Galatiami 4
4
1I no piakeu ye amheghi kiyighiu no itimi shi ake thaqhülo amheghi kümtsü paw shi aghí namu, pa ye aqüaxemi lakhi paphi ke. 2Amheghi kiyighiu ye papù no ado pekithi tsü keu tomo ke kutólo akhemi eno jukükütsümiqo qholo ke. 3Tihutoi ningu ghí aghungu lo akughunu shi akelo ye ayeghiqha ghungu küká boqha qholo aqüaxe shi acheke. 4Ikemu kughou ado pekithi pe püakeu kupukülai tove keno, Alhou no pa Nu puwu, pa ye totimi lakhi vechewo punú, pa ye ayeza qholo no punú, 5tiye ayeza qholo akemi xachilelu nike ghenguno ke, tishi keu vechewo ningu pelo Alhou nuliqo shilu#4:5 Greek tsa kiqi lo nuliqo shilu ipi akeu ye Rommi no ayeza vechewo anu kipitimi saluve keu pelo amheghi kiyighiu shiluve pe chekeu pesü piani. peniye ke. 6Kughengu nongu ye pa nuliqo kehu, nongu pelo, “Abba,#4:6 Aramaic tsau no Apù ipi ani Apùo,” ipi ku penike ghenguno Alhou no ningu mlo lo pa Nu Ghungu puwu ke. 7Ikehu nongu ye aqüaxemi lakhi kumovae, ikemu Alhou nuliqo ke; eno nongu ye pa nuliqo ke ghenguno Alhou no nongu ghí pesü amheghi kiyighiu lakhi shitsü ke.
Galatiami ghenguno Paul Lokümsü
8Atüghi lo kughou nongu no Alhou mtha no ache keno nongu ye alhoaye lono alhou kumo kemiqo qüaxe shi acheke. 9Ikemu itehi nongu ye Alhou ithive ake—momu pìní aye Alhou no nongu ithivae—tishiaye nongu ye kíshi no hipau yeghilomiw qeinai keu eno ameküha keu boqha kükaqo lau idewove ani kea? Nongu ye tipaqo pelo itaghi nongu pesü panongu qüaxeu shive penishi ani keshea? 10Nongu ye akimchi tsalà ngò aqhi ngò atusho ngò ampeqo ikhilu acheni! 11I no nongu gholo aghime shi mülà achekeu hu ye adou shivea keshelapi ni ye msà ani.
12Athiküzümi eno achelimiqo, I no nongu qhüiniju ani, I toi shivelo, kughengu ni ghí nongu toi shive ke. Nongu ye I lau achipikumo kiumu shimoe. 13Nongu no ithi anike, ni ye aküsǜ ghenguno atüghishi nongu lau atsakiviu kütsü ke, 14eno I küsǜ no nongu ghenguno peju keu lakhi shi aghimu, nongu ye I thaigha momu I jukünathamo ke. Tishini ke züqhulo, nongu no ni ye Alhou’w kungumi lakhi shi aghí kepu toi, I no Khristo Jisü ampi shi aghí kepu toi I sasǘ ke. 15Tishiaye nongu no I kümgha tsü chekeu itehi ye khile ani kea? I no thopi shilu akeu ye, nongu ye shilu kepu shi aye nongu nhethi ghí lejove no tipaqo I tsüveni cheke. 16I no nongu vilo kuchou pikeu vechewo ni ye itehi ye nongu ghümi shivea keshea?
17Kichileu kükütsümi hupaqo ye nongu züluve niye amlotsüqhiyi ani, ikemu akivipu ghenguno kumoe. Panongu no shinishi akeu ye nongu pesü ningu lau no kütüta shive tsünishiqhiyi anike, tishi keu vechewo nongu pelo panongu lau amlotsüqhiyi peniye ke. 18Amlotsüqhiyi keu ye aloke, ikemu akimiji alo keu shi aghí moayesa, eno tiye I no nongu gholo akelo likhi kumo no alhokuthu lo tishilu moayesa ke. 19I no kimiye chekemi anuliqo, nongu lolo Khristo gholuvemo ke kutólo ni ye apunu küsǜ sǜ akeshi nongu ghenguno itaghi sǜ anie, 20ni ye itehi nongu gholo aghínishi ani eno aghola kütau no nongu pütsa nishi ani, kughengu ni ye nongu ghenguno avehu küghüzü shi anike!
Hagar ngò Sarah
21Nongu khunoqo ayeza qholo anishi cheni keno I vilo pilo, nongu ye ayeza lo kiu pipüani keno ithiamo keshea? 22Kughengu ishi yèpüanie, Abraham ye anu kini ache, lakhi ye aqüaxeu totimi vechewo no punú eno lakhi ye anipu kuchou vechewo no punú ke. 23Abraham nu aqüaxeu totimi vechewo punú keu ye timi lhoaye gholau no punú keu ke, ikemu anipu kuchou vechewo anu punú keu hu ye Alhou’w pikiqhi shikupulu keu kiqi lono punú ke.
24Thime hipaqo ye kimghi pìye keu ghola lono ikhilu cheni: Totimi küma ye puloshoqhi kini kiche-piye akeu ke. Puloshoqhi lakhi ye Sinai Naghuto lono eno aqüaxemi shini keu anuliqo punú ke: Hiye Hagar. 25Itehi Hagar ye Arabia lo Sinai Naghuto kumlho ke eno itodolo Jerusalem mishighüna ye li kumlho ke, kughengu li ye li nuliqo sasü aqüaxe lo ani. 26Ikemu Jerusalem kunguu akeu ye kuqhophevea ke, eno li ye ningu pazá ke. 27Kughengu ishi yèpüani:
“Alokivi shilo, anuhamiqo,
nongu khunoqo anu lakhimu punú mphi keno;
nongu khunoqo apunu küsǜ sǜju mphi keno,
alokivi lono ighalo eno igha qalo;
kughengu akimi no sasü akeu totimi nguno alau
akimi no jumuve keu totimi no anuli alau anani.”#4:27 Isa 54:1
28Itehi ye nongu athiküzümi eno achelimiqo, nongu ye Isaac toi pikiqhi nuliqo ke. 29Tipau ghuloki lo timi lhoaye no punú keu anu hu no Aghungu küká lono punú keu anu pishi-puju cheke. Itehi kutólo athoshi aphie. 30Ikemu Kuchoyesü ye kiu piani kea? “Aqüaxeu totimi eno li nu hapheve lo, kughengu aqüaxeu totimi nu ye khilemu kuqhopheve keu nu gholo amheghi küsajemo nani.”#4:30 Bothu 21:10 31Tighenguno, athiküzümi eno achelimiqo, ningu ye aqüaxeu totimi nuliqo kumoe, ikemu anipu kuchou nuliqo hu ke.
Currently Selected:
Galatiami 4: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
