SENESI 48
48
Tapuaki a Sakopo ki foha o Sosefo
1I te osi o te u mea aia, nee fakaha leva kia Sosefo: Koeni kua mahaki tau tamai. Pea nee too leva e Sosefo ona foha e toko lua ko Manase mo Efalaimi, o ave kia Sakopo. 2Pea nee fakaha leva kia Sakopo: Koeni tou foha ko Sosefo e hau kia koe. Pea nee tanaki leva e Iselaele te gataaga o tona malohi ae kei nofo mo ia, o lala i tona palepale.
3Pea nee ui leva e Sakopo kia Sosefo: Nee ha mai kia au te Atua Mafimafi i Luse, i te fenua o Kanaane, pea nee tapuaki mai ia ia kia au. 4Pea nee ina ui mai kia au: E au fakaliliu anai ia koe o fanaunau, pea e au liuliuga anai ia koe, pea e au fakahoko anai ia koe ko ni hahai kaugamalie, pea e au foaki anai te fenua aeni ki tou hakoga ae kei muli mai, ke ina mau o heegata. 5I te aho nei, ko te u foha e lua, ae nee tupu kia koe i te fenua o Esipito ia mua o taku tau mai kia koe i Esipito nei, e ke foaki mai anai naua kia au: E liliu anai ia Efalaimi mo Manase ko aku fanau o hage ko Lupeni mo Simeone. 6Kae ko te u foha ae e ke toe mau anai ki muli, e foaki atu anai natou kia koe. E mau anai e Efalaimi mo Manase ona tofiga i te kele o ona tehina ko Lupeni mo Simeone. 7I taku toe liliu mai mai Patane, nee mate leva ia Lasele i oku tafa i te ala, i te fenua o Kanaane, ovi ki Efalata; i te kogamea aia nee au tanu ai leva ia Lasele, i te ala o Efalata, ae ko Petelehemi.
8Pea nee sio leva ia Iselaele ki te u foha o Sosefo, pea nee ina ui leva: Ko ai ia naua aeni? 9Nee tali leva e Sosefo ki tana tamai: Ko oku foha, ae nee foaki mai e te Atua kia au i te fenua aeni. Pea nee ui leva e Iselaele: E au kole atu kia koe, ke ke fakaovi mai ia naua kia au ke au tapuaki kia naua. 10Kua kovi foki te u mata o Iselaele, koteuhi kua matua osi ia ia, pea nee mole kei sio lelei ia ia. 11Pea nee ui leva e Iselaele kia Sosefo: Nee mole au amanaki e au toe sio anai ki ou mata, pea koeni kua fakasio au e te Atua ki tou hakoga. 12Pea nee too leva e Sosefo ona foha ae nee heheka i te u tuli o tana tamai ko Sakopo, o tuku ki lalo, pea nee punou leva ia ia i ona mua. 13Pea nee too leva e Sosefo ona foha lualua, o taki tahi i ona nima: pea nee ina too leva ia Efalaimi i tona nima matau o fakatuhatonu ki te nima hema o Iselaele, kae nee ina too leva ia Manase i tona nima hema o fakatuhatonu ki te nima matau o Iselaele. Pea nee ina fakaovi age leva ia naua kia Iselaele. 14Nee falo leva e Iselaele tona nima matau o hili ki te ulu o Efalaimi, ae e muli, kae nee ina faoi leva tona nima hema o hili ki te ulu o Manase, ae nee mua. Nee ina fai te mea aia i te atamai malama. 15Nee tapuaki leva ia ia kia Sosefo, o ui: E au kole ki te Atua ae nee haele i mua o aku tamai ko Apalahamo mo Isaake, ki te Atua ae nee ina taki au talu mai taku tupu o kaku mai ki te aho aeni, 16ki te aselo ae nee ina haofaki au mai te u tuutamaki fuli, e au kole kia ia ke tapuaki ki te u fanau aeni! Ke na fakamauli toku higoa o hage ko te higoa o aku tamai ko Apalahamo mo Isaake, pea ke na liuliuga o lahi i te fenua katoa! 17Nee mole lelei kia Sosefo te haga a tana tamai o hili tona nima matau ki te ulu o Efalaimi; pea nee fa leva ia ia ki te nima o tana tamai, o too mai te ulu o Efalaimi, o hili ki te ulu o Manase. 18Pea nee ui leva e Sosefo ki tana tamai: E ke faihala, taku tamai! E uluaki ia ia aeni, ke ke hili tou nima matau ki tona ulu! 19Kae nee fakafisi tana tamai, o ui kia ia: E au iloi, oi toku foha, e au iloi! Mo ia foki e liliu anai ia ia ko he hahai kaugamalie, mo ia foki e liliu anai ia ia ko he puleaga lahi; kae e liliu anai tona tehina muli o lahi age ia ia, pea e liliu anai tona hakoga ko ni puleaga kaugamalie. 20I te aho aia, nee tuku leva e Iselaele tana tapuaki kia naua, o ui: E too anai e te hahai o Iselaele okolua higoa, moka natou fai anai ni tapuaki, o ui: Ke manavaofa te Atua kia koe o hage ko tona manavaofa kia Efalaimi mo Manase!
21Nee ui leva e Iselaele kia Sosefo: Koeni ka au mate anai! Kae e nofo anai te Atua mo koutou, pea e toe fakaliliu anai ia koutou e te Atua ki te fenua o akotou tamai. 22E au foaki atu kia koe he vaega ae e lahi age i te u vaega fuli o ou tehina, e au foaki kia koe te fenua o Siseme ae nee au mau mai te nima o te kau Amole aki taku heleta mo taku nahau.
Currently Selected:
SENESI 48: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
