Galatiami Kilekithitsa

Kilekithitsa

Galatia ye Asia mtá lo Rommi bocho lakhi ke. Paul ye atsakiviu ghüzü küthü izüwu keu kümtsü lo hilehi Jisü ghili kükütsü sütsa külha nike ghenguno izüsü ighike. Galatiamiqo ye Paul eno pa no atsakiviu süghi keu küma kinikujo alokivishi ikhilu ke. Ikemu athiu timi khami shikughutho chekemiqo ipi Paul no ku chekeqo no ighi püzü Paul’w sakiphe ngò paw shiküka boqha kinikujo khü ke. Ike Paul no pa no apostol lakhi shi akeu lo kichiqhi akeu ghenguno khochile eno Messiah shou aküpülü qhi keu no Alhou’w aqo-aho akitheu lo kihiküsümi shini keu boqha kepi shikumto kithe ghi yè ke.

Paul ye Jerusalem lo apostolmiqo lau qhüiniju ghi paw yèsü yè thuke kumoe. Tishini ke züqhulo, pa ye I no atsakiviu kütsü chekeu ye timi lau no ighimoe… ikemu, Ni ye piyeküsü vechewo Jisü Khristo lau no ithulu ke ipi pikichichi ke. Paul ye piyeküsü hipau küsaje moayesave, eno apostolmi kütamiqo ye pa saphu ani kepi pa no yè ke.

Tisheno Paul ye paw akikighe akhotou lo pikibe wuve, tiye Jewkumomi khunoqo no Jisü papemi shiluvea keno panongu ye aphighüyiko-gha moayesa keu kumo ke ipikeu ke. Ayeghiqha kümtsü lo akibo kithé khikhi Abraham lau piqhipüa keno tiye Messiah Jisü shou aküpülü qhi keu vechewo ipeghi cheni ke thono Jewmi yeza (Torah) pape keu vechewo no kumoe. Bible xüghili ye abothu lono hipau lo kichetsü cheke.

Ikemu Torah no atsakiviu boqha kumo aye, yepeka kühave nani ke kumo keshea? Paul no Aghungu no aküka tsü keu küxü ye Messiah pape chekemiqow aqo-aho lo kiutoi ithulu cheni keno tipau pitsü ghi khochile ke. Paul ye itaghi yèsü hipauw akhoto kimiji pitoikütsü ghí ashekuho shike: Aphighüyiko-gha keu na ghamo keu namu akiqi kühae; lhoxü kithé shiluve keu hu no akhotou ke.

Currently Selected:

Galatiami Kilekithitsa: STB

Highlight

Copy