ɛTomɛ 17
17
ɛBulus sa ne ɛSila gha Kɛ Phɛ ne iTasɔlɔnika
1ɛBulus sa ne ɛSila gha ne roos ɛgarang ne iMifɔbɔlis gbik ne ɛPoloniya, nibhɛ bhɛ hɔn iTasɔlɔnika. ɛNggyɛ wo, ijwee ne itɔɔy niYahodawa ne sonɛ. 2ɛBulus sa ne bhɛ lel ndɔ ne ijwee ne itɔɔy ɛli ne ɛ ku mɔn no. Ne ɛ bo Nituk ne iWɛsɛ niYahodawa na itwat ɛ phɛɛs ndɔ ne ijwee ne itɔɔy yo nibhɛ ne i bol nibhɛ wɛɛ ibol lɛ nɛ ninyi na ndɔ ne ɛWee iBol ɛTaanggbey yo. 3Ɛ kpɛl nibhɛ nɛ, ɛ tɔɔsel nibhɛ ɛli ne phɛ ku so nggbinggbing ɛKiriti gha sɔ nggbang ngga ɛ kyi ta yilitsik ne ikpuu da. Ne ɛ ta yaak nibhɛ, “ɛYɛso yeghaa wo ne nzi tɔng nyini ibol ɛbhɛ de, ɛbhɛ so ɛKiriti gha.” 4Nidɛng niYahodawa na, nɛ nidɛng ninyi ne iGirik ka nɛ nibhɛ bok ɛnik ɛTaanggbey gbik ne igbaang nikuk ka gbom ne sim ibol ɛBulus de ne ɛSila gha nibhɛ ne nang ne itin nɛ, nibhɛ teye nitaay ne mɔn ɛtomɛ ɛBulus sa gbik ne ɛSila gha.
5niYahodawa na ne yɛk ɛnkyis, nibhɛ ne tuma nidɛng nisang-phok ka nɛ nibhɛ shɛɛ ɛtungga. Ne sɛ nibhɛ kɛ sɛm en gbik, nibhɛ ne tum izok ndɔ ɛgarang ngɛ. Nibhɛ tum irywen, nibhɛ phɛ ne ijwee ɛYason nibhɛ tɔk tɛ nibhɛ sɛ tul ɛBulus segha ne ɛSila gha nibhɛ nang ninyi na. 6Ne sɛ nibhɛ kɛ bhɛ tɔk ɛBulus segha nzeet, nibhɛ ne wum ɛYason negha gbik nɛ nidɛng ninaa ne roos sa nibhɛ phɛ nɛ ɛlɔ nindiinday ɛgarang nga. Nibhɛ bol, nibhɛ bo, “ɛBulus sa ne ɛSila gha kɛ tubhus ibebhe ndɔ nigarang ɛzay ya gbik. Nibhɛ naa nibhɛ kɛ ta yɛɛs ɛbɛ. 7ɛYason na kɛ ne say nibhɛ ne ijwee ɛbhɛ. Nibhɛ wo gbik i ne mɔn ɛkɔn na ne ɛ so kyii ne ikpii ɛKɛɛsat da, nibhɛ bo wo ɛdɛ ɛgɔm ma sonɛ ne bok ɛbhɛ ɛYɛso.” 8Ne sɛ ninyi na kɛ phok ɛlɛ wo, nibhɛ wo nɛ nindiinday ɛgarang ngɛ ne bees irway. 9Nindiinday ya ne yɛk ɛYason negha nɛ, nɛ ninaa nibhɛ tal ijam ne ibɛli nyɛɛn kyi tek nibhɛ, nibhɛ ne kyi tek nibhɛ bhɛ hyel.
