ɛTomɛ 24
24
Kɛ bhɛ Bol ɛBulus segha ɛShara
1ɛTsim nituk iwii, ɛHananiya ne ɛ so ɛgɔm nibo gha ne phɛ ne iKɛsɛriya nɛ nidɛng ninu nikɔɔn, gbik ne ɛdɛ ɛlooya gha ne kaa bok ɛbhɛ ɛTatulus tɛ nibhɛ bhɛ bangke ikun ɛBulus de ɛnu ɛyisɛ ɛgɔm-na. 2Ne sɛ kɛ lel ne ɛBulus sa ndɔ ɛlɔ ne bol ɛshara gha, ɛTatulus sa ne ho ne tɔng ivol ne bangke ikun ɛbhɛ da, ɛnu ɛyisɛ ɛgɔm-na gha ɛɛ bo:
“ɛNdiinday ɛFɛlis, kɛ lenɛ ne ntsɛntsɛng ne yɛɛ ne boos igbɔm mo da njwi kɛ ne bo phyɔngɔle njwii kɛ ne sɛ irway ne laal ndɔ ne ivel mos da. Kɛ ne ta lenɛ ne yɛɛ ne wɛɛ ɛgɔɔ ɛyisɛ mo ivel mos da kɛ ne sunuuy. 3Ninyi mo na ndɔ ivel mo da gbik igyɛ ne ndiinday ɛFɛlis, ne bok irway ihwala ne igyɛ, sɔng ɛnkyɛt tang. 4Sɔng nzi sim te na bees sɛ nten igyɛ ndiinday ɛFɛlis nang, gbik ne phɛ ɛlɛy ne ˆɛ maa bo me ɛbɔk, ndɔ ne iyɛnɛng mo de, te ɛ tente ibol mos de ncɛt. 5Njwi kɛ sɛ ɛnyi yɛghaa wo ɛ hɔ igboo gbom, ɛ subhus ihywɛɛ niYahodawa de ndɔ ɛzay ya gbik, ɛbhɛ so ɛndiinday ɛguu ninaa ne roos ibol ɛnyi ne iNazarat de. 6Ɛɛ ma yung sim te aa bees iDeng ngge ɛli ne ɛ lel ne ɛnyi ne hame ɛ so ɛdɛng ndɔ niYahodawa, iphɛ ne njwi kɛ ne wum ɛbhɛ.#24.6 iDɛ iwee ne ile da kaa bok ɛbyin iken 6-8 ɛlɛ: Njwi kɛɛ sim njwi yaa bol ɛbhɛ ɛShara gha ɛli ne ikpii mos da bo wo. 7 ɛndiinday ɛLisiyas kɛ ne yɛɛs ɛ phɔt ɛbhɛ ne iwɔ mos so, 8 ɛ yɛk ne ninaa ne bungka ikun ɛnyi yɛdee wo yɛɛs ɛnu ɛyisɛ mo. 8Yaa ne sɛ ˆɛ kɛ phomos ɛbhɛ ivol da ne ito mo aa ne seng wu nikɔn nɛnaa wo ne njwii bo ɛ kɛ mɔn no so itin nɛ.” 9niYahodawa na ne roos ɛduu ne ivol lɛ, nibhɛ yɔngɔ wu ivol ɛTatulus da so itin nɛ ɛtsak.
ɛBulus sa kɛ Bol iVol ne Tul iTo Ɛbhɛ
10ɛgɔm-na gha ne te ɛBulus segha iwɔ dɛɛ wu te ɛ boote. ɛBulus sa ne yɔngɔ, “Nzi yɛɛ ˆɛ kɛ bo ishay maa ˆɛ bol ninaa ne ivel lɛdaa wo nishara na, naa ne kyii ne ibol nge de ne irway ihwala. 11Wu ɛ kɛ phom aa seng sɔng nituk ka kɛ phee ɛnduwubɔ nɛ nibhɛ ifaa ne nggɛ phɛ ne iYɛrushɛlɛm be naa bhɛ re ntsong ngga nang. 12Sɔng ninyi na nɛ nibhɛ bok ibol de ne me wo kɛ ku sɛ me ndɔ ne iDeng ngge nzi re ishamas ne ɛnyi nang. Sɔng nibhɛ kɛ ku sɛ me ndɔ ijwee ne itɔɔy nzi shɔk ɛnyi nang, sɔng nibhɛ kɛ ne sɛ me nzi mɔn ɛlɛy ndɔ ɛgarang nang. 13Sɔng nibhɛ yaa ne yɛɛ ne tɔɔrek kɛ ɛkɔn na ne aa tɔɔrek wu ivol nibhɛ da daa ne ito nge de so itin nɛ nang. 14ɛKɔn ɛdaan ne nzi yɛɛ zɔng, ɛbhɛ ghaa ɛlɛ, nzi re ɛTaanggbey nikyɛɛ-nikyɛɛ mos ntsong ne Nkiinɛ yɛwoo wo nɛ nibhɛ bo wu ninyi yɛ so ‘ɛGuu ninaa ne irywɛɛk ka.’ Nggɛ nang ne itin nɛ ne ɛShara ɛMuusaa gha gbik nɛ nikɔn na nɛ ninabawa na kɛ haa wo. 15Ne n bok iyɛk ne irway ijwaan nɛ ne ɛTaanggbey ɛli nɛ ninyi yɛnaa wo ma bok ko, nɛ nibhɛ bo wu sɛ yiisik tsik ninyi ne icik gbik nɛ ninaa nɛ nibhɛ sang so cik ne ikpuu. 16iPhɛ phɛ kɛ ne te nzi kyangas me nɛ te n yaang izɔlɔs ne irway so byirik, ɛnu ɛyisɛ ɛTaanggbey ya gbik nɛ niten nisii.”
