Levitiko 9
9
Kamata o le gaoi a le kau faisakilifisio
1I le valu o aso, na kalagai loa e Moisese a Alone mo ona vosa, ti mo le kau fakamatuatua o Iselaele. 2Na pati loa a ia kia Alone : too se pipi tagata muli ki le sakilifisio o le fakamolemole ti mo se ovi tagata ki le failaulau, ko ni manu lee mele, ti ke ave loa laua ki mua o le Eteleno. 3Ti ke masau loa ki fanau a Iselaele, o ke pati loa kia latou : kotou too se koti tagata ki le failaulau, mo se pipi tagata muli mo se akeno, ala e taki fetuu tasi mo lee mele ki le sakilifisio fakamolemole ; 4ti mo se pipi tagata mo se ovi tagata ki le sakilifisio o le komunio, ti ke momoli loa latou i mua o le Eteleno.
5Ti na latou ave loa ki mua o le falela tapu le nea leia na fakatotonu e Moisese ; ti na fakafeofi ake loa le kakai katoa, o tuu i mua o le Eteleno. 6Na pati loa Moisese : ko leinei le nea leia na fakatotonu e le Eteleno ke kotou fai ; ti e sa loa le kololia o le Eteleno kia koutou. 7Na pati loa Moisese kia Alone : ke ke fakafeofi ki le aletale ; momoli lau sakilifisio o le fakamolemole mo lau failaulau, ti ke fai le fakamolemole kiate koe mo le kakai ; ti ke momoli foki le sakilifisio a le kakai, ti ke fai le fakamolemole kiate ia, o mulimuli ki le fakatotonu a le Eteleno.
8Ti na fakafeofi ake loa Alone ki le aletale, ti na tamate loa e ia le pipi tagata muli ki lana agasala totonu. 9Ti na avake loa e vosa o Alone kiate ia le toto o le manu, ti na tooi loa e ia lona maikao ki le toto, ti na pooi loa e ia le toto ki tala o le aletale, ti na liligi loa e ia le toto ki le vae o le aletale. 10Ti na tutu loa e ia i aluga o le aletale le gako, mo ifiifi, mo le laui ate maokioki lasi o le vikitima, o mulimuli ki le fakatotonu a le Eteleno kia Moisese. 11Kae na tutu loa e ia i le afi i fafo o le nofolaga le toe o le kanofi ti mo le kili.
12Ti na tamate loa e ia le vikitima ki le failaulau. Na avake loa e vosa o Alone kiate ia le toto, ti na liligi loa e ia a ia i le takatakai katoa o le aletale. 13Ti na lotou avake loa kiate ia le failaulau leia na tuutuu fakainati, ti mo le fa ulu, ti na tutu loa e ia a nea ana i aluga o le aletale. 14Ti na fufulu loa e ia a vava mo vae, ti na tutu loa e ia latou i aluga o le aletale, i aluga o le failaulau.
15Ti na momoli loa e ia le sakilifisio ki le kakai. Ti na too loa e ia le ovi tagata leia na momoli ki le fakamolemole o le kakai, ti na tamate loa e ia a ia, ti na momoli loa e ia a ia ki le fakamolemole, ofaipe le uluaki manu. 16Ti na momoli loa e ia le failaulau o mulimuli ki le lekula. 17Ti na momoli loa e ia le moliga nea kai, o alii loa e ia ki lona alofilima se ga falina tea, leia na tutu fakatasi loa e ia mo le failaulau o le usu i aluga o le aletale. 18Ti na tamate loa e ia le pipi tagata mo le ovi tagata ki le sakilifisio o le komunio ki le kakai. Ti na avake loa e vosa o Alone le toto kiate ia, ti na liligi loa e ia a ia i le takatakai katoa o le aletale. 19Ti na lotou avake loa kiate ia le gako o le pipi tagata mo le ovi tagata, mo le siku, mo le gako leia na kofu ia tootooga, mo ifiifi e lua, ti mo le laui ate maokioki lasi. 20Ti na lotou teki loa a gako ana ki vakavaka o manu e lua, ti na tutu loa e Alone a gako i aluga o le aletale.
21Ti na liliaki loa e Alone i mua o le Eteleno le vakavaka mo alaga mua atamai, o mulimuli ki le fakatotonu a le Eteleno.
22Ka oki loa le momoli e Alone o le sakilifisio o le fakamolemole, mo le failaulau, ti mo le sakilifisio o le komunio, e siki loa e ia ona lima ki aluga, o tapuaki ki le kakai, ti ifo ake loa a ia i le aletale.
23Ti na ulu loa Moisese mo Alone ki le falela tapu. I lala mavae loa mei ai, na la tapuaki loa ki le kakai. Ti na sa loa le kololia o le Eteleno ki le kakai katoa. 24Na mavae loa se afi mei mua o le Eteleno, o tutu le failaulau mo gako i aluga o le aletale. Na tio loa le kakai katoa ki le nea lena ; ti na lotou kalaga loa i le fiafia, ti na lotou punou loa o fakatau olatou mata ki le kele.
Currently Selected:
Levitiko 9: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
