Levitiko 3
3
Sakilifisio fakafetai
1Ka momoli loa e se tagata ki le Eteleno se sakilifisio fakafetai : Ti kapau e momoli e ia se manu lasi, tagata pe fafine, e momoli loa e ia se manu lee mele ki le Eteleno. 2E teki loa e ia lona lima ki le fa ulu o le manu, ti e tamate loa e ia le manu i le uluaga o le falela tapu. E liligi loa e le kau faisakilifisio, vosa o Alone, le toto i le takatakai katoa o le aletale. 3I le sakilifisio fakafetai lena, e momoli loa e ia ki le Eteleno se sakilifisio tutu e le afi : le gako loto katoa leia e kofu ia tootooga, 4mo ifiifi e lua, mo le gako leia e pipiki i ai, ti mo le gako leia e pipiki i alaga muli, ti mo le ate maokioki leia e tatai fakatasi loa mo ifiifi. 5E tutu loa e le kau faisakilifisio a nea fuli ana i aluga o le aletale, o fakatasi mo le failaulau leia e teki loa i aluga o le fafie i le afi. Ko se sakilifisio tutu a ia e le afi, ti ko se nea manogi malie a ia ki le Eteleno.
6Kapau e momoli e ia se manu ikiiki, tagata pe fafine, i se sakilifisio fakafetai ki le Eteleno, e ave loa e ia se manu lee mele. 7Kapau e momoli e ia le sakilifisio ko se akeno, e ave loa e ia a ia ki mua o le Eteleno. 8E teki loa e ia lona lima ki le fa ulu o le manu, ti e tamate loa e ia le manu i mua o le falela tapu ; ti e liligi loa e vosa o Alone le toto o le manu ki le takatakai katoa o le aletale. 9I le sakilifisio fakafetai lena e momoli loa e ia se sakilifisio tutu e le afi i mua o le Eteleno : le gako, mo le siku katoa, leia e tuuti loa e ia i le sokoga mo le ivi o le tua, mo le gako katoa leia e kofu ia tootooga, 10mo ifiifi e lua, mo le gako leia e kofu ia laua, mo le gako leia e pipiki i alaga muli, ti mo le laui ate maokioki lasi, leia e tatala loa e ia o ofi ki ifiifi. 11E tutu loa e le tagata faisakilifisio a nea fuli ana i aluga o le aletale. Ko se nea kai tutu a ia e le afi ki le Eteleno.
12Ti kapau ko lana moliga ko se koti, e ave loa e ia a ia ki mua o le Eteleno. 13E teki loa e ia lona lima ki le fa ulu o le manu, ti e tamate loa e ia le manu i mua o le falela tapu. E liligi loa e vosa o Alone le toto i le takatakai katoa o le aletale. 14I le sakilifisio lena e momoli loa e ia se sakilifisio tutu e le afi i mua o le Eteleno : le gako katoa leia e kofu ia tootooga, 15mo ifiifi e lua, mo le gako leia e kofu ia laua, mo le gako leia e pipiki i alaga muli, ti mo le ate maokioki lasi leia e tatala loa e ia o ofi ki ifiifi. 16E tutu loa e le tagata faisakilifisio a nea fuli ana i aluga o le aletale. Ko se nea kai tutu a ia e le afi ti e manogi a ia ki le Eteleno. E maua e le Eteleno a gako fuli.
17Ko se lao lee gato leinei ki okoutou sakoga, i ganea fuli ala e kotou nonofo ai loa : E leaise kotou kai loa se gako pe ko se toto.
Currently Selected:
Levitiko 3: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
