Levitiko 1
1
Failaulau
1Na kalagai loa e le Eteleno a Moisese, o masau kiate ia mei le loto o le falela tapu, o pati : 2Masau ki fanau a Iselaele, o pati kia latou : Kapau e fia fai e se tagata ia koutou sana moliga ki le Eteleno, e momoli loa e ia se manu lasi pe ko se manu ikiiki.
3Kapau ko lana moliga ko se manu lasi ki le failaulau, e momoli loa e ia se manu tagata lee mele ; e momoli loa e ia le manu i le uluaga o le falela tapu, i mua o le Eteleno, ke tali malie loa a ia e le Eteleno. 4E teki loa e ia lona lima ki le fa ulu o le failaulau tutu, leia e tali malie loa e le Eteleno ki le fakamolemole o ana agasala. 5E tamate loa e ia le pipi tagata muli i mua o le Eteleno ; ti e momoli loa e tagata faisakilifisio, vosa o Alone, le toto, o liligi loa a ia i le takatakai katoa o le aletale leia e tuu i le uluaga o le falela tapu. 6E too loa e ia a tootooga o le manu o le failaulau, ti e tafa loa e ia a ia o fakainati. 7E tafu loa e vosa o le tagata faisakilifisio ko Alone se afi i aluga o le aletale, ti na lotou eti loa ni fafie ki aluga o le afi. 8E teki loa e tagata faisakilifisio, vosa o Alone, a inati, mo le fa ulu, ti mo le gako loto ki aluga o le fafie leia kua eti i le afi i aluga o le aletale. 9E fufulu loa e ia ki se vai a tootooga mo vae ; ti e tutu loa e le tagata faisakilifisio a nea fuli i aluga o le aletale : ko se failaulau tutu a ia, ko se failaulau kua tutu e le afi, ti ko se nea manogi malie ki le Eteleno.
10Ti kapau ko lana moliga ko se manu ikiiki ki le failaulau, ko se akeno tagata muli pe ko se koti tagata muli, e momoli loa e ia se manu tagata lee mele. 11E tamate loa e ia le manu i le fetuu noleto o le aletale, i mua o le Eteleno ; ti e liligi loa e tagata faisakilifisio, vosa o Alone, le toto o le manu i le takatakai katoa o le aletale. 12E tafa loa e ia le manu o fakainati ; ti e teki loa e le tagata faisakilifisio a inati, o fakatasi mo le fa ulu mo le gako loto, ki aluga o le fafie leia kua eti i le afi i aluga o le aletale.
13E fufulu loa e ia ki se vai a vava ti mo vae ; ti e tutu loa e le tagata faisakilifisio a nea fuli i aluga o le aletale. Ko se failaulau tutu a ia, ko se failaulau a ia kua tutu e le afi, ti ko se nea manogi malie a ia ki le Eteleno.
14Ti kapau ko lana moliga ki le Eteleno ko se manu lele ki le failaulau, e momoli loa e ia ni kulukulu pe ko ni lupe koi muli. 15E momoli loa e le tagata faisakilifisio le manu lele i aluga o le aletale ; e motusi loa e ia le fa ulu ki lona matininia, ti e tutu loa e ia a ia i aluga o le aletale ; ti e fakasasali loa e ia le toto ki se fetuu o le aletale. 16Ti e too loa e ia le tagakai mo lana kaikaiga o ti ki le aletale, ki le fetuu esite, ki le ganea leia e laku ki ai a mugalafu. 17E saei loa e ia le manu lele i loto malie o kapakau, kae e leaise motusi oki loa e ia a ia ; ti e tutu loa e le tagata faisakilifisio le manu lele i aluga o le aletale, i aluga o le fafie leia kua eti i le afi. Ko se moliga a ia o le failaulau, ko se sakilifisio a ia kua tutu e le afi, ti ko se nea manogi malie a ia ki le Eteleno.
Currently Selected:
Levitiko 1: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
