Levitiko 13
13
Lao ki le kilia
1Na masau loa le Eteleno kia Moisese mo Alone, o pati :
2Ka tupu loa i le kili o se tagata se fakafufula, pe ko se kama, pe ko se tane, ti e mata loa le nea lena ofaipe se kilia, e ave loa le tagata lena ki le tagata faisakilifisio ko Alone pe ko se tasi o ona vosa. 3E tioi loa e le tagata faisakilifisio le papala leia e tuu i le kili. Kapau kua liliu o tea a fulu o le papala, ti e sakinake le papala kua ulu loloto i le kili, ko le papala kilia a ia : e fakasa loa e le tagata faisakilifisio kua kelekele le tagata lena. 4Ti kapau e sa i le kili se papala tea leia e leaise sakinake e loloto ake i le kili, ti e leaise tea a fulu o le papala, e tapono loa e le tagata faisakilifisio i se fale le tagata lena e nofo mo le papala i ni aso e fitu. 5I le fitu o aso, e toe tioi loa a ia e le tagata faisakilifisio : ti kapau e tio loa a ia na leaise fetogi le papala, ti na leaise mafola a ia i le kili, e toe tapono loa a ia e le tagata faisakilifisio i se fale i ni iki ake a aso e fitu. 6I le oki o aso ana e fitu, e toe tioi loa a ia e le tagata faisakilifisio. Kapau e tio loa a ia kua malo le papala, ti na leaise mafola a ia i le kili, e fakasa loa e le tagata faisakilifisio e mea le tagata : ko lona masaki ko se fakafufula, ti e fakamea loa e ia ona kofu ti e mea loa a ia. 7Ti kapau e toe mafola le papala i le kili, i le oki o lana ano ki le tagata faisakilifisio ke fakasa lona mea, ti e toe liliu loa a ia ki le tagata faisakilifisio. 8Ti e toe tioi loa a ia e le tagata faisakilifisio : kapau e tio loa a ia kua sosolo le papala i le kili, ti e fakasa loa e ia e kelekele le tagata lena, ko se kilia a ia.
9Kapau e maua loa e se tagata se kilia, e ave loa a ia ki le tagata faisakilifisio. 10Ti e tioi loa a ia e le tagata faisakilifisio : kapau e tea le mata o le fakafufula i le kili, ti kua tea a fulu o le ganea lena, ti kua sa le kanofi mauli i le papala, 11Ti ko se kilia a ia leia kua fualoa : e fakasa loa e le tagata faisakilifisio e kelekele le tagata lena. E leaise aoga ke tapono a ia i se fale, talie kua sa malie lona kilia. 12Kae kapau e tio loa le tagata faisakilifisio kua mafuta se kili i le tino katoa o le tagata lena, mei le fa ulu o kaku ki vae, i ganea fuli ala e tio loa ki ai a mata o le tagata faisakilifisio, e tioi loa a ia e le tagata faisakilifisio : 13Ti ka tio loa a ia kua mafola le kili i le kuaga katoa, ti e fakasa loa e ia e mea leia e maua ia le kili lena : kua liliu a ia o tea katoa, kua mea a ia. 14Kae i le aso leia e sa loa iate ia se kanofi mauli, e kelekele loa le tagata lena. 15E tioi loa e le tagata faisakilifisio le ganea leia e sa mata ai le papala, ti e fakasa loa e ia e kelekele le tagata lena. Talie e kelekele le papala leia kua sa mata ai le kanofi mauli, ko le kilia a ia. 16Kae kapau e toe liliu loa o tea le ganea leia na sa mata ai le kanofi mauli, e toe tioi loa le tagata e le tagata faisakilifisio ; 17Ti e toe tioi loa e le tagata faisakilifisio le papala, ti kapau e tio loa a ia kua liliu a ia o tea, e fakasa loa e ia e leaise kelekele le papala, ti e leaise kelekele le tagata.
