Tohi a Paulo ki te kau KALATE 2
2
Paulo mo te kau apositolo i Selusalemi
1Hili tau e hogofulu ma fa, nee au toe hake leva ki Selusalemi mo Palenapa, pea nee au ave foki mo au ia Tito. 2Nee au hake ki ai uhi ko he levelasio*. Pea nee au fakamatala leva kia natou te Evaselio ae e au akonaki i te kau pagani; pea nee au fakamatala tafito ia kia natou e iloa, ke aua naa noa taku lele. 3Kae ko Tito, ae nee nofo mo au, pea nee Keleka, nee mole fakamaua leva kia ia te silikosisio. 4Pea ko te mea aena o uhi ko te u tehina loi ae nee ulu fakafufu mai kia matou, ke natou vakai te mauli ateaina kua matou mau ia Sesu-Kilisito, mo te manatu ke natou fakapopulai matou. 5Kae nee mole pe matou vaivai i he kii temi ia natou, pea nee matou taui anatou tonu malohi, uhi ke taofi te mooni o te Evaselio ia koutou. 6Ko natou ae e logologona – e mole mauhiga kia au onatou aluaga totonu: Koteuhi e mole fakapalatahi te Atua – ko natou aia nee logologona nee mole natou fakamaua mai kia au he mea. 7Kae i tanatou sio kua tuku mai kia au te Evaselio ki te kau hee silikosisio, o hage ko tona tuku kia Petelo o te Evaselio ki te kau silikosisio 8– koteuhi ko ae nee ina fakanofo ia Petelo ko te apositolo o te kau silikosisio nee ina toe fakanofo foki au ko te apositolo o te kau pagani – 9pea i tanatou iloi te kalasia nee tuku mai kia au, ko Sakopo, mo Kefasi, pea mo Soane, ae e ui ko te u pou tafito, nee natou foaki mai kia au mo Palenapa te nima matau, ke ma olo ki te kau hee silikosisio, kae ko natou ki te kau silikosisio. 10Nee natou kole mai pe ke ma manatui te kau masiva; mea nee au tokaga aipe o fai ia.
Fakafehagai a Paulo kia Petelo i Atiokia
11Kae i te hau leva a Kefasi ki Atiokia, nee au tuu leva ki oluga o fakafehagai kia ia i ona mua, koteuhi nee kua hala ia. 12He i mua o te kaku mai a ihi maia Sakopo, nee kai ia mo te hahai pagani, kae i tanatou kaku mai, nee hola leva ia o tuu kehe, i tona mataku ki te hahai silikosisio. 13Pea nee fai fakamalualoi leva mo ia te toega o te kau Sutea; koia nee toe pikisia ai foki mo Palenapa i tanatou malualoi. 14I taku sio nee mole natou haele fakahagatonu o mulimuli ki te mooni o te Evaselio, nee au ui leva kia Kefasi ia mua o natou fuli: Kapau ko koe ae e Sutea, e ke mauli i heni o hage ko te hahai pagani, kae e mole ke mauli o hage ko te hahai Sutea, kotea e ke fakamaua ai te kau pagani ke natou mauli o hage ko te hahai Sutea?
Kua mate te kilisitiano ki te lao; kua osi tona fakamaau i te fai
15Ko tatou, e tou Sutea i te tupu, kae e mole ko te kau agahala tatou o te atu puleaga pagani. 16Kae e tou iloi e mole fakamatatonu te tagata ia mua o te Atua aki te u gaue a te lao, kae aki te tui kia Sesu-Kilisito, ko matou foki nee matou tui kia Sesu-Kilisito, o uhi ke fakamatatonu matou aki te tui kia Kilisito kae e mole aki te u gaue a te lao, koteuhi e mole fakamatatonu anai he tahi aki te u gaue a te lao. 17Kae kapau, i tatatou kumi ke fakamatatonu tatou ia Kilisito, kua mau tatou ko te kau agahala, pe kua liliu ia Kilisito ko he tagata gaue a te agahala? Kailoa! 18Koteuhi, kapau e au toe fakatuu te mea ae nee au maumaui, e au fakaliliu ia au totonu ko he tagata maumau lao. 19Koteuhi aki te lao kua kau mate ki te lao, ke au mauli ki te Atua.
Ko te mauli fakakilisitiano ko te fakaha o te mauli o Kilisito
20Kua kolusifikoi au fakatahi mo Kilisito, pea kapau e au mauli, e mole ko au ae e kei mauli, ko Kilisito ae e mauli ia au; pea kapau e kei au mauli i te temi nei i te kakano, e au mauli i te tui ki te Alo o te Atua, ae nee ofa kia au, pea nee ina foaki ia ia uhi ko au.
Ko te fio o te lao mo te kalasia e ina fakanoai te kalasia
21E mole au fakafisi ki te kalasia o te Atua; koteuhi, kapau e mau te faitotonu i te lao, pea nee mole he uhiga o te mate o Kilisito.
Currently Selected:
Tohi a Paulo ki te kau KALATE 2: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
