheli kuto kimiyekeu piye cheni.
51Pa no Pa kumto-u chhopuwo no akümzapu mlae;
Aqheküzami kükümsü kukughu hexavetsüe,
52Pa no ayekipemi aküka lakhü lo no sünheqhive,
ikemu aqhokighemi sünheqhevae.
53Pa no mzüthikemi thime kivi pesü aghapiqitsü,
ikemu kinimi au kümsa puwuve.
54Pa no pa qeu Israel kuphue,
pülhapuju panongu lau küpüqhiyi keu
55Abraham eno pa kughukomi lau
ashoqhi piye nike kümsülue.”
56Mary ye Elizabeth gholo aqhi küthüa toikeu ngoa no tithiuye aki lo idewove.
John Baptist Punu
57Elizabeth no anga punu kepu ghuloki tove kelo li no anu lakhi punu. 58Li kisüghümi eno abolomiqo no Ampeu no akümzapu li lau mlakeu chilu no panongu kümtsü li gholo alovi küqhae.
59Atsala tache thiu panongu no ayiko ghakütha shinike anu sasü ighi, eno panongu ye pa puh je paphishi pa je ghi Zachariah kutsüniye shiae. 60Ikemu pa za no pi: “Moe, pa je ye John ipi kunie.”
61Panongu no li vilo pi: “No sholokumi dolo aje titoi keu lakhimu küha aphie.”
62Tithiu panongu no au kukulo lo no pa puh vilo anu je khuu kutsü penishi ani kea ipi iniju. 63Zachariah no yepuku kepu lakhi khu eno pa no ishi yepuku, “Pa je ye John.” Eno panongu kümtsü no akümzave. 64Tipa mtsa Zachariah kichi eno amili xükho kithe luve eno pa no atsa pi ghi Alhou sheqhe thuve. 65Panongu phivi lo ngoche kemi kümtsü akümsa no chhive eno akümzave eno Judea yeghi lo naghuto lo aphu akeqo kümtsü lo hipau tsa kügha wove. 66Hi chilu kemi kümtsü no akümzave. Eno Ampeu no John gholo akeu ghengu no panongu no ishi piae, “Anu hipau ye kiu shini cheni kepilai?”
Zachariah le
67John pa puh Zachariah ye Aghungu Kimthe no chhitoive eno pa no tungkupu tsa hitoi pi:
68“Ampeu Israel Lhou sheqhe lo,
kughengu pa no paw timiqo lau ighi eno panoqo kuqhopheke.
69Pa no pa küka kije pephe no paw timiqo xalu nike timi lakhi
pa qeu David lagha lo no süqhe.
70(Hiye püzüu no paw tungkupumi akimthemi vecheo pi püakeu toi),
71Pa no ni ghümi lau no ni xalu
eno ni mithichekemi kümtsü lau no ni xaphelu.
72Nipuh asü lau küpüqhiyi keu piyeni ye,
eno pa kimthe shoqhi kümsüchile luniye,
73Pa ye nisü Abraham lau puloshoqhi shi ke.
74Pa no ni ghümi lau no ni xaluni keu shoqhi shie.
Tishianguno ningu ye msamo no Pa qelu peniye ke.
75Pa ye ningu pelo aküxü kupujulo akimthe eno amikuchomi shipeniye ke.
76Eno I nu, no ye Alhou Akiqheuʼw tungkupu lakhi ipi ku nani;
kughengu no ye Ampeu züu no pa laghi kutope qhinike ghengu no wu nani,
77nono paw timiqo vilo kishi no panongu ye xaluve nani keno pitsü nani.
Eno panongu vilo kishi no axine qhikütsü ithulu nani keno pitsü nani.
78Tipaqo kümtsü shikupu nani kughengu ni Lhou ye kimiyekini eno küpükini ke;
paw kimiyeqhiyi keu hu no khetsünhe ipe cheke toi kungugha lo no ningu shou ikughi nani.
79Aküzü yeghi lo xüakemi
eno akithi yekükhü lo akemi shou pa küvü yepüvü nani.
Tino ni pukhu nepa kichesü aloinokeu la lo wu nani.”
80Jisü ye mtotoi thuwuve eno aghungu küxü lo mutotoi ve; eno pa ye Israelmi zülo pephe piye moke tsala kuto lo yenguyelei keu-a lo xüache.

Luke, Sümi Tiqhelimi Bible™

Yekiphechipiu © 2019 by Biblica, Inc.

Puloza lu no peitha ani. Ayeghiqha kümtsü lo puloza lu no peithalu kepu chipiu ani.

Luke, Sümi New Generation Bible™

Copyright © 2019 by Biblica, Inc.

Used with permission. All rights reserved worldwide.


Learn More About Sümi Tiqhelimi Bible