Mateo 25

Folafola o taupoou e tino agafulu

1Ti e toe fakatatau loa le puleaga o le atu lagi ki ni taineliki taupoou e tino agafulu, ala na too ia olatou malama, ti na ano loa o fakafetaulaki ki le tagata avaga. 2Na valelea le toka lima o latou, ti na popoto le toka lima. 3Na too loa e le kau valelea olatou malama, kae na leaise lotou too loa se lolo ; 4Kae na too loa e le kau popoto olatou malala, mo se lolo i ni ipu. 5I le tuvai mai o le tagata avaga, na lotou tule momoe fuli loa, o moe mamate. 6I le vaeluapo, na kalaga loa : Ko leinei le tagata avaga, kotou ano o fakafelavei kiate ia ! 7Ti na ofo ake loa le kau taupoou fuli lena, o teuteui olatou malama. 8Ti na pati loa le kau valelea ki le kau popoto : Soli mai mua kia matou se ga lolo mei lakoutou lolo, talie kua mamate omatou malama. 9Na tali loa le kau popoto : Leai ! e leaise feauga loa kia matou mo koutou ; kotou ano ki le kau fakatau lolo, o totogi mai se lolo kia koutou. 10I le lolotoga o lalatou ano o totogi lolo, na kaku mai loa le tagata avaga ; ko latou ala kua teuteu na ulu loa mo le tagata avaga ki le kogafale o le faiavaga, ti na tapono loa le matapa. 11Ki muli mai, na kaku ake loa le kau taupoou valelea, o pati : Aliki, Aliki, fakamavaa mai kia matou. 12Kae na tali loa a ia : E kau pati maoki atu kia koutou, e leaise kau iloa fua koutou.

13Koia kotou alaala ai, talie e leaise kotou iloa le aso mo le ola.

Folafola o tenalio

14E toe fakatatau loa le puleaga o le atu lagi ki se tagata leia ka folau ki se fenua mamao, ti na kalagai loa e ia ana tagata fakasausau, o tuku kia latou ona koloa ke lotou taupau. 15Na soli loa e ia ni fa tenalio e lima ki se tasi, ti lua ki leia ake, ti tasi ki le tolu, o mulimuli ki le mafai a le tagata taki toka tasi ; ti na ano loa a ia. 16Ko leia na tali ia a fa tenalio e lima na ano aifai a ia, o fakagaoii latou ke fua, ti na toe maua loa e ia ni iki ake fa tenalio e lima. 17Ti na toe fenaaki mo leia na tali ia a fa tenalio e lua, na toe maua loa e ia ni iki ake fa tenalio e lua. 18Kae ko leia na tali ia le fa tenalio e tasi, na ano loa a ia o kenu se popoko, o fufu i ai le fa tenalio o lona pule. 19Ti fualoa, na toe liliu mai loa le pule o tagata fakasausau ana, o afa kia latou le fua o lalatou gaoi. 20Na fakafeofi ake loa leia na tali ia a fa tenalio e lima, o avake ni iki ake fa tenalio e lima, o pati : Aliki, na ke tuku mai kiate au ni fa tenalio e lima ; ko leinei kua kau toe maua ni iki ake fa tenalio e lima. 21Na pati loa lona pule kiate ia : E malie ai, tagata fakasausau agamalie mo agatonu ; na ke agatonu i se ganea ikiiki fua, e kau fakanofo loa a koe ke pule ki se nea lasi ; ulu ki le fiafia o lou pule. 22Na fakafeofi ake loa leia na tali ia a fa tenalio e lua, o pati : Aliki, na ke tuku mai kiate au ni fa tenalio e lua ; ko leinei kua kau toe maua ni iki ake fa tenalio e lua. 23Na pati loa lona pule kiate ia : E malie ai, tagata fakasausau agamalie mo agatonu ; na ke agatonu i se ganea ikiiki fua, e kau fakanofo loa akoe ke pule ki se nea lasi ; ulu ki le fiafia o lou pule. 24Na fakafeofi ake loa leia na tali ia le fa tenalio e tasi, o pati : Aliki, na kau iloa ko se tagata faigataa a koe, leia e utu i le ganea leia na leaise ke faisaga ai, ti e tanaki i le ganea leia na leaise ke sasa fulumeto ai ; 25na kau i loa kiate koe, ti na kau ano o fufu lau fa tenalio i le kele ; ko leinei a ia, too lau nea. 26Na tali loa lona pule kiate ia : Tagata fakasausau agaveli mo gasueveli, na ke iloa malie e kau utu i le ganea leia na leaise kau faisaga ai, ti e kau tanaki i le ganea leia na leaise kau sasa fulumeto ai ; 27koia na tonu ai ke ke tuku laku paaga ki le kau tagata faipaaga, o tupu ke kau too loa, i laku toe liliu mai, laku nea mo sona tupu. 28Koia kotou too meiate ia le fa tenalio, o soli a ia ki leia e nofo mo fa tenalio e kau agafulu. 29Talie e soli loa ki leia e maua ana nea, ti e nofo loa a ia i le mou, kae ki leia e leaise maua sana nea, e toe too loa meiate ia mo le nea leia e maua e ia. 30Kotou ti le tagata fakasausau lee aoga, ki le fakapouli i fafo, leia e maua ai loa ni tagi mo ni fetati o nifo.

