Senesi 42

Fetaina o Sosefo i Esipito

1Na tio loa Sakopo na maua se fulumeto i Esipito, ti na pati loa a ia ki ona vosa : Kolea e kotou fetioaki ai ia koutou ? 2Ko leinei, e kau logo e maua se fulumeto i Esipito. Kotou ifo ki ai o totogi mai se fulumeto ke tou mauli ai, ti ke aua na tou mamate.

3Na ifo loa fetaina e tino agafulu o Sosefo ki Esipito, o totogi fulumeto. 4Na leaise tuku loa e Sakopo a Pesamino, taina o Sosefo, ke ano mo latou, talie na i Sakopo na soko loa se nea veli kiate ia. 5Ti na ano loa a vosa o Iselaele o totogi fulumeto mei Esipito, mo le kakai leia na ano o totogi fulumeto, talie na toe veli foki le oge i le fenua o Kanaane.

Asiasii e Sosefo o ona fetaina

6Na pule Sosefo i le fenua ; ko ia leia na fakatau ia le fulumeto ki le kakai katoa o le fenua. Ti na au loa fetaina o Sosefo o punou ki le kele i ona mua. 7Na tio loa Sosefo ki ona fetaina, ti na iloa loa e ia latou. Kae na fai loa a ia kia latou pe se nea kese, ti na masau makeke loa a ia kia latou, o pati : E kotou au meifea ? Na lotou tali loa : E motou au mei le fenua o Kanaane, o totogi nea kai. 8Na iloa loa e Sosefo ona fetaina, kae na leaise lotou iloa loa a ia.

9Na manatui loa e Sosefo a moe miti ala na fai e ia o uiga mo latou, ti na pati loa a ia kia latou : Ko ni tagata kaka koutou ; na kotou au ke tio ki ganea gagae o le fenua. 10Na lotou tali loa kia Sosefo : Leai, ei Aliki ! Na au au tagata fakasausau o totogi fulumeto ata. 11Ko vosa fuli matou o le tagata e tasi ; E motou fakasa le maoki, e leaise motou kaka. 12Na pati loa Sosefo kia latou : E leaise kau tui. Na kotou au o tio ki ganea gagae o le fenua. 13Na lotou tali loa : Ko au tagata fakasausau matou, ko ni fetaina matou na tino agafulu tupu lua, ko vosa fuli matou o le tagata e tasi i le fenua o Kanaane : ti e nofo leia e muli i le aso nei mo lomatou tamana, ti kua puli le tasi. 14Na pati loa Sosefo kia latou : E kau pati atu e maoki ko ni tagata kaka koutou. 15E kau asiasii loa koutou i le nea leinei. I le igoa o Falaone, e kau fakapapau atu kia koutou e leaise kotou mavae loa i le fenua leinei i mua o le aumai o lokoutou taina muli ki leinei. 16Kotou kakau se tasi ia koutou ke ano o afa mai lokoutou taina ; kae ko koutou ake ala, e kotou nonofo loa i le fale pilisoni. E asiasii ai loa akoutou masau, ti e kau iloa loa pe nofo le maoki ia koutou. Ti kapau e leai, i le mauli o Falaone, ko ni tagata kaka koutou. 17Ti na tuku loa latou e Sosefo ki le fale pilisoni i aso e tolu.

18I le tolu o aso, na pati loa Sosefo kia latou : Kotou fai le nea leinei, ti e kotou mauli loa. E kau i ki le Atua ! 19Kapau e kotou maoki, ti ke nofo loa se tasi ia koutou i le fale pilisoni ; kae ko koutou ake ala, ke kotou toe liliu loa o ave se fulumeto ke fagai ai okoutou famili, 20Ti ke kotou aumai loa ki leinei lokoutou taina muli, ke oono ai akoutou masau, ti ke aua na kotou mamate loa. Ti na lotou fai loa ki ai.

