EVASELIO A MATEO 10
10
Gaue a te toko hogofulu ma lua
1Pea nee ina kalagai leva ana tisipulo e toko hogofulu ma lua, pea nee ina tuku leva kia natou te pule ke natou kapu te u laumalie kovi, pea mo fakamauli te u mahaki mo te u maimoa fuli.
2Koeni te u higoa o te kau apositolo e toko hogofulu ma lua. Ko te uluaki, ko Simone, nee higoa ko Petelo, pea mo Atelea, tona tehina; mo Sakopo, foha o Sepeteo, pea mo Soane, tona tehina; 3mo Filipo, pea mo Patolomeo; mo Toma, pea mo Mateo, ko te popelikano; mo Sakopo, foha o Alefeo, pea mo Tateo; 4mo Simone, te Kananito, pea mo Sutasi, te Isekaliote, ae nee ina fakatau ia Sesu.
5Koena te toko hogofulu ma lua ae nee fekaui e Sesu, i te osi o te tuku kia natou te u fakahinohino aeni: Aua naa kotou olo ki te hahai pagani, pea aua naa koutou ulu ki te u kolo o te kau Samalitana. 6Kae kotou olo tafito ki te u ovi pulinoa o te fale o Iselaele. 7Kotou olo, koutou fakaha, o koutou ui: Kua fakaovi mai te puleaga o te atu lagi. 8Kotou fakamauli te kau mahaki, kotou fakatuuake te kau mate, kotou fakamaa te kau kilia, kotou kapu te kau temonio. Nee kotou mau hala totogi, pea kotou foaki hala totogi. 9Aua naa kotou too he aulo, pee ko he paaga, pee ko ni piesi i okotou kilii pipi; 10pee ko he taga ki te folau, pee ko ni kofu e lua, pee ko ni sulie, pee ko he tokotoko; koteuhi e tonu ke mau e te tagata gaue tana meakai.
11I te u kolo lalahi pea mo te u kolo liliki ae e kotou ulu ki ai, kotou fehui pe e i ai he tagata ae e loto lelei ke ina fakatalitali koutou, pea kotou nonofo i tona fale o kaku ki takotou toe mavae. 12I te ulu ki te loto fale, kotou ui: Ke nofo te tokalelei mo koutou! 13Pea kapau e tali e te loto fale aena, pea ke hifo tokotou tokalelei ki te loto fale aena; kae kapau e mole tali e te loto fale aena, pea ke toe liliu mai tokotou tokalelei kia koutou. 14Kapau e mole fakatalitali anai koutou pea e mole fakalogo anai ki akotou folafola, kotou mavae i te fale aena pee i te kolo aena, pea kotou tutui te efu i okotou vae. 15E au ui mooni atu kia koutou: I te aho o te fakamaau, e tauteai anai te fenua o Sotoma mo Komola o maamaa age i te kolo aena.
Fakataga ka hau
16Koeni, e au fekaui koutou o hage ko ni ovi ki lotomalie o ni lupo. Kotou popoto o hage ko ni gata, pea kotou agalelei o hage ko ni lupe hina. 17Koutou tokaga ki te u tagata; koteuhi e natou ave anai koutou ki te u telepinale, pea e natou haha anai koutou aki ni akau i onatou sinakoka; 18e taki anai koutou, o tupu ko au, kia mua o ni kovana, pea mo ni hau, ke kotou liliu ko ni fakamooni kia natou pea mo te kau pagani. 19Kae ka fakatau anai koutou, aua naa kotou tuania pe e feafeai anai akotou palalau, pea kotea anai akotou palalau: E tuku atu anai kia koutou te mea ae e tonu ke kotou fakaha i tona hola totonu; 20koteuhi e mole ko koutou ae ka palalau anai, kae ko te Laumalie Maonioni o takotou Tamai ae ka palalau anai ia koutou.
