Levitiko 25
25
Le fetuu o le Sapato
1Na masau loa le Eteleno kia Moisese i le mauga o Sinai, o pati : 2Masau ki vosa o Iselaele, ti ke pati loa kia latou : Ka kotou ulu loa ki le fenua leia e kau soli loa kia koutou, e malolo loa le kele : ko se sapato loa a ia ki le Eteleno. 3I fetuu e ono e ke to loa lau faisaga, i fetuu e ono e ke koti loa lau vite ; ti e ke tau loa le fua. 4Kae ko le fitu o fetuu ko se sapato loa a ia, ko se fetuu malolo ki le kele, ko se sapato ki le Eteleno : Aua na ke to loa lau faisaga ti mo ke koti loa lau vite. 5Aua na ke tuuti ia loa le nea leia kua tupu mei fuai fulumeto ala na vivilo ki le kele o sosomo toka tasi, ti aua na ke tau loa a fui vite ala e leleu loa i le vite leia na leaise koti, talie ko se fetuu malolo katoa lena ki le kele. 6Kae e kotou kai loa le nea leia e fakatupu loa e le kele i le lolotoga o lona sapato, e koe, mo lau tagata fakasausau, mo lau fafine fakasausau, mo lau tagata gaoi, mo le matapule leia e nofo mo koe, 7mo lau kau manu, ti mo manu fuli ala e maua i lou fenua ; e kotou kai loa le fua katoa o le fenua.
Le fetuu o le supileo
8E ke lau loa ni fetuu sapato e fitu, o liuga fitu a fetuu e fitu, ko lona katoa ko fetuu e kau fa tupu iva. 9I le aso kau agafulu o le masina fitu, e ke fakatatagi loa le leo makeke o le fakatagi pupusi ; i le aso lasi o le fakamalie, e kotou pupusi loa le fakatagi pupusi i le fenua katoa. 10Ti e kotou fakatapui loa le kau lima fetuu, ti e kotou fakasa loa le lauatea ki kakai fuli o le fenua : ko le supileo loa a ia kia koutou ; e toe liliu loa le tagata taki toka tasi ki lona kele mo lona famili. 11Ko le kau lima fetuu e liliu loa kia koutou ko le supileo : aua na kotou to loa akoutou faisaga, pe kotou tuuti loa le nea leia e fakatupu toka tasi loa e faisaga, ti aua na kotou tau loa a vite vaoa. 12Talie ko le supileo a ia : e kotou fakaapaapa loa ki lona tapu. Kae e kotou kai loa le fua o akoutou faisaga. 13I le fetuu lena o le supileo, e toe liliu loa le tagata taki toka tasi o koutou ki lona kele. 14Kapau e kotou totogi pe kotou fakatau se kele ki se tagata o lou kakai, ke aua na kakaai loa e se tasi o koutou lona taina. 15E ke fakatau loa mei lou oloi, o lau a fetuu mei le supileo ; ti e totogi atu loa e ia kiate koe, o lau a fetuu o taukai ala koi toe ki le supileo foou. 16Ka lasi loa a fetuu ala koi toe, ti e toe lasi loa le totogi ; ti ka ikiiki loa a fetuu, ti e toe ikiiki loa le totogi : talie e fakafuafua loa le totogi ki le lasi o taukai. 17Ke aua na kakai loa e se tasi o koutou lona taina, kae e ke fakaapaapa loa ki lou Atua ; talie ko au ko le Eteleno, ko lokoutou Atua.
18Kotou mulimuli ki aku lao, ti kotou tausi aku fakatotonu, ti kotou fai latou ; ti e kotou mauli loa i le fimalie i le fenua. 19E soli atu loa e le fenua ona fua kia koutou, ti e kotou kai loa o makokona, ti e kotou nonofo loa i ai i le fimalie. 20Kapau e kotou pati : Kolea le nea leia e motou kai loa i le fitu o fetuu, talie ko leinei e leaise motou to loa amatou faisaga, ti e leaise motou tuuti loa le taukai o amatou faisaga ? 21E kau tuku atu loa kia koutou laku tapuaki i le ono o fetuu, ti e soli loa e ia se taukai ki fetuu e tolu. 22E kotou to loa akoutou faisaga i le valu o fetuu, ti e kotou kai loa le taukai afea o kaku ki le iva o fetuu ; talie e kotou maua loa ni tokonaki feauga o kaku ki le taukai o le iva o fetuu.
Le toe totogi o kele mo kau popula
23Aua na ke fakatau loa se kele o tukupau : talie ko le fenua a aku, talie e kotou nonofo i loku kaiga ofaipe ni matapule, mo ni iki ala e nonofo fakatemi. 24I le fenua katoa leia ka kotou maua ia loa, e kotou fakatuu loa ki le kele le lao o le toe totogi.