Fakapilisoni o Simeone

21Na lotou fepatiaki loa ia latou : Io, kua soko le mamae leinei kia tatou o tupu ko latatou agasala leia na tou fai ki lotatou taina : Talie na tou tio ki le mamae o lona loto, i lana tagi mai kia tatou ke tou alofa ake kiate ia, kae na leaise tou tokagai a ia ! 22Na masau loa Lupeni kia latou, o pati : Pe na leaise kau pati atu kia koutou ke aua na kotou fai se nea veli ki le toe ? Kae na leaise kotou fakalogo mai kiate au. Ti ko leinei, kua tou totogi loa lona toto. 23Na leaise lotou iloa na logo Sosefo ki alatou masau, talie na fakaaoga e Sosefo se tagata fakasokopati kia latou.

24Na fakamamao loa Sosefo ia latou o tagi. Ti na toe liliu mai loa a ia o masau kia latou ; ti na too loa e ia Simeone, o fakatotonu ke sai a ia ki se tini i olatou mua.

25Ti na fakatotonu loa e Sosefo ke fakaapele ki le fulumeto alatou taga, ti ke toe tuku alatou paaga ki loto o alatou taga, ti ke toe soli kia latou ni nea kai ki le ala. Ti na fai loa ki ai. 26Na lotou teki loa alatou tagata fulumeto ki alatou asino, ti na lotou ano loa.

27Na fakamavaa loa e se tasi o latou lana taga, ke fagai lana asino, i le ganea leia na tonu ke lotou nonofo ai i le pouli, ti na tio loa a ia ki le paaga na tuku i le gutu o lana taga. 28Na pati loa a ia ki ona fetaina : Kua toe fakaliliu mai kiate au laku paaga ! ko leinei a ia i laku taga. Na lotou i lasi ai, ti na lotou fepatiaki loa ia latou, o lulu : Kolea le nea leia kua fai loa e le Atua kia tatou ?

29Na lotou toe liliu loa ki lolatou tamana ko Sakopo, i le fenua o Kanaane, ti na lotou fakamatala loa kiate ia a nea fuli ala na soko kia latou. Na lotou pati loa : 30Ko le tagata leia e kovana i le fenua na masau makeke mai kia matou, ti na pati a ia ko ni tagata kaka matou. 31Na motou pati kiate ia : E motou fakasa le maoki, e leaise motou kaka. 32Ko matou ko ni fetaina e tino agafulu tupu lua, ko vosa fuli matou o le tagata e tasi, lomatou tamana : Kua puli le tasi, ti e nofo le muli i le aso nei mo lomatou tamana i le fenua o Kanaane. 33Ti ko le tagata, leia ko le aliki o le fenua, na pati mai loa kia matou : Ko leinei le nea leia e kau iloa ai loa pe kotou maoki. Kotou tuku se tasi o koutou ke nofo mo au, ti kotou too loa se nea ke fagai ai okoutou famili, ti kotou ano loa, ti kotou aumai loa kiate au lokoutou taina muli. 34E kau iloa loa i ai e leaise ko ni tagata kaka koutou, kae e kotou fakasa le maoki ; e kau tuku atu loa lokoutou taina, ti e mafai loa ke kotou feanoaki faitalisa i le fenua.

35Na lotou liligi loa alatou taga, ti na lotou maua loa alatou taga paaga i loto. Na lotou tio fuli loa ki alatou taga paaga, ti na toe tio foki ki ai lolatou tamana ko Sakopo, ti na lotou i fuli loa.

36Na pati loa lolatou tamana ko Sakopo kia latou : Kua kau nofo i le aso nei, o sala mo aku fanau e toka lua, o tupu ko koutou ! Kua puli Sosefo, ti kua puli mo Simeone, ti e kotou loto ke toe too mo Pesamino ! Ko au leia e vilo ki ai a nea fuli ana. 37Na pati loa Lupeni ki lona tamana : E ke tamate loa oku vosa e lua mo kapau e leaise kau toe liuaki mai kiate koe lou vosa ko Pesamino ; tuku mai a ia kiate au, ti e kau toe liuaki mai loa a ia kiate koe. 38Na pati loa Sakopo : E leaise ifo loa loku vosa ki Esipito mo koutou ; talie kua mate lona taina, ti e toka tasi a ia ; kapau e soko kiate ia se malaia i le fanoga leia ka kotou fai, e kotou fakaifo loa loku ulu sina i le mamae ki le nofoaga o le kau mate.

Currently Selected:

Senesi 42: FB2000

Highlight

Copy