18Kapau na maua e se tagata se fagafoa leia kua puli, 19Ti kapau e toe sa loa i le ganea lena na tuu ai le fagafoa se matai fufula tea pe ko se ila gigila kula, e ano loa le tagata lena ki le tagata faisakilifisio. 20Ti e tioi loa e le tagata faisakilifisio le koga masaki : ti kapau e maua loa e ia se pu i le kili ti kapau kua tea a fulu, e fakasa loa e le tagata faisakilifisio e kelekele le tagata lena ; ko le kilia lena kua sa i le tuuaga o le fagafoa. 21Kae kapau, i lana tioi le masaki, e leaise maua loa e ia ni fulu tea, mo se pu i le kili, kae e uli le mata o le papala, e tapono loa e ia le tagata masaki i se fale i ni aso e fitu. 22Ti kapau kua mafola le masaki i le kili, e fakasa loa e le tagata faisakilifisio e kelekele le tagata lena, ko se kilia a ia. 23Ti kapau na leaise fetogi le papala, ti na leaise mafola a ia i le kili, ti ko le mafo fai a ia o le fagafoa, ti e fakasa loa e le tagata faisakilifisio e mea le tagata lena.
24Ti kapau na vela loa se tagata ti kua sa loa i le ganea lena na vela se ila gigila tea pe tea kulakula, 25Ti e tioi loa e le tagata faisakilifisio le koga masaki : ti kapau kua liliu o tea a fulu, ti kua sa se pu i le kili, ti ko le kilia lena kua sa i le ganea leia na vela, ti e fakasa loa e le tagata faisakilifisio e kelekele le tagata lena. 26Kae kapau, i le oki o lana tilo, e leaise maua loa e le tagata faisakilifisio se fulu tea, mo se pu i le kili i lalo o le ila, kae kua uli le ila, e tapono loa e ia le tagata i se fale i ni aso e fitu. 27Ti kapau, i le fitu o aso, e tio loa le tagata faisakilifisio kua mafola le masaki i le kili, e fakasa loa e ia e kelekele le tagata lena, ko le kilia a ia. 28Kae kapau na leaise fetogi le ila, ti na leaise mafola a ia, kae kua liliu a ia o uli, ti ko se ila noa o tupu ko le vela. E fakasa loa e le tagata faisakilifisio e mea le tagata lena, talie ko le mafo fai lena o le vela.
29Ka maua loa e se tagata pe ko se fafine se masaki kili i lona fa ulu pe ko lona kaugutu, 30E tioi loa e le tagata faisakilifisio le koga masaki : kapau e sa loa se pu i le kili, mo se fulu fefelo mo vagavaga, e fakasa loa e le tagata faisakilifisio e kelekele le tagata lena ; ko le kama lena ko le kilia o le fa ulu mo le kaugutu. 31Kae kapau e tio loa le tagata faisakilifisio e leaise sa se pu i le kili, ti e leaise sa se fulu uli, e tapono loa e ia le tagata masaki i se fale i ni aso e fitu. 32Ti kapau, i le oki o aso e fitu, e tio loa le tagata faisakilifisio, i le temi leia e toe tioi ai e ia le tagata masaki, na leaise mafola le masaki, ti na leaise sa se fulu fefelo pe ko se pu i le kili, 33E tele loa e le tagata masaki lona fa ulu, kae e leaise tele loa e ia le koga leia e masaki, ti e toe tapono loa a ia i se fale e le tagata faisakilifisio i ni iki a aso e fitu. 34I le oki o aso ana, e toe tioi loa e le tagata faisakilifisio le koga masaki : ti kapau na leaise mafola le masaki i le kili ti na leaise maua e ia se pu i le kili, e fakasa loa e le tagata faisakilifisio e mea le tagata lena. 35Kae kapau e mafola loa le masaki i le kili, i le sili o le fakasa e le tagata faisakilifisio le mea o le tagata lena, 36E toe tioi loa e le tagata faisakilifisio le tagata lena : ti kapau e maoki kua mafola le masaki i le kili, e leaise toe aoga loa ke afa e le tagata faisakilifisio ni fulu fefelo, talie kua sa malie kua kelekele le tagata lena. 37Kae kapau e sa malie na leaise fetogi le koga leia na masaki ti kua toe sosomo ni iki a fulu uli i le ganea lena, ti kua malie le masaki, ti e mea le tagata lena. E fakasa loa e le tagata faisakilifisio e mea le tagata lena.
38Kapau e tio loa se tagata pe ko se fafine e sa i lona kili ni pulepule teatea, 39E tioi loa a ia e le tagata faisakilifisio : ti kapau e tea uli a pulepule, e leaise veli le masaki lena kua sa, ti e mea le tagata lena pe ko le fafine lena.
