Levitiko 15
15
Lao ki kelekele fakatino
1Na masau loa le Eteleno kia Moisese mo Alone, o pati : 2Kolua masau ki le kakai o Iselaele, o pati kia latou : Ka maua loa e se tagata se masaki fufula i lona tino fakatagata, e kelekele loa a ia i le nea lena e sali loa iate ia. 3E kelekele le nea lena e sali loa mei lona tino fakatagata pe tapono ia a ia, ti e fakakelekele e ia a ia. 4Ti e kelekele loa a moeaga fuli ala e moe ai loa le tagata lena mo ekeekeaga fuli ala e eke ai loa a ia. 5Ti ko leia e lave loa ki le moeaga lena, e tonu ke fo loa e ia ona kofu, ti ke maanu loa a ia totonu ; ti e kelekele loa a ia o kaku ki le afiafi. 6Ti ko leia e eke loa i se ekeekeaga leia na eke ai se tagata masaki, e tonu ke fo loa e ia ona kofu, ti ke maanu a ia totonu ; ti e kelekele loa a ia o kaku ki le afiafi. 7Ti ko leia e lave loa ki le tagata masaki, e tonu ke fo loa e ia ona kofu, ti ke maanu loa a ia totonu, ti e kelekele loa a ia o kaku ki le afiafi. 8Ti kapau e anusi loa e le tagata masaki se tagata mea, e tonu ke fo loa e le tagata lena ona kofu, ti ke maanu loa a ia totonu ; ti e kelekele loa a ia o kaku ki le afiafi. 9Ti ko ekeekeaga i manu fuli ala e fanoga ai loa le tagata masaki, e kelekele loa. 10Ti ko latou fuli ala e lave loa ki se nea leia na tuku i lalo o le tagata masaki, e kelekele loa o kaku ki le afiafi. Ti ko leia e amo ia loa se nea leia na tuku i lalo o le tagata masaki, e tonu ke fo loa e ia ona kofu, ti ke maanu loa a ia totonu ; ti e kelekele loa a ia o kaku ki le afiafi. 11Ko leia e lave loa ki ai le tagata masaki kae na leaise fufulu ona lima, e tonu ke fo loa e ia ona kofu, ti ke maanu loa a ia totonu ; ti e kelekele loa a ia o kaku ki le afiafi. 12Ko ipu kele fuli ala e lave loa ki ai le tagata masaki e tonu ke maumaui loa, kae ko ipu laakau fuli, e tonu ke fufulu loa latou ki se vai matapuna. 13Ka oki loa le sasali leia na fakakelekele ia le tagata, e tonu ke talitali loa le tagata lena i ni aso e fitu, ti o mea loa a ia ; e tonu ke fo loa e ia ona kofu, ti ke maanu loa a ia totonu i se vai matapuna, ti o mea loa a ia. 14I le valu o aso, e too loa e ia ni kulukulu e lua pe ko ni lupe e lua, ti e ano loa a ia o tuku laua ki le tagata faisakilifisio, i mua o le Eteleno, i le uluaga o le falela tapu. 15E momoli loa e le tagata faisakilifisio se manu lele e tasi ki le sakilifisio o le fakamolemole, ti mo se tasi manu lele ki le failaulau. Ti e fai loa e ia ki le tagata lena i mua o le Eteleno, le tootooga leia e fakamea ia loa a ia i lona masaki fakatagata.
16Ka sali loa mei se tagata lona sua vai fakatagata, e tonu ke fakamea loa e ia lona tino katoa ; ti e kelekele loa a ia o kaku ki le afiafi. 17Ko kofu fuli, mo kie kafu fuli, mo kili fuli ala e lave ki ai le sua vai fakatagata, e tonu ke fakamea loa ki se vai, ti e kelekele loa a ia o kaku ki le afiafi. 18Ti kapau e momoe loa se tagata mo se fafine, e tonu ke la fakamea loa toka lua, ti e la kelekele loa o kaku ki le afiafi.
Lao ki kelekele fakatino o le fafine
19Ka menise loa se fafine, o sali se toto mei lona tino, e kelekele loa a ia i ni aso e fitu. Ti ko leia e lave loa kiate ia, e toe liliu loa a ia o kelekele, ti e kelekele loa a ia o kaku ki le afiafi. 20Ko moeaga fuli ala e moe ai loa a ia mo ekeekeaga fuli ala e eke ai loa a ia, i lona menise, e kelekele loa. 21Ko leia e lave loa ki lona moeaga, e tonu ke fo loa e ia ona kofu, ti ke maanu loa a ia totonu, ti e kelekele loa a ia o kaku ki le afiafi. 22Ti ko leia e lave loa ki se nea leia na eke ai a ia, e tonu ke fo loa e ia ona kofu, ti ke maanu loa a ia totonu, ti e kelekele loa a ia o kaku ki le afiafi. 23Ti kapau na teki loa se nea i lona moeaga, pe i le nea leia na eke ai a ia, ko leia e lave loa ki le nea lena, e kelekele loa a ia o kaku ki le afiafi. 24Ti kapau e momoe loa se tagata mo le fafine lena i lona menise, e maua loa e le tagata lena le kelekele o le fafine : ti e kelekele loa le tagata i ni aso e fitu, ti ko moeaga fuli ala e moe ai loa le tagata e liliu loa o kelekele. 25Kapau e sali loa se toto i se fafine o fakalaka i aso o lona menise, ti e kelekele loa a ia i aso fuli ala e sali ai le toto, ofaipe le temi o lona menise. 26Ti ko moeaga fuli ala e moe ai loa le fafine lena mo ekeekeaga fuli ala e eke ai loa a ia, e kelekele loa, ofaipe le temi o lona menise. 27Ti ko leia e lave loa ki le moeaga lena pe ko le ekeekeaga lena, e tonu ke fo loa e ia ona kofu, ti ke maanu loa a ia totonu ; ti e kelekele loa a ia o kaku ki le afiafi. 28Ka oki loa le sali o le toto, e talitali loa le fafine i ni aso e fitu, ti o mea loa a ia. 29I le valu o aso, e too loa e ia ni kulukulu e lua pe ko ni lupe e lua, ti e ave loa e ia laua ki le tagata faisakilifisio, i le uluaga o le falela tapu. 30E momoli loa e le tagata faisakilifisio se manu lele e tasi ki le sakilifisio o le fakamolemole, ti ko le tasi manu lele ki le failaulau. Ti e fai loa e ia ki le fafine, i mua o le Eteleno, le sakilifisio ke fakamea ai loa a ia i lona masaki toto.
31Kolua fakamamao mei le sagatualio le kakai o Iselaele mo ka e lotou kelekele ; ti e leaise lotou mamate loa o tupu ko le fakakelekele o loku nofoaga leia e tuu i loto malie o latou.
32Ko le lao lena ki le tagata leia e maua ia loa se masaki fakatagata leia e sali, mo se sua vai fakatagata leia e sali, 33Ti mo le fafine leia e menise, mo le tagata leia e momoe mo le fafine i lona kelekele.
Currently Selected:
Levitiko 15: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