25Kapau e liliu loa o mativa lou taina ti e fakatau loa e ia se koga o lona kele, e au loa lona famili ofi o toe totogi le kele o lona taina. 26Ti kapau e leaise maua loa e se tagata se tasi o lona famili ke toe totogi ia lona kele, kae maua loa e ia le paaga ke toe totogi ai e ia totonu lona kele, 27e fakafuafua loa e ia le lasi o le totogi leia e tonu ke tuku ki leia na fakatau ia, o mulimuli ki le lasi o fetuu ala koi toe ki le Supileo, ti e tuku loa e ia le paaga lena, kae toe too loa e ia lona kele. 28Ti kapau e leaise maua e ia le paaga ke toe totogi ai, ti e nofo loa le kele mo le tagata leia na totogi ia a ia o kaku ki le fetuu o le supileo. I le temi lena e toe too loa e le tagata leia o ona le kele lona kele. 29Kapau e fakatau e se tagata se fale nofo i se kolo na takatakai ki se kaua fatu, e maua loa e ia le toe totogi o kaku ki le katoa o se fetuu e tasi mei le aso o le fakatau ; e fetuu tasi fai lona toe totogi. 30Ti kapau na leaise toe totogi le fale i le fetuu lena, e maua oki loa a ia e le tagata lena na totogi ia a ia ti mo ana fanau. E leaise toe liufaki loa a ia i le fetuu o le supileo. 31Kae ko fale o kolo liliki ala e leaise a fatu e mulimuli loa ki le lao o kele o le fenua : e feala loa ke toe totogi latou, ti e mavae loa le tagata leia na totogi ia a ia i le fetuu o le supileo. 32Kae ki kolo o le kau Levi ti mo fale ala e lotou maua loa, e lotou maua loa le toe totogi i temi fuli. 33Ko leia e totogi ia loa mei le kau Levi se fale, e mavae loa a ia i le supileo mei le fale leia na totogi e ia ti mo le kolo leia na tuu ai le fale. Talie ko fale ana ko le gatoaga a ia o nea ala e maua e le tagata Levi i le fenua o Iselaele. 34E leaise feala loa ke fakatau a faisaga ala e tuu i tafatafa o kolo o le kau Levi ; talie ko olatou tofiga ana o lee gato.
Le taina mativa
35Kapau e liliu loa lou taina o mativa, ti e gaegae loa lona lima i ou tafa, e ke tokoi loa kiate ia ; e ke fai fakatatau loa ki leia e matapule ti e nofo i le fenua, o tupu ke mauli a ia mo koe. 36Aua na ke too loa se totogi iate ia pe ko se tupu, e ke i loa ki lou Atua, ti e mauli loa lou taina mo koe. 37Aua na ke tuku lau paaga kiate ia mo se tupu, ti aua na ke tuku lau nea kai kiate ia mo se totogi. 38Ko au ko le Eteleno, ko lou Atua, leia na fakamavae ia koutou mei le fenua o Esipito, ke soli atu kia koutou le fenua o Kanaane, o tupu ke kau liliu ko lokoutou Atua.
39Kapau e liliu loa lou taina o mativa i ou tafa, ti e fakatau loa a ia totonu kiate koe, aua na ke fakagaoi loa a ia ke tatau mo se tagata popula. 40E nofo loa a ia i lou fale ofaipe se tagata gaoi totogi, ofaipe se tagata gaoi fakatemi ; e gaoi loa a ia kiate koe o kaku ki le fetuu o le supileo. 41I le fetuu o le supileo, e mavae loa a ia mei lou fale, a ia mo ana fanau, ti e toe liliu loa a ia ki lona famili, i le kele o ona tamana. 42Talie ko aku tagata fakasausau latou ala na kau fakamavae mei le fenua o Esipito ; Aua na ke fakatau loa latou ofaipe ni kau popula. 43Aua na ke pule fakamakeke loa kiate ia, kae ke ke i loa ki lou Atua. 44Ko puleaga ala e takatakai ia koutou e ke too loa mei ai lau tagata fakasausau mo lau fafine fakasausau ala e fakalogo loa kiate koe : ko puleaga ana ala e ke totogi loa mei ai le tagata fakasausau mo le fafine fakasausau. 45E feala foki ke kotou totogi latou i fanau o kakai matapule ala e nonofo loa i lokoutou fenua, ti mo olatou famili ala e lotou fakatupu loa i lokoutou fenua ; ti e lotou fakalogo loa kia koutou. 46E kotou tuku tofiga loa latou ki okoutou fanau, ke lotou maua latou ma latou. E kotou taupau loa latou o lee gato. Kae ki okoutou fetaina, fanau a Iselaele, ke aua ai na pule fakamakeke loa se tasi o koutou ki lona taina.
47Kapau e mou koloa loa se matapule leia e nofo i lokoutou fenua, ti e liliu loa o mativa se tasi i ou fetaina, o totogi loa a ia totonu ki le tagata matapule pe ki se tasi o le famili o le matapule lena, 48e fai loa ki lokoutou taina le lao o le toe totogi : e feala loa ki se tasi o fetaina o le tagata lena ke toe totogi ia a ia. 49E feala loa ke toe totogi a ia e se taina o lona tamana, pe ko sona taina mataitama, pe ko se tasi o lona famili. E feala foki kiate ia totonu ke toe totogi e ia a ia mo kapau e maua loa e ia le totogi. 50E lau loa e ia mo lona pule mei le fetuu leia na totogi ai a ia o kaku ki le fetuu o le supileo ; ti e fuafua loa le totogi leia e tonu ke ui e le tagata lena ki le lasi o fetuu, ti e fuafua loa le totogi o le fetuu ki le totogi o aso gaoi o le tagata gaoi. 51Kapau koi toe ni fetuu mauke, e ui loa e ia ki lona toe totogi se paaga o fakafuafua ki le totogi leia na totogi ai a ia e lona pule. 52Kapau e toe ni fetuu teiki o kaku ki le supileo, e lau loa e ia a fetuu ana ti e ui loa e ia ki lona toe totogi se paaga o fakafuafua ki le totogi leia na totogi ai a ia e lona pule. 53E fai loa a ia pe se tagata gaoi totogi i le fetuu i le fale o lona pule, leia e leaise pule fakamakeke loa kiate ia i ou mata. 54Kapau e leaise toe totogi a ia e se nea i nea ana, e mavae loa a ia i le fetuu o le supileo, a ia mo ona fanau. 55Talie ko le kakai o Iselaele ko aku tagata fakasausau latou ; ko aku tagata fakasausau ala na kau fakamavae mei le fenua o Esipito. Ko au ko le Eteleno, ko lokoutou Atua.
Currently Selected:
Levitiko 25: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