21E fakatau anai e te tehina tona tehina ki te mate, pea ko te tamai tana fanau; e malaga anai te u fanau ki anatou matua, o tamatei natou. 22E fehia anai kia koutou te hahai fuli, o tupu ko toku huafa; kae ko ae e kataki fualoa anai o kaku ki te fakaosi e haofaki anai. 23Ka gaohi kovii anai koutou i he kolo, kotou feholaki ki he tahi age kolo. E au ui mooni atu kia koutou, e heeki osi takotou folii te u kolo o Iselaele, kae kua hau te Foha o te tagata.
24E mole lahi age te tisipulo i te pule, pee ko te tagata faifekau i tona aliki. 25E feauga pe ki te tisipulo ke tatau mo tona pule, pea mo te tagata faifekau ke tatau mo tona aliki. Kapau nee natou ui ki te pule o te fale ko Pelesepu ia ia, pea e natou toe ui fena anai ki te u hahai o tona fale! 26Aua naa kotou matataku kia natou, koteuhi e mole pe he mea ae e ugia e mole tonu ke ha, pea e mole pe he mea e lilo e mole tonu ke iloi. 27Ko te mea ae e au fakaha atu kia koutou i te fakapouli, kotou fakaha ia ia i te malama; pea ko te mea ae e fanafana atu ki okotou taliga, kotou fakaha ia ia i te tuapatu. 28Aua naa kotou mataku kia natou ae e natou tamatei te sino kae e mole feala ke natou tamatei te laumalie; kotou mataku tafito ki ae e ina tamatei te laumalie pea mo te sino i te seene*. 29Pe e mole fakatau koa ni kii misi e lua ki he foi piesi e tahi? Kae e mole pe to he kii misi e tahi ki te kele, hala mo te finegalo o takotou Tamai. 30Pea kua lau fuli okotou fului ulu. 31Aua pe naa kotou mataku: E mauhiga lahi age koutou i ni faga misi.
32Koia, ko ae e ina fakaha ia au ia mua o te kaugamalie, e au fakaha anai ia ia ia mua o taku Tamai ae e nofo i te atu lagi. 33Kae ko ae e fakafisi anai kia au ia mua o te u tagata, e au toe fakafisi anai kia ia ia mua o taku Tamai ae e nofo i te atu lagi.
34Aua naa kotou ui nee au hau o aumai te tokalelei ki te kele; nee mole au hau o aumai te tokalelei, kae te heleta. 35Koteuhi nee au hau o veteki te tama mo tana tamai, te taahine mo tana fae, te fafine ohoana mo te fae o tona ohoana; 36pea e mau anai e te tagata ona fili i te hahai o tona api. 37Ko ae e ofa ki tana tamai pee ki tana fae o lahi age ia au, e mole gali ia ia mo au, pea ko ae e ofa ki tona foha pee ki tona ofafine o lahi age ia au, e mole gali ia ia mo au; 38ko ae e mole ina too tona koluse, pea e mole muli mai ia au, e mole gali ia ia mo au. 39Ko ae e ina taupau anai tona mauli e pulinoa anai ia ia, pea ko ae e pulinoa anai tona mauli o tupu ko au e ina toe mau anai ia ia.
40Ko ae e ina tali koutou e ina tali au, pea ko ae e ina tali au, e ina tali anai ia ia ae nee ina fekaui mai au. 41Ko ae e ina tali he polofeta i tona uhiga polofeta e ina tali anai he fakapale o te polofeta, pea ko ae e ina tali he tagata faitotonu i tona uhiga faitotonu e ina tali anai he fakapale o te tagata faitotonu. 42Pea ko ae e ina foaki anai he ipu vai momoko e tahi ki he tahi i te u toe liliki aeni koteuhi ko taku tisipulo ia ia, e au ui mooni atu kia kotou, e mole pulinoa anai tona fakapale.
Currently Selected:
EVASELIO A MATEO 10: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
