Tohi a Paulo ki te kau KOLOSE 4
4
1U pule, kotou foaki ki akotou tagata faifekau te mea ae e totonu mo feauga, o kotou iloi e i ai tokotou Pule foki i te lagi.
Tokoni mo te u fakaalofa
2Kotou kataki tuumau i te faikole, koutou alaala i te faikole pea koutou fakafetai ki te Atua. 3Kotou hufaki foki maua, ke avahi e te Atua kia maua he matapa o uhiga mo te folafola, pea ke feala ke au fakaha te misitelio o Kilisito, ae e tupu ai taku nofo i te u seini aeni, 4pea ke au fakaha te misitelio aia o mulimuli ki te mea ae e tonu ke au fakaha. 5Kotou haele tokaga kia natou ae e nonofo i tua, pea kotou totogi te temi. 6Ke alu tuumau te kalasia i akotou palalau, pea ke konakonai natou e te masima, uhi ke kotou iloi te tali ae e aoga ki te tagata takitahi.
7Ko Tisike, te tehina ofaina, pea ko te faifekau agatonu, toku kaumea popula i te gaue ki te Aliki, e ina fakaha atu anai kia koutou te u mea fuli o uhiga mo au. 8E au fekaui atu ia kia koutou, ke kotou iloi toma aluaga, pea ke ina fakapelepelei okotou loto. 9E au fekaui atu ia mo Onesime, te tehina agatonu mo ofaina, ae ko he tahi o koutou. E na fakamatala atu anai kia koutou te u mea fuli e hoko i heni.
10Ko Alisitake, toku kaumea i te pilisoni, e fakaalofa atu kia koutou, tatau mo Maleko, te tehina mataitama o Palenapa, (ae kua kotou mau ni fakatotonu o uhiga mo ia, kapau e alu ia kia koutou, kotou tali fakalelei ia); 11ko Sesu, e higoa ko Susitusi, e fakaalofa atu foki kia koutou. Ko natou aena e toko tolu pe i te kau Sutea, e natou gaue mo au ki te puleaga o te Atua, pea nee natou fakapelepelei toku loto. 12Ko Epafalasi, ae ko he tahi o koutou, e fakaalofa atu kia koutou; ko te tagata faifekau ia a Sesu-Kilisito, e mole toe gata tana tau o uhiga mo koutou i ana faikole, ke kotou tuu malohi o hage ko ni tagata kua katoa, o fakalogo ki te fai o te finegalo katoa o te Atua. 13Koteuhi e au tuku te fakamooni kia koutou, e nofo ia mo he loto tokaga lahi aupito kia koutou, mo natou o Laotise, pea mo natou o Ielapolisi. 14Ko Luka, te toketa ofaina, e fakaalofa atu kia koutou, pea mo Temasi.
15Fakaalofa atu ki te u tehina ae e nofo i Laotise, pea mo Nifase, pea mo te Ekelesia ae i tona fale.
16Ka osi anai te lau o te tohi aeni ia koutou, kotou faiga ke toe lau ia i te Ekelesia o te kau Laotise, pea ke kotou lau foki te tohi ae ka kaku atu anai kia koutou mai Laotise. 17Pea kotou ui kia Alikipe: Tokaga ki te gaue nee ke tali mai te Aliki, ke ke fai fakamalotoloto ia.
18E au fakaalofa atu kia koutou, ia au Paulo, i toku nima totonu. Koutou manatui mai toku u seini. Ke nofo ia koutou te kalasia!
Currently Selected:
Tohi a Paulo ki te kau KOLOSE 4: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
