Apostolmi 21
21
Jerusalem lo Wu keu
1Ningu no panongu lau no kütüta shive kethiu ningu ye azüghi lono vejoi Kos lo wuve. Tishiwo thoghiu ningu ye Rhodes lo wu eno tile no Patara tolu. 2Ningu no zükilu lakhi Phoenicia lo wu niye akeu phulu püzü tile iku no wuve. 3Cyprus ithuluve kethiu ningu ye apéu küdau vechesü Syria lo wuve. Ningu ye Tyre lo ighino ngolu, tilehi no zükilu lo ape xapu chekeu pe qhive niye shi ake. 4Ningu no tile küpülümiqo phulu eno panongu gholo atsala tsünì ngove. Aghungu vechewo panongu no Paul vilo Jerusalem lo wu kevilo ipi. 5Kughou wuve kepu do tove keno, ningu ye tipa-a qhive no ningu là lo cheve. Panongu kümtsü anipu eno anuliqo sasü ningu gholo no mishighüna khalau kutólo ighi, eno azüghi mükü lo ningu qhoqhünhe pe no inikhue. 6Ningu lakhi no lakhi kini kileve kethiu ningu no zükilu lo ikuve, eno panongu no aki lo idechile wove.
7Ningu no azü lono kicheghüzü shikibesü Tyre lono wo Ptolemais tolu, tilehi ningu no alokivishi athiküzümi eno achelimiqo sasü petha shilu eno atsala lakhi panongu gholo ngove. 8Thoghiu ye alà cheve püzü, ningu ye Caesarea tolu eno Philip tsavipeu ki lo ngolu, pa ye Jerusalem lo timi tsünì kishelu keqo gholo lakhi ke.#21:8 Apos 6:1-6 9Pa ye angá bidí külaumo no ache eno panongu ye tungkupu tsa piche.
10Ningu no atsala hami tile ngove kethiu Judea lono tungkupu Agabus ipikeu iqighi. 11Ningu lau ighino pa no Paul pokha ikhilu no tipau pesü pa likhi pa phi-au phedave püzü ishi pi, “Aghungu Kimthe no piani, ‘Apokha mpeu hipau ye Jewmi sakiphemiqo no Jerusalem lono hitoi pheda pesü Jewkumomiqo lau tsüve nani.’ ”
12Kughou ningu no hi chilu keno tile timi akemiqo ngò ningu no Paul vilo Jerusalem lo iqho pemo nike qhüiniju. 13Ikelo Paul no khochile, “Nongu ye kushiye anhezü-piji eno I mlo shikighimeve tsü ani kea? Ni ye I tsüghaluve pe keu likhi kumo püzü Jerusalem lo Ampeu Jisü je ghenguno thiveni ke kutò pe anie.” 14Kughou pa pütsaqhi mülave keno ningu no, “Ampeu pulou shipeniu,” ipive no palokutove.
15Hipathiu, ningu ye Jerusalem lo iqho nike ningu là lo wuve. 16Caesarea lono akhopemi khami ningu gholo wu eno ningu sasü Mnason ki lo sawu, ningu ye tile ngo nikeu shi ake. Pa ye Cyprus lono ighi kemi eno akhopemiqo gholo atüghimi ke.
Paul no Jerusalem lo Ighilu
17Kughou ningu no Jerusalem lo ighi keno, athiküzümi eno achelimiqo no alokivishi ningu sasülu. 18Tishiwo thoghiu Paul gholo ningu kümtsü James sasü kusho niye wu, ikelo kichimiqo kümtsü ngo aghíe. 19Paul no panoqo sasü petha shi eno pa kümlà vechewo Alhou no Jewkumomiqo gholo kiu mülave tsü akeno chixechilei pìthitsü.
20Kughou hi chilu keno panongu no Alhou sheqhe. Tisheno panongu no Paul vilo pi, “Athiküzüu, no ghí julo, Jewmi qhethonhe khijehi no pülüluvea kea, eno panongu kümtsü ayeza ghenguno minemighei kemi likhie. 21Nono Jewkumomiqo gholo xü chekemi Jewmiqo vilo Moses yeza qhivelo, anuliqo phighüyiko gha kevilo eno ni kukhuaye ghola lono xü kevilo ipi kütsü acheni kepi panongu no chilu pesü anie. 22Ningu ye kíshiveni kea? No ye ighivae ipikeu panongu no chiluveni pütsae, 23tighenguno ningu no O vilo kiu shilo pìní keno tipau shilo. Ningu gholo ashoqhi shipüa kemi timi bidí anie. 24Timi hipaqo sasü wulo, no ghí panongu gholo küqha no shikimthe keu chine shi no panongu me ghí nono tsüve tsülo, tisheno panoqo pelo akütsüsa miyeluve pelo. Tishianguno timi kümtsü no O ghili kiu chilu pe püani keno tiye kuchou kumoe ipi ithive nani, eno no ampi ghí ayeza ghokulu shi xüani ipi nani ke. 25Jewkumomi küpülümiqo ghengu ye ajulho lhouqo lau aghashi pe müláve keu chuqu, lhoxü tshüqhi-pìthí keu shì eno ajì chumo nikeu eno kipito xüküpsa lono putosü apenike panongu lau akiyé lono ninguw xakütha pesü tsüvae.”