40Kapau e maluku loa a fului ulu o se tagata, o liliu loa a ia o ulu tula, e mea a ia. 41Ti kapau e maluku a fului ulu i lona poga, o lae tula loa a ia, e mea a ia. 42Kae kapau e sa loa i le ulu tula pe ko le lae tula se papala i le kili leia e tea kulakula, ti ko le kilia lena kua tupu. 43E tioi loa a ia e le tagata faisakilifisio : ti kapau e maua loa e ia i le koga tula ni kama ala e tea kulakula ofaipe le kilia, 44Ti e maua e le tagata lena se kilia ti e kelekele a ia ; e fakasa loa e le tagata faisakilifisio e kelekele le tagata lena, o tupu ko le masaki leia kua sa i lona fa ulu.
45E tui loa e le tagata lena kua masaki kilia ni kofu veveli, ti e tuku fakatekateka loa e ia lona fa ulu, ti e sai loa e ia se kie o uufi ai a lalo o ona mata ; ti e kalaga loa a ia : Kelekele ! Kelekele !
46E kelekele loa a ia i le temi katoa leia e nofo ai loa a ia mo lona masaki ; e tonu ke nofo kese loa a ia, i fafo o le nofolaga o le kakai.
47Ka sa loa se pulepule kilia i se kofu, pe ko se kofu fului ovi, pe ko se kofu lino, 48I ni kie pe i ni kofu loto fului ovi pe lino, i ni kilii manu pe i ni nea ala na gaoi ki le kilii manu, 49Ti kapau e sesega le pulepule lena pe kulakula, ti e tioi loa le sekaseka lena e se tagata faisakilifisio. 50I le oki o lana tioi a ia, e tapono loa e le tagata faisakilifisio le nea lena e pulepule, i se ganea, i ni aso e fitu. 51I le fitu o aso, e toe tioi loa e ia le nea lena : ti kapau kua mafola le pulepule i le nea, ti ko se sekaseka lena e leaise toe feala ke sau ; ko le nea lena e kelekele. 52Ti e tutu loa e le tagata faisakilifisio le kofu lena, pe ko le kie, pe ko le kofu loto, pe ko se nea na gaoi ki le fului ovi, pe ki le lino, pe ki se kilii manu. Ti e tutu loa le nea lena e le afi, talie e leaise toe feala ke sau le sekaseka. 53Kae kapau, e tio loa le tagata faisakilifisio, na leaise mafola le pulepule i le kofu, 54Ti e fakatotonu loa e ia ke fo le nea lena, ti ke toe tapono a ia i ni iki a aso e fitu. 55E toe tioi loa e le tagata faisakilifisio le nea lena i le oki o lona fo. Kapau na leaise fetogi le pulepule, ti na leaise mafola a ia, e kelekele loa le nea lena ; e tutu loa le nea lena, talie kua ulu loloto le masaki, ti kua kai e ia le alo mo le tua. 56Kae kapau e tio loa le tagata faisakilifisio kua liliu le pulepule o uliuli i le oki o lona fo, e tonu loa ke tuuti e ia le koga leia e pulepule o le kofu, pe ko le kilii manu, pe ko le kie, pe ko le kofu loto. 57Ti kapau e toe sa loa ki muli le pulepule i le kofu, pe i le kilii manu, pe i le kie, pe i le kofu loto, ti kua toe tupu le pulepule lena. E tonu loa ke tutu e ia le nea lena e pulepule. 58Ti kapau na fo loa se nea leia na kava ai se sekaseka, pe ko se kofu, pe ko se kie, pe ko se kofu loto, pe ko se nea leia na gaoi ki le kilii manu, ti kapau e puli loa le pulepule, e toe fo loa le nea lena ke mea, ti e mea loa a ia.
59Ko lena le lao ki sekaseka ala e sa loa i kofu ala na gaoi ki kilii ovi pe ki le lino, pe i ni kie, pe i ni kofu loto, pe i ni nea ala na gaoi ki kilii manu ; ko le lao lena e fakasa ia loa a nea ala e mea mo nea ala e kelekele.
Currently Selected:
Levitiko 13: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
