Tohi a Paulo ki te kau KALATE 6
6
Fakatuutuu ki te mauli fakakilisitiano
1U tehina, kapau e mautoka he tahi i he hala, ko koutou ae e fakalaumalie, kotou aumai ia ki te ala totonu, kotou fai ia mo he agamalu. Tokaga kia koe totonu, ke aua naa toe fakahalai foki mo koe. 2Kotou feamoaki akotou kavega, pea e kotou fakahoko anai i ai te lao a Kilisito. 3Kapau e manatu he tahi e mauhiga ia, e ko he mea noa ia, e ina kakaai pe ia ia totonu. 4Kae ke tahi vakai e te tagata ana gaue totonu, pea hoki feala anai ke ina fakakololia ia ia toko tahi, kae e mole i te u gaue a he tahi age, 5koteuhi e tahi amo anai e te tagata tana kavega totonu.
6Ko ae e akonaki ki ai te folafola, ke ina foaki he vaega i ana mea fuli ki ae e akonaki.
7Aua naa kotou faihala i te mea aia: E mole nukinuki ki te Atua. Ko te mea ae e nunusi e he tagata, e ina toe utu anai ia. 8Ko ae e ina nunusi i tona kakano e ina utu anai mai te kakano te pala; kae ko ae e ina nunusi i te Laumalie e ina utu anai mai te Laumalie te mauli heegata. 9Aua naa tou piko i te fai o te mea e lelei; koteuhi e tou utu anai i tona temi totonu, mo kapau e mole tou fakaauauganoa. 10Koia i te kei tou mau te faigamalie, tou fai te mea e lelei ki te u tagata fuli, kae tafito ki te u tehina i te tui.
11Koutou sio ki te lalahi o te u mataitohi ae e au faitohi atu ai i toku nima totonu.
12Ko natou fuli e fia lelei ki te kakano e natou fakamaua koutou ki te silikosisio, ke aua naa fakatagai natou o uhiga mo te koluse o Kilisito. 13Koteuhi ko te kau hee silikosisio totonu foki e mole natou taupau te lao; kae e natou loto ke kotou silikosisio, uhi pe ke natou fakakololia i tokotou kakano. 14Kia au, e mamao maia au te manatu ke au fakakololia i he tahi age mea kehe, kae i te koluse pe o totatou Aliki ko Sesu-Kilisito, aki ia ia kua kolusifikoi te malamanei o uhiga mo au, o hage ko au kua kolusifikoi o uhiga mo te malamanei. 15Koteuhi ia Kilisito e mole he uhiga o te silikosisio pee ko te hee silikosisio; ko te mea ae e mauhiga ko te liliu ko he mea kua tupu foou. 16Tokalelei mo manavaofa kia natou fuli ae e mulimuli anai ki te lekula aia, pea mo te Iselaele a te Atua!
17Koia ke aua naa fakamamahii toku loto e he tahi, koteuhi e au mau i toku sino te u fakailoga o Sesu.
18U tehina, ke nofo te kalasia o totatou Aliki ko Sesu-Kilisito i okotou laumalie! Ameni!
Currently Selected:
Tohi a Paulo ki te kau KALATE 6: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
