EVASELIO A MATEO 18
18
Tui a te u toe liliki
1I te temi aia, nee fakaoviovi age leva te kau tisipulo kia Sesu, o ui: Ko ai anai e lahi osi i te puleaga o te atu lagi? 2Pea nee paui leva e Sesu he kii toe veliveli, pea nee ina fakatuu leva ia ia i te lotomalie o natou, 3o ui: E au ui mooni atu kia koutou, kapau e mole kotou tafoki pea kapau e mole kotou liliu o hage ko ni toe liliki, e mole koutou ulu anai ki te puleaga o te atu lagi. 4Koia, ko ia ae ka fakamalalo anai o hage ko te kii toe veliveli aeni ko ia ae ka liliu anai o lahi osi i te puleaga o te atu lagi. 5Pea ko ia ae e ina tali i toku huafa he kii toe veliveli o hage ko ia aeni e ina tali ia au totonu. 6Kae, kapau e fakahiga e he tahi he tahi i te u kii toe liliki aena e tui kia au, e lelei age kia ia ke tau ki tona kia he maka fakamalu fulumeto, pea ke li ia ia ki te takele o te moana.
Te u mea fakatupu kovi mo te u mea fakatupu higa
7Malaia ki te malamanei o tupu ko te u higa! Koteuhi ko he maua ke hoko ni higa; kae malaia ki te tagata ae e tupu mai ai te higa! 8Kapau e fakahiga ia koe e tou nima pee ko tou vae, tuusi naua o li ke mamao maia koe; e lelei age kia koe tau ulu ketu pee nima mutu ki te mauli, i tau mau te u vae e lua mo nima e lua kae li ia koe ki te afi heegata. 9Pea kapau e fakahiga ia koe e tou foi mata, kapei ia ia o li ke mamao maia koe; e lelei age tau ulu ki te mauli mo he foi mata e tahi, i tau mau te u foi mata e lua kae li ia koe ki te afi o te seene*.
10Kotou tokaga naa kotou mea noai he tahi pe i te u toe liliki aeni; koteuhi e au ui atu kia koutou e sio tuumau onatou aselo i te atu lagi ki te u mata o taku Tamai ae e nofo i te atu lagi. 11Koteuhi nee hau te Foha o te tagata o haofaki te mea ae kua puli.
12Kotea takotou manatu? Kapau e mau e he tagata ni ovi e teau, pea e hehe he ovi e tahi ia natou, pe e mole ina tuku te hivagofulu ma hiva i te mouga, kae alu ia ia o kumi ae kua hehe? 13Pea, kapau e ina mau ia ia, e au ui mooni atu kia kotou, e lahi age tona fiafia i te ovi aena e tahi i te u ovi e hivagofulu ma hiva ae nee mole hehe. 14Koia e mole ko te finegalo o takotou Tamai i te atu lagi ke puli he toko tahi i te u toe liliki aena.
Lekula i te Ekelesia; loto tahi i te faikole
15Kapau nee agahala tou tehina, alu o fakatonutonu ia ia, ia koe pe mo ia. Kapau e fakalogo ia ia kia koe, pea kua ke malo i tou tehina. 16Kae, kapau e mole fakalogo ia ia kia koe, too mo koe he toko tahi pee ko he toko lua, koteuhi ke fakatokatoka te u mea fuli i te fakamooni a he toko lua pee ko he toko tolu. 17Kapau e mole fia fakalogo ia ia kia natou, fakaha ia ia ki te Ekelesia; pea kapau e mole fia fakalogo foki ia ia ki te Ekelesia, ke hage ia ia kia koe ko he tagata pagani, pee ko he popelikano. 18E au ui mooni atu kia kotou, ko te u mea fuli ae e kotou hai anai i te kele e hai anai i te lagi, pea ko te u mea fuli ae e kotou veteki anai i te kele e veteki anai i te lagi.
19E au toe ui atu foki kia kotou, kapau e loto tahi he toko lua ia koutou i te kele o kole he mea pe, e foaki anai ia ia kia naua e taku Tamai ae e nofo i te atu lagi. 20Koteuhi ko te kogamea ae e fakatahi ai i toku huafa he toko lua pee ko he toko tolu, e au nofo i te lotomalie o natou.
21Pea nee fakaovi age leva ia Petelo kia ia, o ui: Aliki, pe e tua fia anai taku fakamolemole ki toku tehina, moka agahala mai ia ia kia au? Pe e kaku anai ki te tua fitu? 22Nee ui leva e Sesu kia ia: E mole au ui atu kia koe e kaku ki te tua fitu, kae e kaku ki te tua fitugofulu ma fitu tua fitu.
23Koia, e fakatatau leva te puleaga o te atu lagi ki he hau ae nee loto ke ina tanaki te u maua o ana tagata faifekau. 24Nee ina kamata tanaki leva, pea nee aumai leva kia ia he tahi ae nee maua kia ia ko ni foi taimane* e hogofulu afe. 25Pea nee mole ina mau he mea ke hui ai tona maua, pea nee fakatotonu leva e tona pule ke fakatau ia ia, mo tona ohoana, mo ana fanau, pea mo te u mea fuli nee ina mau, ke hui ai te maua. 26Nee to tuutuli ifo leva te tagata faifekau o punou ki te kele i ona mua, o ui: Aliki, ke ke faa kataki mai kia au, pea e au hui atu anai te u mea fuli kia koe. 27Nee ofa mamahi leva te pule o te tagata faifekau kia ia, o tuku ia ia ke alu, pea nee ina fakamolemole leva kia ia tona maua. 28I tana ulu ki fafo, nee felavei leva te tagata faifekau aia mo he tahi i ona kaumea ae nee tuu maua kia ia ko foi tenalio e teau. Nee ina puke leva ia ia, o kukumi tona kia, o ui: Hui mai tou maua kia au. 29Pea nee to tuutuli ifo leva tona kaumea, o kolekole kia ia, o ui: Ke ke faa kataki mai kia au, pea e au hui atu anai kia koe. 30Kae nee mole loto leva ia ia ki ai, pea nee alu leva ia ia o li ia ia ki te pilisoni, o kaku ki te osi o te hui o tona maua. 31Nee sio leva ona kaumea ki te mea nee hoko, pea nee natou loto mamahi lahi osi, pea nee natou olo leva o fakamatala ki tonatou pule te u mea fuli nee hoko. 32Pea nee paui leva e te pule tana tagata faifekau, o ui kia ia: Tagata faifekau agakovi, nee au fakamolemole katoa tou maua kia koe, koteuhi nee ke kolekole mai kia au; 33pe nee mole tonu foki ke ke ofa mamahi ki tou kaumea, o hage ko taku ofa mamahi kia koe? 34Pea nee ita lahi osi leva tona pule, pea nee ina tuku leva ia ia ki te kau fakataga, o kaku ki tana hui katoa tona maua. 35Pea e fai fena anai kia koutou e taku Tamai ae e nofo i te atu lagi, mo kapau e mole koutou tahi fakamolemole ki tona tehina i te loto katoa.
Currently Selected:
EVASELIO A MATEO 18: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
