EKESOTE 17
17
Vai o te utu i Olepe
1Nee mavae leva te fakatahiga katoa o te u fanau a Iselaele mai te toafa o Sini, o mulimuli ki te fakatuutuu ae nee tuku e te Eteleno kia natou o uhiga mo tonatou fagona; pea nee natou nonofo leva i Lefitimi, pea ko te hahai nee mole natou mau he vai ke natou inu ai i te kogamea aia. 2Pea nee fakatupu ke leva te hahai kia Moisese. O natou ui kia ia: Foaki mai he vai ke inu. Nee tali leva e Moisese kia natou: Kotea ae e kotou fakatupu ke ai kia au? Kotea e koutou ahiahii ai te Eteleno? 3Nee kua kovi osi te fia inu a te hahai, pea nee natou lalauga leva kia Moisese, o ui: Kotea ae nee ke fakamavae ai matou mai Esipito, ke matou mamate ai i te fia inu, matou mo amatou fanau pea mo amatou faga manu? 4Nee tagi leva ia Moisese ki te Eteleno o ui: Kotea e au fai anai ki te hahai aeni? Kei toe pe te kii mea veliveli, pea natou tuki makai au. 5Nee ui leva e te Eteleno kia Moisese: Alu ia mua o te hahai, pea ke olo mo koe te kau matua o Iselaele; too foki i tou nima te tokotoko ae nee ke taai ai te vaitafe, pea ke alu! 6Koeni, e au tuu anai i ou mua, i te utu o Olepe; pea e ke taai anai te utu, e tafe mai anai i ai te vai, pea e iinu ai anai te hahai. Pea nee fai feia leva e Moisese ia mua o te kau matua o Iselaele. 7Nee foaki leva e Moisese ki te kogamea aia te higoa ko Masa mo Melipa, koteuhi nee fakatupu ke te u fanau a Iselaele kia Moisese, pea nee natou ahiahii te Eteleno, o ui: Pe e nofo koa te Eteleno mo tatou, pee kailoa?
Malo ia Amaleke
8Nee hau leva ia Amaleke o taui ia Iselaele i Lefitimi. 9Nee ui leva e Moisese kia Sosue: Filifili he kau tagata, pea ke alu o taui ia Amaleke; ko apogipogi e au tuu anai i te tumutumu o te mouga mo te tokotoko o te Atua i toku nima. 10Nee alu leva ia Sosue o taui ia Amaleke o mulimuli ki te mea ae nee ui e Moisese. Kae nee hake leva ia Moisese, mo Alone, mo Ulu, ki te tumutumu o te mouga. 11Ka hiki e Moisese ona nima ki oluga, pea e malohi ia Iselaele; pea ka tuku e Moisese ona nima ki lalo, pea e malohi ia Amaleke. 12Kae i te mamafa o te u nima o Moisese, nee too leva e Alone mo Ulu he foi maka, o fakaheka ki ai ia Moisese. Kae nee na tekeni leva te u nima o Moisese e Alone mo Ulu, ko te tahi i te fahai matau, pea ko te tahi i te fahai hema; pea nee tuu fefeka leva te u nima o Moisese o kaku ki te to o te laa. 13Nee malo leva Sosue ia Amaleke mo tana hahai i te tau.
14Nee ui leva e te Eteleno kia Moisese: Tohi te mea aia ki he tohi, o tupu ke tauhi tona fakamanatu, pea ke fakaha kia Sosue e au molehi anai te higoa o Amaleke i te lalo lagi.
15Pea nee fakatuu leva e Moisese he aletale, o foaki ki ai te higoa ko Seova-Nisi, ko te Eteleno ko toku fuka. 16Nee ina ui leva: Koteuhi nee hiki e Amaleke tona nima ki te hekaaga fakahau o te Eteleno, e fakapapau te Eteleno, e taui tuumau anai e te Eteleno ia Amaleke, i te taitupu mo te taitupu.
Currently Selected:
EKESOTE 17: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