ɛBulus sa ne ɛSila gha So ne iBiriya
10Ne sɛ ɛlɔ yɛ kɛ teye ɛtuk, ninaa ne roos sa ne yɛk ɛBulus segha ne ɛSila gha nkiinɛ nibhɛ yaa phɛ ne iBiriya. Ne sɛ nibhɛ ghe bhɛ tuu iBiriya de, nibhɛ ne bhɛ lel ne ijwee ne itɔɔy niYahodawa wo. 11niYahodawa ne iBiriya na ne kaa ne phyin ninaa ne iTasɔlɔnika na ne iyɛnɛng. Nibhɛ kaa say ibol nibhɛ de ne irway ihwala, nibhɛ phɛl ɛWee ne iBol ɛTaanggbey yo izenge ne ihwɛlɛ tɛ nibhɛ yaang hang ibol ɛBulus de so itin nɛ yoo. 12iPhɛ ɛlɛy niYahodawa na gbom ne nang ne itin nɛ. ɛLɛy ne idɛ igbaang nikuk ne iGirik ka gbik nɛ niras sɛ gbom ne ma nang ne itin nɛ. 13Ne sɛ niYahodawa ne iTasɔlɔnika na kɛ phok wu ɛBulus sa sanga ibol ɛTaanggbey de ne iBiriya de, nibhɛ ne phɛ ne iBiriya de nibhɛ bhɛ shɔk ninyi ɛlɔ yɛghaa nggyɛ wo nibhɛ subhus ihywɛɛ nibhɛ. 14Ninaa ne roos sa ne shii tom ɛBulus segha ɛnu ɛrenes ɛSila gha ne ɛTimɔti gha ne kyi phyɔngɔle ne iBiriya de. 15Ninyi na nɛ nibhɛ kɛ bhɛ hyeeng ɛBulus segha ne bhɛ hɔn iTina. Ne sɛ nibhɛ yaa kyii ɛBulus sa ne ji tom nibhɛ wu tɛ nibhɛ yaak ɛSila yegha ne ɛTimɔti gha tɛ nibhɛ yɔng ɛhywarat nibhɛ yɛɛs, nibhɛ ne ji bo nikɔn.
ɛBulus sa So ne iTina
16Kɛ sɛ ɛli ne ɛBulus so ne iTina de ɛ hyep ɛSila yegha ne ɛTimɔti gha ne ɛ yaang ninaa ɛgarang ngɛ bok igbunkyi gbom, irway ɛbhɛ ne bees se gbom. 17iPhɛ ɛlɛy ɛBulus sa ne i bol nɛ niYahodawa na nɛ ninyi ne iGirik nɛ nibhɛ bok ɛTaanggbey ndɔ ne ijwee ne itɔɔy niYahodawa na nibhɛ wɛɛ ibol lɛ. Ne ɛ ta i bol nɛ ninyi na nɛ nibhɛ so ndɔ ɛtungga izenge ne ihwɛlɛ. 18Nidɛng nikyɛɛ ne icwam ne kaa i bok nibhɛ niBikuriya nɛ niSitɔkya kaa ne i re ishamas ne ɛBulus sa. Nidɛng ne yɔngɔ, “iKyee ne ɛnyi ne irwɛrɛ yɛghaa wo i sim aa bol le?”
Nidɛng ne ji yɔngɔ, “Njwii wɛɛ te ɛ bol ibol nidɛng nitaanggbey de ne hame nibhɛ so ɛbɛ wo.” Nibhɛ kaa bol ɛlɛ wo daa ɛli ne ɛBulus sa kɛ tɔng nibhɛ ibol ɛYɛso ne idee ne yiisik tsik ne ikpuu. 19Nibhɛ ne yaak ɛBulus segha wu te phɛ ne itɔrɔng nibhɛ nɛ nibhɛ bok iphɛ iGol-ɛRes, ɛnggyɛ wo nibhɛ ne ji bhɛ yaak ɛbhɛ, “Njwi sim te njwi sɛɛ seng ɛkɔn na imɛmɛ ifas mo yɛdaa wo i bol. 20Nikɔn na ne ɛɛ mɛmɛ nɛ wo so njwii niphas sɛ, njwi i ne sim te njwi sɛ seng ito yɛ.” 21Ɛlɛy gbik ninyi ne iTina na nɛ nihak ninyi na nɛ nibhɛ shɛɛ ne iTina de kaa ku i sim tɛ nibhɛ sɛ tenes nibhɛ ta i bol ivol nikɔn niphas zɔng.
22ɛBulus sa ne yilitsik ndɔ ne itɔrɔng ne iGol-ɛRes de, ne ɛ yɔngɔ, “Ninyi ne iTina, nzi yaang nyini, ɛ so ɛn ninaa ne re nitaanggbey ntsong gbik ndɔ nikɔn na ne ɛ mɔn ɛn gbik. 23Kɛ sɛ ɛli ne nzi hyel ndɔ ɛgarang mon na, nggɛ ne yaang nikɔn na ne ɛ re ɛn nibhɛ ntsong ngga. Nggɛ ne bhɛ sɛ ɛdɛ ɛraa ne hap itsanga gha ne kɛ haa ne idɛ bol de ne iphɛ bo, ‘ɛLɔ ɛTaanggbey ne Njwii Sang Yɛɛ Ɛbhɛ.’ ɛTaanggbey yɛghaa wo ne ɛ sang yɛɛ ɛn no, ɛbhɛ ne naa ne tɔng nyini ibol ɛbhɛ.”
