ESITELE 2
2
Filifili o Esitele
1I te hili o te u mea aia, pea kua osi te ita o te hau ko Asuelusi, nee manatu leva ia ia kia Vaseti, mo te mea ae nee ina fai, pea mo te tonu ae nee too o uhiga mo ia. 2Pea nee ui leva e natou ae nee tauhi ki te hau: Ke kumi mai ki te hau ni taahine taupoou mo finelelei; 3ke fakanofo e te hau i te u fenua fuli o tona puleaga ni kau tagata, o tupu ke natou tanaki fakatahi te u taahine taupoou mo finelelei fuli ki Suse, te kolo mua, ki te fale o te u fafine, pea ke leoleo kia natou ia Ekai, te enuke a te hau, ae ko te tagata leoleo o te u fafine, ae e ina foaki anai kia natou te u mea fuli ae e aoga ki tonatou teuteui; 4pea e iloga te taahine ae e lelei anai ki te hau, e liliu anai ia ia ko te fafine hau o fetogi ia Vaseti. Nee lelei leva te manatu aia ki te hau pea nee fai leva ia ia ki ai.
5Nee i ai i Suse, te kolo mua, he tagata Sutea ae nee higoa ko Maletokeo, foha o Saili, foha o Simei, foha o Kise, tagata maia Pesamino, 6ae nee aumai fakapopula mai Selusalemi, mo natou ae nee aumai fakapopula mo Sekonia, hau o Suta, e Nepukatenesale, hau o Papilone. 7Nee ina taupau ia Hatasa, ae nee higoa ko Esitele, ko te taahine o tana fae tagata, koteuhi nee mole hana tamai mo hana fae. Nee kogalelei mo finelelei osi te taahine taupoou. I te mate o tana tamai mo tana fae, nee vavae ia ia e Maletokeo ko tona ofafine.
8I te fakaha o te fakatotonu a te hau mo tana lao, nee fakatahii leva ki Suse, te kolo mua, ni taahine hahai osi, o tuku natou ke leoleo e Ekai. Nee too foki mo Esitele, o ave ki te fale o te hau, ke leoleo e Ekai, te tagata leo o te u fafine. 9Nee lelei leva te taahine kia mata o Ekai, pea nee ina mau leva he kalasia i ona mua: pea nee fakavilivili leva ia ia o tuku kia Esitele te u mea fuli ae nee aoga ki tona teuteui mo tana kai, pea nee ina foaki kia ia ni taahine e toko fitu ae nee filifili i te fale o te hau, pea nee ina tuku ia Esitele mo tana kau taahine ki te kogamea lelei o te fale fafine. 10Nee mole pe fakaha e Esitele tona hahai mo tona fale, koteuhi nee tapui age kia ia e Maletokeo te palalau ki te u mea aia. 11Pea nee evaeva leva ia Maletokeo ia mua o te malae o te fale fafine, i te aho fuli, ke ina iloi pe e feafeai ia Esitele, pea kotea ae e fai anai kia ia.
12Nee fakahoahoa leva te kau taahine taki toko tahi o ulu ki te hau ko Asuelusi, i te osi o tana fai i te u mahina e hogofulu ma lua te u mea fuli ae nee fakatotonu ki te u fafine; i te temi aia, nee natou tokaga ki te teuteui o onatou sino, i te u mahina e ono aki te lolo o te mila, mo mahina e ono aki ni mea fakamagoni mo te u kaloni ae nee fakaaoga mahani e te u fafine. 13Nee fena leva te olo a te kau taahine taki toko tahi ki te hau; pea ka alu ia ia mai te fale fafine ki te fale o te hau, nee tuku kia ia ke ina too te u mea fuli ae e loto ia ia ki ai. 14Nee ulu ia ia ki ai i te afiafi; pea nee mavae ake ia ia i te uhu ki te lua fale fafine, ae nee leo e Saasake, ko te enuke a te hau ki te tauhi o tana kau sinifu. Nee mole toe liliu ia ia ki te hau, kae kapau e toe holi anai te hau kia ia, pea e paui anai ia ia i tona higoa.
15Pea nee hoko leva te temi o Esitele, ko te ofafine o Apikaile, fae tagata a Maletokeo, ae nee ina taupau ia ia ko tona ofafine, ke alu ai ki te hau, pea nee ina kole leva te mea pe ae nee fakatotonu age e Ekai, te enuke a te hau ki te tauhi o te u fafine. Nee ofainai ia Esitele e natou fuli ae nee sisio kia ia. 16Nee taki leva ia Esitele ki te hau ko Asuelusi i tona fale fakahau, i te mahina hogofulu ae ko Tepete, i te tau fitu o te hau a Asuelusi. 17Nee manako lahi osi te hau kia Esitele o lahi age i te kau taahine fuli ake ae, pea nee ina mau leva he kalasia mo te ofa ia mua o te hau o lahi age i te kau taahine fuli ake ae. Nee ina hili leva te pale fakahau ki te ulu o Esitele, pea nee ina fakanofo leva ia Esitele ko te fafine hau o fetogi ia Vaseti. 18Nee fai leva e te hau he kai lahi ki tana kau aliki katoa mo tana kau tagata faifekau, ko he kai lahi kia Esitele; pea nee ina tuku leva ni aho fakamaamaa popula i te u fenua fuli, pea nee ina fai leva ni meaofa o gali mo tona koloa to.
Iloi e Maletokeo te fono ke tamatei ia Asuelusi
19I te fakatahii tua lua o te kau taahine, nee hekaheka ia Maletokeo i te matapa o te hau. 20Nee mole fakaha e Esitele tona fale pea mo tana hahai, koteuhi nee tapui age kia ia e Maletokeo, pea nee mulimuli katoa ia ia ki te u fakatotonu a Maletokeo o hage ko te temi ae nee kei fakalogo ia ia kia ia. 21I te aho aia, nee nofo ia Maletokeo i te matapa o te hau, pea nee ita leva ki te hau ia Piketane mo Telese, ko te u enuke e toko lua a te hau, ko ni tagata leo matapa, pea nee na loto leva ke tamatei te hau ko Asuelusi. 22Kae nee iloi e Maletokeo te mea aia pea nee ina fakaha leva ki te fafine hau ko Esitele, ae nee ina toe fakaha leva ki te hau, i te higoa o Maletokeo. 23Pea nee fai leva he fekumi ki te mea aia, pea nee iloi leva tona mooni: Nee tautau leva te toko lua enuke ki he akau. Pea nee tohi leva te mea aia ki te tohi hisitolia ia mua o te hau.
Currently Selected:
ESITELE 2: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland