TOHI GAUE A TE KAU APOSITOLO 19
19
Akonaki a Paulo i Efeso
1I te kei nofo a Apolosio i Kolinito, nee kaku leva ia Paulo ki Efeso, i te osi o tana fakalaka i te fenua o Asia. I tana felavei mo ni ihi o te kau tisipulo, nee ina ui leva kia natou: 2Pe nee koutou tali te Laumalie Maonioni, i te temi nee koutou tui ai? Nee natou tali leva kia ia: E heeki pe matou logo e i ai he Laumalie Maonioni. 3Nee ina ui leva: Ko te papitema fea ae nee koutou tali? Pea nee natou tali age leva: Ko te papitema a Soane. 4Pea nee ui age leva e Paulo: Nee faipapitema Soane i te papitema o te fakahemala, o ina ui ki te hahai ke natou tui ki ae e muli mai ia ia, ko tona uhiga, kia Sesu. 5I tana palalau aia, nee papitemai leva natou i te huafa o te Aliki Sesu. 6I te hili leva e Paulo ona nima kia natou, nee hifo leva te Laumalie Maonioni kia natou, pea nee natou palalau leva ki te u lea kehekehe, pea mo talakikite leva. 7Nee ko he kau tagata e toko hogofulu ma lua ape.
Nofo o Paulo i Efeso ia tau e lua
8Pea nee ulu leva ia Paulo ki te sinakoka o palalau fakahaha i ai. I te lolotoga o te u mahina e tolu, nee palalau ia ki te u mea o te puleaga o te Atua, o faiga ke tafoki natou nee fakalogo kia ia. 9Kae, i te fakafefeka mo te tui gataa o ni ihi, o laukovi ia mua o te kaugamalie ki te ala o te Aliki, nee siaki leva e Paulo natou. Kae nee ina too kehe leva te kau tisipulo mo ia, o ina akoi leva natou i te aho fuli i te fale ako o Tilanusi. 10Nee tau lua tana fai te mea aia, o feala ai ki te hahai katoa nee nonofo i Asia, Sutea mo Keleka, tanatou logo ki te folafola a te Atua. 11Pea nee fai leva e te Atua ni milakulo lalahi ia nima o Paulo. 12Koia leva, nee fakalave ai ki te kau mahaki ni kie pe ko ni musuala nee lave ki tona sino, pea nee puli te u mahaki, pea nee mavae mo te u temonio maia natou.
13Kae nee ahiahii leva e ni tagata Sutea kapu temonio ae nee fehikiaki, ke natou puaki kia natou nee mau ai ni laumalie kovi te higoa o te Aliki Sesu, o ui: E au fakatotonu atu kia koutou ia Sesu ae e fakaha e Paulo! 14Ko natou aena nee natou fai te mea aia, ko te u foha e toko fitu o he tagata ko Seva, tagata Sutea, ko he tahi o te kau pule faisakilifisio. 15Kae nee tali age leva e te laumalie kovi kia natou: E au iloi Sesu, pea e au iloi pe ko ai Paulo, kae ko koutou, ko ai koa koutou? 16Pea ko te tagata ae nee nofo ai te laumalie kovi nee oho age leva ia kia natou, pea nee ina puke fakamalohi leva te toko lua o natou, pea nee ina gaohi kovii naua, o natou feholaki ai mai te fale aena, kua natou telefua mo lavevea. 17Pea nee iloi leva te mea aia e te kau Sutea katoa mo te kau Keleka katoa nee nonofo i Efeso, pea nee natou matataku fuli leva, kae nee fakakololiai te huafa o te Aliki Sesu. 18Nee kaugamalie ia natou nee tui nee natou omai leva o kofesio mo fakaha te u mea nee natou fai. 19Pea ko he kaugamalie foki ia natou ae nee gaohi mea fakatemonio nee natou aumai anatou tohi o tutu ia mua o te hahai katoa: Nee fakafuafua te lahi o tona paaga ki ni foi piesi paaga e nimagofulu afe.
20Koia nee lelesili mafola ai mo malohi ai te folafola a te Aliki.