24“ɛTaanggbey ya ne ɛ kɛ ryɔng ɛzay ya nɛ nikɔn na nɛ nibhɛ sonɛ wo, ɛbhɛ so ɛDaray ɛzay ya ne ɛdaa ne irywa wo gbik. Sɔng ɛ ne shɛɛ ndɔ ne idweng nɛ niten nisii kɛ ryɔng nang. 25Sɔng ɛ tɔk iphyik ɛlɔ ɛten ɛsii nang, sɔng ɛ ma yung tɔk ɛkɔn nang, daa ɛli ne ɛbhɛ ɛ naas ninyi na iken, ne ifɔng, nɛ nikɔn na nɛ nibhɛ sim gbik. 26Kaa lenɛ ne ɛnyi ɛdaan ne ɛTaanggbey ya ne ryɔng igbagha ɛzay yo gbik. ɛLi ne ɛTaanggbey ya ka tang ryɔng igbagha ɛzay yo, ɛ kaa ne ku hyɛ ɛrɔngɔ nituk ka ne aa shɛɛ nɛ ndɔ ɛzay ya, ne ɛ nang ɛrɔngɔ ɛlɔ gha ne aa shɛɛ nɛ. 27ɛTaanggbey kɛ mɔn ɛlɛ wo tɛ ninyi na ne tɔk, nibhɛ phɛl hang nibhɛ yaa sɛ ɛbhɛ yɔɔ. Gbik ne iphɛ ɛlɛy sɔng ɛTaanggbey ya ne ma yung so kyakyak ne ɛdɛ njwɛɛn nang. 28Daa ɛli ne ndɔ ɛTaanggbey ya ne njwɛɛn so niken, njwɛɛn i hyel, njwɛɛn i shɛɛ, ɛli nɛ nidɛng ninaa ne yaak ne ighel mon na bo, ‘Njwi soye ninɔn ɛbhɛ.’ ”
29“Ɛli ne njwɛɛn so ninɔn ɛTaanggbey ya, sɔng iphɛ kɛ ne jam mɛ njwɛɛn tas te ɛTaanggbey ya so izinariya ne ɛzurufa ne ikɛɛ ne ɛten ɛsii kɛ ryɔng ne ibɔ ɛbhɛ lenɛ ne ishweng ɛbhɛ nang. 30Ne ile de, sɔng ɛTaanggbey ya kaa bak ninyi na nggbang daa ne ibol ne re nihak nikɔn na ntsong ngga nang, daa ɛli ne sɔng nibhɛ kaa yɛɛ nang. ɛLyilyɛghaa wo, ɛTaanggbey ya ne ji bo tɛ ninyi ɛzay ya gbik hyereey nibhɛ san ɛbɔk. 31ɛTaanggbey ya kɛ ku yɛk ne ɛtuk ne ɛ sɛ bol ɛzay gbik ɛshara ne itin. Ɛ kɛ ne kasa ɛYɛso ye ɛbhɛ so ɛnyi gha ne ɛ sɛ bol ninaa ɛzay ya ɛshara gha. ɛTaanggbey ya kɛ ne tɔɔrek ninyi ɛzay ya ibol lɛdee wo ywɛywɛy ɛli ne ɛ kaa yiisik ɛYɛso yegha tsik ndɔ ne ikpuu da.”
32Ne sɛ ninyi na kɛ phok bol ne yiisik ɛYɛso yede ne ikpuu da, nidɛng ne sɛ ɛbhɛ ishwɛ ne bɛɛs, nidɛng ne yaa yɔngɔ, “Njwi sim njwi sɛ kyi ta phok kɛ ɛɛ bol ibol ne iyiisik ɛYɛso yɛdee wo ɛhak ɛtuk.” 33Nten nɛdee nggyɛ wo ne ɛBulus sa ne hyel ɛ tek itɔrɔng ngge. 34Gbik ne iphɛ ɛlɛy, nidɛng ninyi na ncɛt ne nang ne itin nɛ ne bol ɛBulus de. Ndɔ nibhɛ wo, ɛDiyɔniyus ne ɛ kaa soye ɛdɛ ndiinday ne itɔrɔng ne iGol-ɛRes de kaa sonɛ, ɛdɛ ɛkuk ka ne kaa i bok ɛbhɛ ɛDimaris ne ma sonɛ, nidɛng ninyi na gbom ne ma sonɛ.
Currently Selected:
ɛTomɛ 17: etxNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
