Maleko 3

Fakamauli o le tagata lima mate

1Na toe ulu loa Sesu ki le sinakoka. Na nofo i ai se tagata lima mate. 2Na lotou lama loa Sesu, ke tio pe fakamauli loa e ia le tagata lena i le aso o le sapato : O tupu ke mafai ai lona fakalakasala. 3Ti na pati loa Sesu ki le tagata lima mate : Tuu ki aluga i lena, i loto malie. 4Ti na pati loa a ia kia latou : Pe taga i le aso o le sapato, ke fai se nea malie pe ko se nea veli, ke saofaki ai se tagata pe ke tamate a ia ? Kae na lotou fakalologo loa. 5Ti na tio fakaita loa a ia kia latou, i le lasi o lona mamae o tupu ko le fefeka o latou loto ; ti na pati loa a ia ki le tagata : Falo lou lima. Na falo loa e le tagata lona lima, ti na mauli loa a ia.

6Na ulu loa le kau faliseo ki fafo, i le lakaga fai lena, ti na lotou fono loa mo le kau Elote ke tamate Sesu.

Fakamauli lasi

7Na ano loa Sesu mo ana tisipulo ki le matatai o le tai o Kalilea. Ti na muli loa se kakai toka api iate ia mei Kalilea, 8mo Sutea, mo Selusalemi, mo Itumea, mo leia atu fenua o le Solotane, mo tafatafa o Tile mo Sitone. Na au loa le kakai toka api lena kiate ia, i lalatou logo ki nea fuli ala na fai e ia. 9Koia na kole loa e ia ki ana tisipulo ke taofi tuumau kiate ia se ga vaka, o tupu ke aua na teke a ia e le kakai. 10Talie, o tupu ko lana fakamauli ia ni kakai toka api, na feoso ake kiate ia latou fuli ala na maua ia ni masaki, ke fafa kiate ia. 11I le tio a laumalie veli kia Sesu, na lotou tulolo i ona mua, o tagi : Ko le Alo a koe o le Atua ! 12Kae na fakatotonu fakamakeke e ia kia latou ke aua na lotou fakasa a ia.

Filifili o le tino agafulu tupu lua

13Ti na pale loa a ia ki le mauga ; ti na kalagai loa e ia latou ala na loto a ia ki ai, ti na lotou au loa kiate ia. 14Na fakanofo loa e ia se tino agafulu tupu lua ia latou, ke nofo mo ia, 15ti ke kakau latou o fai akonaki mo le pule ke kapu ai a temonio. 16Ko leinei le tino agafulu tupu lua leia na fakanofo e ia : Ko Simone, leia na fakaigoa loa e ia ko Petelo ; 17mo Sakopo, vosa o Sepeteo, ti mo Soane, taina o Sakopo, ala na soli loa e ia ki ai le igoa ko Poanelesese, ko lona uiga ko vosa o le mana ; 18mo Atelea ; mo Filipo ; mo Patolomeo ; mo Mateo ; mo Toma ; mo Sakopo, vosa o Alefeo ; mo Tateo ; mo Simone, le Kananito ; 19ti mo Sutasi Isekaliote, leia na fakatau ia Sesu.

Agasala ki le Laumalie Maokioki

20Na lotou ano loa ki le fale, ti na toe fakatasi ake loa le kakai, ti na leaise koi mafai ke lotou kai.

21I le logo a matua o Sesu ki le nea kua soko, na lotou ano loa ko lona too ; talie na lotou pati : Kua valea a ia.

22Ti na pati loa le kau sekelipa ala na ifo mei Selusalemi : E iate ia Pelesepu ; ti e kapu e ia le kau temonio i le makeke o le pule o le kau temonio. 23Na kalagai loa latou e Sesu, o pati kia latou i se folafola fakatata : Pe mafai feaki ke kapu Satana e Satana ? 24Kapau e mavetevete se puleaga o tau kiate ia totonu, e leaise mafai ke tuu makeke le puleaga lena ; 25ti kapau e mavetevete se fale o tau kiate ia totonu, e leaise mafai ke tuu makeke le fale lena. 26Kapau e agatuu Satana kiate ia totonu, e mavetevete a ia, ti e leaise mafai ke tuu makeke a ia, kae e maumau loa a ia. 27E leaise mafai ke ulu se tasi ki le fale o se tagata makeke o kaia ona koloa, kae e leikiaise sai mua e ia le tagata makeke lena ; ti o kaia loa e ia lona fale. 28E kau pati maoki atu kia koutou, e fakamolemole loa a agasala fuli ki vosa o tagata, ti mo fatituu ala ka lotou fai loa ; 29kae ko leia e fatituu loa ki le Laumalie Maokioki, e leaise toe fakamolemole loa kiate ia : Kua fai e ia se agasala lee gato. 30Na masau fenaaki loa Sesu talie na lotou pati : E iate ia se laumalie veli.

Le tinana mo fetaina o Sesu

31Ti na kaku ake loa lona tinana mo ona fetaina, o tutuu i fafo, kae lotou kakau loa se tasi ke ano o fakasa kiate ia. 32Na tonatona le kakai o takatakai a ia, ti na pati ake loa kiate ia : Ko leinei, e tutuu lou tinana mo ou fetaina i fafo, ti e lotou afa a koe. 33Ti na tali loa a ia : Ko ai loku tinana, ti ko ai oku fetaina ? 34Ti na tagaki loa a ia kia latou na tonatona o takatakai a ia, o pati : Ko leinei loku tinana ti ko nei oku fetaina. 35Talie, ko leia e fai ia le finegalo o le Atua, ko ia lena ko loku taina, mo loku tuagaane, ti mo loku tinana.

Currently Selected:

Maleko 3: FB2000

Highlight

Copy

Compare