21I te hili o te u mea aena, nee manatu leva ia Paulo ke alu ki Selusalemi, o fakalaka atu i Masetonia mo Akaia. Nee ina ui: Ka osi anai taku alu ki ai, e tonu anai ke au sio i Loma. 22Nee ina fekaui leva ki Masetonia he toko lua i ona tokoni, ko Timoteo mo Elaseto, kae toe nofo atu mua ia totonu i Asia.
Maveuveu i Efeso
23I te temi aena, nee hoko leva he maveuveu lahi o uhiga mo te ala o te Aliki. 24Ko he tagata fau mea fakateuteu nee higoa ko Temetiliusi, nee ina fau aki te siliva ni fakatata liliki o te fale tapu o Atelemisi, pea nee ina fakagauei he hahai kaugamalie. 25Nee ina fakatahii leva natou aena, mo natou ae nee gaue tatau mo natou, o ui: Kau tagata, e koutou iloi e fakalogo totatou mauli ki te matani gaue aeni; 26kae kua kotou sio pea kua kotou logo, i Efeso nei mo Asia katoa, kua fakalotoi mo toho e te Paulo aena he hahai kaugamalie osi, o ui ko te u atua ae nee fau e te nima o te tagata, e mole ko ni atua natou. 27Ko te tuutamaki ae ka hoko e mole pe gata ki te haele kovi o tatatou matani gaue kae e toe fakanoai foki mo te fale tapu o te finealiki lahi ko Aletemisi, ae e atolasio ki ai ia Asia katoa mo te malamanei katoa, pea e toe puli ai foki mo tona kololia.
28Nee natou iita osi i tanatou logo ki te u palalau aena, pea nee natou kalaga leva: E lahi te Aletemisi o te kau Efeso!
29Nee maveuveu leva te kolo katoa. Nee natou feohofi fakatahi fuli leva ki te malae faigaoi, o too te toko lua Masetonia ko Kaiusi mo Alisitake, ko te kauga folau o Paulo. 30Nee loto leva ia Paulo ke alu kia mua o te hahai, kae nee taofi leva ia e te kau tisipulo; 31ko ni ihi foki o te kau pule faigaoi, ko ona kaumea, nee natou fekaui leva ni tagata kia ia, o kole age kia ia, ke aua naa alu ki te malae faigaoi. 32Nee kalaga kehekehe te hahai, koteuhi kua maveu te fakatahiga katoa, pea nee kaugamalie osi natou ae nee mole malama ki te tupuaga o tanatou fakatahi. 33Kae nee fakamavae leva mai te hahai ia Alesatelo, ae nee fakaholoholoi leva e te kau Sutea ke palalau; pea nee hiki e Alesatelo tona nima ke palalau ki te hahai. 34Kae i tanatou iloi ko he Sutea ia, nee natou kalaga fakatahi fuli leva i ni hola e lua: E lahi te Aletemisi o te kau Efeso!
35Kae nee lolomi leva te hahai e te sikalaipe o te kolo, o ui: Kau tagata Efeso, ko ai te tagata ae e mole ina iloi e taupau e te kolo ko Efeso te fale tapu o te Aletemisi lahi pea mo tona fakatata ae nee to mai te lagi? 36Koteuhi e mole feala ke fakafehagai he tahi ki te mea aena; e tonu ke koutou nonofo fakalelei pe mua, kae aua naa koutou ohofi fakavilivili he mea. 37Koteuhi kua koutou aumai te u tagata aeni, kae nee heeki natou fai ni maumau i te fale tapu, pee ko ni palalau kovi ki totatou finealiki ko Aletemisi. 38Kapau e i ai he tahi ae e mamahi ki ai Temetiliusi mo tana kau gaue, e i ai ni aho fai fakamaau, pea e i ai ni pule fakamaau; ke natou tagi ki te telepinale. 39Kapau e i ai ni ihi age mea ae e koutou sio ki ai, pea hoki fakatokatoka anai natou i te fono, o mulimuli ki te lao. 40E feala ke fakalakahalai anai tatou, o tupu ko te maveuveu ae kua hoko i te aho nei, koteuhi e mole pe he mea ke fakamooni ai te tupuaga o tatatou fakatahi aeni. I te osi o tana palalau, nee ina fakamavetevete leva te hahai.
Currently Selected:
TOHI GAUE A TE KAU APOSITOLO 19: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