Fakamaau o atu puleaga

31Ka au loa le Vosa o le tagata i lona kololia, mo le kau aselo fuli, e ekeeke loa a ia i le ekeekeaga fakasau o lona kololia. 32E fakatasi loa a atu puleaga fuli i ona mua. E vaei kese loa e ia ala mei la, ofaipe le vaei kese e le tagata tausi ovi o ovi mei koti ; 33ti e tuku loa e ia a ovi ki lona fetuu atamai, ti ko koti ki lona fetuu sema. 34Ti e pati loa le sau kia latou ala e tutuu loa i lona fetuu atamai : Kotou au, koutou ala na tapuaki e loku Tamana ; kotou maua le puleaga leia na teuteui atu kia koutou talu mei le kamataaga o le malama nei. 35Talie na kau fia kai, ti na kotou soli mai kiate au se nea ke kai ; na kau fia inu, ti na kotou soli mai kiate au se nea ke inu ; na kau matapule ti na kotou tali au ; 36na kau telefua ti na kotou fakalava au, na kau masaki ti na kotou fakatele mai kiate au ; na kau pilisoni, ti na kotou au kiate au. 37E tali loa le kau agatonu kiate ia : Aliki, ko nafea leia na motou tio ai kiate koe na fia kai, ti na motou soli atu ai kiate koe se nea ke kai ; pe na fia inu ti na motou soli atu kiate koe se nea ke inu ? 38Ko nafea leia na motou tio ai kiate koe e matapule, ti na motou tali a koe ; pe telefua, ti na motou fakalava a koe ? 39Ko nafea leia na motou tio ai kiate koe e masaki pe pilisoni, ti na motou natu kiate koe ? 40Na tali loa le sau kia latou : E kau pati maoki atu kia koutou, ko faiaga fuli ala na kotou fai ai a nea ana ki se tasi o oku fetaina liliki oki, ko au leia na kotou fai ki ai. 41Ti oki, ti e pati loa a ia kia latou ala e tutuu loa i lona fetuu sema : Kotou fakamamao atu iate au, kau malaia ; kotou ano ki le afi lee gato leia na teuteui ki le Tiapolo mo ana aselo. 42Talie na kau fia kai, ti na leaise kotou soli mai kiate au se nea ke kai ; na kau fia inu, ti na leaise kotou soli mai kiate au se nea ke inu ; 43na kau matapule ti na leaise kotou tali au ; na kau telefua, ti na leaise kotou fakalava au ; na kau masaki mo pilisoni, ti na leaise kotou au o fakatele mai kiate au ; 44E lotou toe tali loa : Aliki, ko nafea leia na motou tio ai kiate koe e fia kai, pe fia inu, pe matapule, pe telefua, pe masaki, pe pilisoni, ti na leaise motou tokaga kiate koe ? 45Ti e tali loa a ia kia latou : E kau pati maoki atu kia koutou, ko faiaga fuli ala na leaise kotou fai ai a nea ana ki se tasi o toe liliki oki ana, ko au leia na leaise kotou fai ki ai. 46Ti e ano loa latou anei ki le tautea lee gato, kae e ano loa le kau agatonu ki le mauli lee gato.

Currently Selected:

Mateo 25: FB2000

Highlight

Copy

Compare