EKESOTE 27
27
Te aletale sila
1E ke fai anai te aletale aki te akasia; ko tona loa ko meta e lua vaelua, pea ko tona laulahi ko meta e lua vaelua. E mulii mea tatau anai te aletale, pea ko tona maoluga e meta tahi vaelua. 2E ke fai anai i te u tuliki e fa o te aletale, ni tala ae e ulu ake mai te aletale; pea e ke aofi anai ia ia aki te sila. 3E ke fai anai ki te aletale ni tanakiaga lefulefu, mo ni huo takele, mo ni pesini, mo ni huki, pea mo ni tanakiaga mamala; e ke fai anai te u mea gaue fuli aia aki te sila. 4E ke fai anai ki te aletale he ukamea pupu sila, pea e ke fakapipiki anai ni kave sila e fa ki te u tuliki e fa o te ukamea pupu. 5E ke tuku anai te ukamea pupu ki lalo o te laugutu o te aletale, ke pipiki i lotomalie o te maoluga o te aletale. 6E ke fai anai ni akau amo ki te aletale aki te akasia, pea e ke aofi anai naua aki te sila. 7E ke fakaulu anai te u foi amo i te u kave; pea e pipiki anai te u foi amo ki te u fahai lualua o te aletale, ke amo ai ia ia. 8E ke fai anai te aletale ke loloto ia loto, aki ni papa; e ke fai anai ia o fakatatau ki te paaki ae nee fakaha kia koe i te mouga.
Te malae mo tona matapa
9E ke fai anai he lotoa o te tapenakulo. Ki te fahai ae e haga ki te saute, e ke tau anai ni kie hina malohi ke puipui ai te malae: ko te loa o te fahai aia, ko meta e nimagofulu, 10pea mo ona pou e uafulu ae e fakatuu anai ki ni tuuaga sila e uafulu; e fai anai aki te siliva te u tautauaga o te u pou mo te u tautauaga o te u puipui. 11Ki te fahai ae e haga ki te noleto, e ke tau anai ni kie puipui, ko te loa o te fahai aia ko meta e nimagofulu; mo ona pou e uafulu mo onatou tuuaga sila e uafulu; e fai aki anai te sila te u tautauaga o te u pou mo te u tautauaga o te u puipui. 12Ki te fahai ae e haga ki te uesite, e ke tau anai ni kie puipui hina, ko tona loa ko meta e uafulu ma nima pea ko te laulahi aia o te malae, mo ona pou e hogofulu, pea mo onatou tuuaga e hogofulu. 13Ki te fahai ae e haga ki te esite, ia meta e uafulu ma nima o te laulahi o te malae, 14e ke tau anai mai te tahi tuliki o te malae, ia meta e fitu vaelua, ni kie puipui, mo foi pou e tolu mo onatou tuuaga e tolu, 15pea e ke toe tau anai mai te tuliki ake ae, ia meta e fitu vaelua, ni kie puipui, mo ni foi pou e tolu mo onatou tuuaga e tolu. 16I te matapa ulu o te lotoa, e ke tau ai anai he lito, ko tona loa ko meta e hogofulu; e fai anai te lito aki te kie malohi, kua gauei fakateuteu aki ni filo uui, mo ni filo kula fakapouli, mo ni filo kula toto, mo ni filo hina, mo pou e fa mo onatou tuuaga e fa. 17Ko te u pou fuli ae e natou takatakai te malae e natou mau ni tautauaga siliva, mo ni fao siliva, pea mo ni tuuaga sila. 18Ko te loa o te malae ko meta e nimagofulu, ko tona laulahi ko meta e uafulu ma nima, pea ko tona maoluga ko meta e lua vaelua; e fai anai te u kie puipui aki te filo hina malohi, pea e fai anai te u tuuaga aki te sila. 19Ko te u mea gaue fuli o te tapenakulo, mo ona pou lalo, mo te u pou lalo o te malae, e fai anai aki te sila.
Te lolo ki te u foi malama
20E ke fakatotonu anai ki te u fanau o Iselaele ke natou aumai kia koe he lolo olive maa kua tuki, ki te tuuaga malama, o tupu ke fakaulo tuumau ia ia. 21E teuteui anai te lolo e Alone mo ona foha i te falela o te fakapapau, i te potu tapu i mua o te lito, ae e ina mapunui te aleka o te fakapapau; e ulo anai te u malama ia mua o te Eteleno mai te afiafi o kaku ki te uhu. Ko he lao aia ke tuku holo ki onatou hakoga pea ke taupau e te u fanau o Iselaele.
Currently Selected:
EKESOTE 27: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
