Tohi a Paulo ki te kau KALATE 4
4
1Koeni, e au toe fakaha: Ko te foha mau tofiga, i te temi katoa e tamasii ai, e mole kehekehe ia mo he tagata popula, logo ai ko te pule ia o te u mea fuli; 2koteuhi e fakalogo ia ki te kau tagata faiako mo te kau tagata taupau koloa, o kaku ki te temi nee fakatuutuu e tana tamai. 3Ko tatou foki, e tou tatau, i te temi nee kei tou tamasii ai, nee tou popula ki te u malohi fakalaumalie o te malamanei;
Kua osi te kilisitiano i te totogi mai te lao
4kae i te kaku mai o te temi nee fakatuutuu ki ai, nee fekaui mai leva e te Atua tona Alo, ae nee tupu mai he fafine, ae nee tupu i te lao, 5ke ina totogi natou nee nofo i te lao, pea ke tou tali te vavae.
E fakamooni te Laumalie kua liliu ae e tui ko te foha o te Atua
6Pea koteuhi ko te u foha koutou, kua fekaui mai e te Atua ki otatou loto te Laumalie o tona Alo, ae e kalaga: Abba! Tamai! 7Koia e mole kei ke popula ai, kae ko he foha ia koe; pea kapau ko he foha ia koe, e ke mau tofiga foki i te kalasia o te Atua.
Ko te tauhi fakalao ko he lotu noa
8I mua, nee mole kotou iloi te Atua, pea nee kotou tauhi ki ni atua ae nee mole ko ni atua mooni; 9kae i te temi nei kua kotou iloi ai te Atua, pea kua iloi foki koutou e te Atua, kotea e kotou toe liliu ai o tauhi ki te u taulaatua gaegae mo masiva aena e kotou loto ke kotou toe popula ki ai? 10E kotou tauhi te u aho, mo te u mahina, mo te u temi, pea mo te u tau! 11E au mataku naa alu noa taku gaue kia koutou. 12U tehina, e au kole atu kia koutou: Kotou hage ko au, koteuhi ko au foki e au hage ko koutou. Nee mole kotou fai he mea e kovi kia au. 13E kotou iloi pe nee au fakaha kia koutou te Evaselio i te kamataaga uhi ko he mahaki fakasino. 14Pea i tokotou ahiahii e toku sino mahaki, nee mole kotou fehia pee fakalialia kia au; kae nee kotou tali au o hage ko he aselo a te Atua, o hage ko Sesu-Kilisito.
Ko te tauhi fakalao nee ina fakamamao te tapuakina o te kalasia i te kau Kalate
15Pe kofea leva te manuia ae nee kotou fakaha? Koteuhi e au fakamooni atu kia koutou, kapau nee kotou fealagia, nee kotou kape leva okotou mata o foaki mai kia au. 16Pe kua au liliu ko tokotou fili i taku fakaha atu kia koutou te mooni? 17Ko te ofa ae e natou mau kia koutou e mole maa, kae e natou loto ke veteki koutou maia matou, ke kotou ofa kia natou. 18E lelei te mau o te ofa ki te mea e lelei i te temi fuli pe, kae aua naa gata pe moka e au nofo mo kotou.
E mole feala ke mauli fakatahi te lao mo te kalasia
19Aku fanau, ae kua au toe logoi o uhiga mo koutou te u mamahi fanau, o kaku ki te katoa o Kilisito ia koutou, 20e au fakaamu age ke au nofo i te lakaga nei i okotou tafa, pea ke au fetogi taku palalau, koteuhi e au nofo mo he tuania o uhiga mo koutou.
Fakatata o te u hai e lua: Akale mo Sala
21Koutou fakaha mai kia au, e kotou ae e loto ke fakalogo ki te lao, pe e mole kotou logo ki te mea e fakaha e te lao? 22Koteuhi kua tohi nee mau e Apalahamo ni foha e lua, ko he tahi i te fafine popula, pea ko he tahi i te fafine ateaina. 23Kae ko ae o te fafine popula, nee tupu ia mai te kakano, pea ko ae o te fafine ateaina nee tupu ia mai te fakapapau. 24Ko te u mea aena ko te u fakatata; koteuhi ko te u fafine aena, ko te u hai e lua. Ko te tahi o te mouga ko Sinai, ae nee fanau ki te popula, ko Akale, 25koteuhi ko Akale, ko te mouga aia o Sinai i Alapia, pea e hage ia ko te Selusalemi o te temi nei, ae e nofo i te popula mo ana fanau. 26Kae ko te Selusalemi mai oluga e ateaina ia, ko tatatou fae aia;
27 Koia e tohi ai:
Ke ke fiafia, ia koe ae e paa, ia koe ae e mole fanaunau!
Ke ke hiki tou leo o kalaga fakafiafia, ia koe ae nee mole ina iloi te u mamahi fanau!
Koteuhi ko te u fanau o te fafine siakina e kaugamalie age anai
I te u fanau o te fafine ae nee ohoana.
28Kia koutou, u tehina, o hage ko Isaake, ko te u fanau koutou o te fakapapau; 29pea o hage ko mua atu, nee fakatagai e ia ae nee tupu i te kakano ia ae nee tupu i te Laumalie, e toe tatau foki i te temi nei. 30Kae kotea te ui a te Tohi? Kapu te fafine popula mo tana tama, koteuhi e mole mau tofiga fakatahi anai te tama a te fafine popula mo te tama a te fafine ateaina. 31Koia, u tehina, e mole ko te u fanau tatou a te fafine popula, kae a te fafine ateaina.
Currently Selected:
Tohi a Paulo ki te kau KALATE 4: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
