Sosue 1
1
Fetogi o Moisese e Sosue
1I le oki o le mate o Moisese, tagata fakasausau a le Eteleno, na pati loa le Eteleno kia Sosue, vosa o Nune, tagata fakasausau a Moisese : 2Kua mate laku tagata fakasausau ko Moisese. I le aso nei, tuu ki aluga o fakalaka i le Solotane leinei, a koe mo le kakai katoa leinei, o ulu ki le fenua leia e kau soli ki fanau a Iselaele. 3Ko ganea fuli e tuu ki ai okoutou alofivae, e kau soli a ia kia koutou, ofaipe laku pati kia Moisese. 4E kamata loa lokotou fenua mei le toafa, i le saute, o kaku ki mauga o Lipane, i le noleto, ti mei le vaitafe lasi ko le Eufalate, i le esite, o ano i le fenua katoa o le kau Eti, o kaku ki le tai lasi ko le Metitelanea, i le uesite. 5E leaise tuu loa se tasi i ou mua, i le temi o lou mauli. E kau nofo loa mo koe, ofaipe laku nofo mo Moisese : E leaise kau tukunoa loa a koe, e leaise kau tiaki loa a koe. 6Ke ke fakamakeke mo ke loto toa, talie ko koe leia e ave ia loa le kakai leinei ki le fenua leia na kau fakapapau ki olatou tamana ke soli kia latou. 7Ko leia fua ke ke fakamakeke, mo ke loto toa lasi, o agatonu ki le lao katoa leia na kau tuku kia Moisese, laku tagata fakasausau : Ke aua na ke maliu ki le fetuu atamai pe ko le fetuu sema, o tupu ke ke manuia i ganea fuli e ke ano loa ki ai. 8Ke aua na mamao loa mei lou gutu le tosi leinei o le lao ; kae ke ke metitasio a ia i le ao mo le pouli, o tupu ke ke agatonu ki nea fuli e tuu i ai ; talie koia e ke manuia ai loa i ou ala, koia e ke poto ai loa.
9Pe na leaise kau tuku atu kiate koe le fakatotonu leinei : Ke ke fakamakeke mo ke loto toa ? Ke aua na ke i, ti ke aua na ke loto gaegae, talie ko le Eteleno, lou Atua, e nofo mo koe i ganea fuli ala e ke ano loa ki ai.
10Na tuku loa e Sosue le fakatotonu leinei ki le kau ofisa o le kakai : 11Ke kotou folii le nofolaga, ti ko leinei le nea ke kotou fakatotonu loa ki le kakai : Ke kotou teuteu loa ni nea kai, talie ka oki loa a aso e tolu, e kotou fakalaka loa i le Solotane leinei, o ano o too le fenua leia na soli atu kia koutou e le Eteleno, lokoutou Atua.
12Na pati loa Sosue ki le kau Lupeni, mo le kau Kate ti mo le vaelua o le kau Manase : 13Ke kotou manatui le nea leia na fakatotonu atu kia koutou e Moisese, tagata fakasausau a le Eteleno i le aso leia na pati ai : kua soli atu e le Eteleno, lokoutou Atua, kia koutou le malolo ; kua soli atu e ia kia koutou le fenua leinei. 14E nonofo loa okoutou fafine, mo okoutou fanau liliki ti mo okoutou kau manu i le fenua leinei na tuku atu kia koutou e Moisese i le fetuu leinei o le Solotane. Kae ko koutou fuli, ala ko tagata tau loto toa, ke kotou fakalaka loa mo akoutou masafu i mua okoutou fetaina, ti ke kotou tokoi loa kia latou, 15o kaku ki le temi e tuku ai loa e le Eteleno le malolo ki okoutou fetaina ofaipe koutou, ti ke lotou maua foki le fenua leia e soli loa kia latou e le Eteleno, lokoutou Atua. Kao oki loa a ia, ti o kotou liliu mai loa o nofo i le fenua leia na tuku atu kia koutou e Moisese, tagata fakasausau a le Eteleno, i le fetuu leinei o le Solotane, i le sopoaga o le laa.
16Na lotou tali loa kia Sosue, o pati : E motou fai loa a nea fuli ala na ke tuku mai kia matou, ti e motou ano loa ki ganea fuli ala e ke kakau loa matou ki ai. 17E motou fakalogo atu loa kiate koe i nea fuli, ofaipe lamatou fakalogo kia Moisese. Ko leia fua ke nofo mo koe le Eteleno, lou Atua, ofaipe lana nofo mo Moisese ! 18E tautea loa ki le mate a tagata fuli e fakatutuu loa ki lau lagiaki, ti e leaise fakalogo loa ki nea fuli e ke fakatotonu loa ki ai. Ko leia fua ke ke fakamakeke, ti mo ke loto toa !
Currently Selected:
Sosue 1: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