26Tishiwo thoghiu Paul no timiqo sasü wu no panoqo gholo no pa likhi pa shikimtheve. Tisheno pa no achineki lo wu püzü shikimthe keu chine kiu tsalà lono kishekhave nani eno panongu lakhi-khi ghenguno akümlagho mülá nikeu pìthíve tsü.
Paul Küghaluve
27Kughou atsala akütsüniu ashekha shive niye akeno, Asia bocho lono ighi kemi Jewmi khami no achineki lo Paul ithuluve. Panongu no aqokitikhi kümtsü xukutho püzü pa küghaluve, 28no ighamuku ghi ishi pi, “Ni küsàmi Israelmiqo, ni kuphulo! Timi hipau no aqha kümtsü lo timiqo vilo niw timi ngò ni yeza eno a-a hipau lachile keu shika achenie. Tinguno alau, pa no Greekmiqo sasü achineki lo ighino akimthe-a hipau shikuchubeve anie.” 29Panongu no azüu mishighüna lo Paul no Ephesiami Trophimus sasü chekeu ithulu pepüa kehu Paul ye achineki lo pa sasü ighi küghashive ke.
30Mishighüna lo akemi kümtsü hakuthove, eno alapa kümtsü lono timiqo posü ighi khave. Panongu no Paul tsüqüluve, eno achineki lono pa süqosü ipeve, eno paikhavi khaghoqo khaluve. 31Panongu no pa heqhipithíve niye pükapütsa akelo Jerusalem phughi kümtsü lo mubumghu ani ipikeu sütsa Rommi ghüshimiqo shou zatsüu lau tove. 32Pa no akimighi shi hiyampemiqo hami eno ghüshimiqo sasü aqokitikhi lau posü iqi. Kughou heküpüsamiqo no zatsüu eno ghüshimiqo ithulu keno, panongu no Paul heqhi akeu tave.
33Zatsüu no iqhoghi püzü pa küghaluve eno ayikichhe kini pesü pa tshüvelo pi azah tsüve. Tisheno pa no Paul vilo pa ye khuu eno kiu shive keno iniju. 34Aqokitikhi gholo khami no ighamuku lakhi pi aye kütami no kütau pi ishi ake, mubumghu keu ghenguno zatsüu ye kiu no kuchou keno ithimove, pa no Paul sasü ghüshimi kungoki lo wuve penike azah tsüve. 35Kughou Paul no apukhu pükaiku chekeu tolu keno, mtomushu loji no alau shi muqhumüza kithe wuve kehu ghüshimiqo no pa kuhope sawuve moayesave. 36Paul pape chekemi aqokitikhi no tamo no, “Pa pìthívelo!” ipi ighamuku.
Paul no Aqokitikhi Zülo Atsa pi
37Ghüshimiqo no Paul sasü ghüshimi kungoki lo ilove niye kutò akelo Paul no zatsüu vilo ishi iniju, “I pelo O vilo kiuala pilu penima?”
“No ye Greek tsa pi cheni keshea?” ipi pa no khochile. 38“No ye ado hami züu mjochile keu huthuphe no kichiqhi chekemi qhethonhe bidí sasü küghünamokeu-a lo wu keu Egyptmi ke kumo keshea?”
39Paul no khochile, “Ni ye Cilicia lo Tarsus lono ighi kemi Jewmi ke, inapügha mishighüna lo aghakütsami kumoe. Kimiye no I pelo timiqo pütsalu pelo.”
40Zatsüu lau no puloza ithuluve kethiu, Paul no apukhu-nepa lo puthugho no aqokitikhi lau au kihí tsü. Kughou panongu kümtsü no iqünheive keno, pa no Arameami tsau no panongu vilo pi:
Currently Selected:
Apostolmi 21: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
