Loma 9
9
Manatu loto a Paulo ki Iselaele
1E kau fakasa le maoki ia Kilisito, e leaise kau loi fua, e fakamaoki mai loku loto kiate au i le Laumalie Maokioki : 2E kau mafaia lasi ai ti e kau mamae tuumau i loku loto. 3Talie e kau fakaamu ake ke kau malaia mo kau motusi meia Kilisito o tupu ko oku fetaina, mo oku matua i le kanofi, 4ala e Iselaele, ala e maua ia le fufui, mo le kololia, mo sai, mo le lao, mo le atolasio, mo fakapapau, 5ti mo le kau pateliaka foki, ala na tupu mei ai le tino o Kilisito, leia e taualuga i nea fuli, ko le Atua manuia o lee gato. Amene !
E kesekese le sakoga fakanatula mo le sakoga fakalaumalie
6E leaise kau pati na leaise fua le folafola a le Atua. Talie e leaise Iselaele latou fuli ala e au meia Iselaele. 7Ti e logo ai ko le sakoga latou o Apalaamo, e leaise ko latou fuli ko ana fanau ; kae e pati : Ia Isaake, e ke maua loa se sakoga e fakaigoa loa ki lou igoa, 8ko lona uiga : E leaise ko fanau o le kanofi ala ko fanau a le Atua, kae ko fanau o le fakapapau ala e lau ko le sakoga. 9Talie ko leinei le folafola o le fakapapau : I le temi totonu leinei, e kau toe au loa, ti e maua loa e Sala se vosa. 10Ti e leaise gato i ai, kae na toe fai fenaaki kia Lepeka, leia na faitoe ia Isaake lotatou tamana ; 11(talie na leikiaise tupu a toe ti na leikiaise fai fua e laua se nea e malie pe ko se nea e veli, kae o tupu ke tuumau le fakatuutuu a le Atua o mulimuli ki le filifili leia e leaise fakalogo ki gaoi kae ki leia e kalagai ia),
12na pati kia Lepeka : E fakalogo loa le muamua ki le mulimuli, o mulimuli ki le nea na tosi :
13 Na kau alofa kia Sakopo
Ti na kau vesia kia Esau.
Filifili o le kau pagani
14Kolea loa ka tou pati ? Pe leaise faitotonu le Atua ? E leai ai ! 15Talie na pati a ia kia Moisese : E kau manavaalofa loa ki leia e kau manavaalofa ki ai, ti e kau aloalofa loa ki leia e kau aloalofa ki ai. 16Koia loa, e leaise fakalogo le nea lena ki leia e loto, pe ki leia e makape, kae ki le Atua leia e manavaalofa. 17Talie na pati le Tosi kia Falaone : Na kau fakatupu ia fua a koe ke fakasa iate koe loku mafimafi, ti ke fakasa ia loku suafa i le malama nei katoa. 18Koia e manavaalofa ai a ia ki leia e loto a ia ki ai, ti e fakafefeka e ia leia e loto a ia ki ai.
19E ke pati mai loa kiate au : Kolea koi ita ai a ia ? Talie ko ai e taofi ia lona finegalo ? 20Ei tagata, ko ai a koe, ke ke fakavisi ki le Atua ? Pe pati loa le ipu kele ki leia na fau ia a ia : Kolea na ke fau ai au ke kau feneeki ? 21Pe leaise pule le tagata fai ipu ki le kele, ke fau e ia, mei se kele e tasi, se ipu mauiga ti mo se ipu masani ? 22Ti kapau kua loto le Atua ke fakasa lona sausau, ti mo fakailo lona mafimafi, na katakii e ia i se kataki fualoa lasi ni ipu o le sausau ala na fau ki le malaia, 23ti kapau kua loto a ia ke fakasa a koloa o lona kololia ki ni ipu o le manavaalofa ala na teuteui fakatomua ki le kololia : Ko ai loa ke toe pati kiate ia ? 24Koia kua kalagai e ia tatou, o leaise gato fua mei le kakai Sutea, kae mei le kakai pagani foki, 25ofaipe lona fakasa i le Tosi a Oseo : E kau fakaigoa loa ko loku kakai leia na leaise ko loku kakai, ti ko loku alofaaga le fafine leia na leaise ko se alofaaga ; 26ti i le ganea leia e pati ai kia latou : E leaise ko koutou ko loku kakai ! E fakaigoa loa latou ko vosa o le Atua mauli.
27Kae na tagi a Esaia o uiga mo Iselaele :
Ka api loa a vosa o Iselaele ofaipe le one o le tai,
Efakamauli loa se ga toetoega.
28 Talie e fakasoko loa e le Aliki lana folafola katoa i le malama nei,
Ti e fai vave loa e ia lana fakapapau.
29Ti e faipe lona fakasa e Esaia i mua atu :
Ka na leaise tuku mai
Ele Aliki o kau tau kia tatou se fakaili,
Na tou liliu loa ofaipe Sotoma,
Na tou tatau loa mo Komola.
Iselaele mo le faitotonu i le tui
30Kolea loa ke tou pati ? Ko le kau pagani, ala na leaise afa ia le faitotonu, kua maua ia le faitotonu, le faitotonu leia e au mei le tui, 31kae ko Iselaele, leia na afa ia se lao o le faitotonu, na leaise kaku ki le lao lena. 32O tupu kolea ? Talie na afa e Iselaele a ia, o leai ki le tui, kae ki a gaoi. Na lotou tukia i le fatu fakatupu siga,
33ofaipe lona tuu i le Tosi :
Ko leinei, e kau tuku i Sione se fatu fakatupu siga
Ti mo se utu fakatupu malaia,
Ti ko leia e tui kiate ia e leaise luma loa.
Currently Selected:
Loma 9: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