17“Kɛ ne sɛ ɛtsim ishay maa ne hame nzo ne iYɛrushɛlɛm be, nggɛ ne yɛɛs ne te i nang ninyi mos ijam ne ihywɛ so iphyik te ne n da nang ɛTaanggbey ye. 18Nggɛ ne so ɛnu ne mɔn nikɔn nɛnaa wo, nibhɛ sɛ me ndɔ ɛsaa ne iDeng nga nggɛ te ito wɛwɛy ɛli ne ikpii da bo te mɔn. Sɔng ngga bok idira ninyi nang, sɔng ngga ne subhus ihywɛɛ ɛnyi nang.#24.18 Ta yɛɛn: ɛTom 21.17-28. 19Nidɛng niYahodawa na nɛ nibhɛ kaa le ne ivel ne iSiya kaa yang so ɛnggyɛ wo, sɛɛ yɔng ibol de nibhɛ bhɛ sɛɛ ne yɛɛs ɛlɔ mo gha nibhɛ bungka ikun nge de wu ninyi na bok ibol de ne me wo. 20Tɛ ninyi yɛnaa wo nɛ nibhɛ kɛ kyinasek ɛbɛ wo mɔng ne ɛkɔn na kaa sɛ me nɛ ɛben nɛ ɛli ne kaa phɛ ne mee ɛnu ɛyisɛ ne itɔrɔng nga. 21Hang yung so ibol de ne nggaa kyinak ɛnu ɛyisɛ nibhɛ gha n yinɛ izɔlɔs nge de n yɔngɔ: ‘I bol me ɛshara gha izenge wo daa ne ibol ne yiitsik tsik ne ikpuu de naa?’ iBol lɛ nɛ nibhɛ yung bol lɛ ɛLyilyɛghaa wo naa?”#24.21 Ta yɛɛn: ɛTom 23.6.
22ɛGɔm-na ɛFɛlis sa kaa ne ku yɛɛ gbom ibol ne i bo ɛYɛso ɛbhɛ so ɛNkiinɛ wo, iphɛ ɛlɛy ne ɛ kɔɔng ɛshara gha ɛ yɔngɔ, “Yaa kyi sɛ ɛndiinday ɛLisiyas kɛ yɛɛs nyɛɛn ne nggyi hyɛ nyini ɛshara gha.” 23ɛGɔm-na ɛFɛlis sa ne yɛk ɛndiinday nisooja ne iRooma na nɛ wu te ɛ hyep ɛBulus segha. Ne ɛ yɛk ɛbhɛ nɛ wu hang ne ɛ baasek ɛbhɛ nggbang, wu hang ne ɛ ring nitaay ɛBulus sa ne yaang ɛbhɛ nibhɛ phyik ɛbhɛ nɛ nikɔn ne ɛɛ sim.
24Ne sɛ nituk kɛ kɛ boy yɛ, ɛgɔm-na ɛFɛlis sa ne bo ɛkuk ɛbhɛ ɛDurusila, ne ɛ kaa so ɛlap niYahodawa na ɛ yɛɛs nɛ. Ne ɛ ji tom mɛ i yɛɛs ne ɛBulus sa ɛ tenes ɛBulus segha ɛ tɔng ibol ìnang ne itin de ndɔ ɛYɛso ɛKiriti gha. 25ɛBulus sa ne bol ibol ne hyel cik, ne iwum ito gbik ne idee ɛshara ne ɛ yaaso. ɛFɛlis sa ne wum ɛnik, ne ɛ yaak ɛBulus segha, “Cwi gɔɔ! iPhɛ kɛ hɔn nɛ ɛlɛy, hyel, yaa sɛ nggɛ kyi sɛ nten nang naa ne tom mɛ i yel-le yɛ.” 26ɛGɔm-na ɛFɛlis sa kaa sim te sɛɛ yɔng ɛBulus sa sɛɛ say ɛbhɛ ne ijam, iphɛ phɛ ne te ɛ tang phyɔngɔle ɛ yel-le ɛBulus segha ɛ bol ne ɛbhɛ wo.
27Ne sɛ ɛtsim ishay iphaa, ɛFɔkiyɔs ɛFɛsitus ne teye ɛgɔm-na gha ɛ sunu ɛFɛlis segha. ɛFɛlis sa ne tek ɛBulus segha ndɔ ne ijwee ne nyang ngo daa ɛli ne ɛ kaa sim tɛ niYahodawa sɛɛ phok iyɛnɛng ɛbhɛ.
Currently Selected:
ɛTomɛ 24: etxNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
