Esekiele 45
45
Le kele o le Eteleno
1I le aso leia e kotou vae ai loa le fenua i tofiga, e kotou vaei loa se kele i le fenua ofaipe se moliga tapu ki le Eteleno : ko lona loa ko kilometa e kau agafulu tupu lua vaelua ti ko lona laulasi ko kilometa e kau agafulu ; e maokioki katoa loa a ia. 2I le kele lena e kotou too ai loa ki le fale tapu se ga kele tapa fa tatau leia e kilometa tasi vaelua lona fetuu. Ti e takatakai loa le ga kele lena e se tasi ake ga kele lauatea, leia e meta kau lua tupu lima lona laulasi. 3I le kele lena e kilometa kau agafulu tupu lua vaelua lona loa ti e kilometa kau agafulu lona laulasi, e ke fuafua loa i ai se tuuaga ki le sagatualio, le potu maokioki. 4E maokioki loa le koga kele lena o le fenua : ti e maua loa a ia e le kau faisakilifisio ala e fai ia le tausi o le fale tapu, ala e fakafeofi ki le Eteleno o tausi kiate ia ; e tuu loa olatou fale i le ganea lena, ti e liliu loa a ia ko le kele maokioki ki le sagatualio.
5E toe fuafua loa se tasi ake koga kele leia e kilometa kau agafulu tupu lua vaelua lona loa ti e kilometa lima lona laulasi, ke nofo ai le kau levita, ala e tausi ki le fale tapu mo ona kogafale e kau lua. 6I le fakaloaloa o le koga kele lena kua tuku ki le Aliki, e toe fuafua loa se tasi ake koga kele leia e kilometa kau agafulu tupu lua vaelua lona loa ti e kilometa lua vaelua lona laulasi, ke laga ai se kolo leia e feala ke nofo ai loa a tagata taki toka tasi o Iselaele.
7Ki le tama aliki e tuku loa se kele i tafa o le koga kele leia kua tuku ki le Eteleno mo le tuuaga o le kolo. E natu loa le koga kele lena i le potu uesite o kaku ki le tai Metitelanea, ti mo le potu esite o kaku ki le koiga o Iselaele i le potu esite. E tatau loa lona loa mo le loa o le kele tofiga o faasiga taki tasi. 8Koia e maua loa e tama aliki lolatou kele totonu i Iselaele. E leaise lotou toe fakamakeke loa le kakai o le Aliki, ti e lotou tuku loa le toe o le fenua ki faasiga o Iselaele.
Lao o failaulau
9E folafola le Aliki, le Eteleno, o pati : Kua feauga, tama aliki o Iselaele ! Ke kotou tuku la le agamakeke mo le kaia, kae ke kotou fai la le nea leia e sako mo le maoki, ke kotou tuku la le kaia o koloa o loku kakai, e pati le Aliki, le Eteleno.
10Ke kotou maua ni fua totonu, mo se efa totonu, mo se pate totonu. 11E tatau loa le efa mo le pate ; e maua loa e le pate le vaega kau agafulu o le omele ; ti e maua loa e le efa le vaega kau agafulu o le omele : e fai loa le fuafua o le efa mo le pate o mulimuli ki le omele. 12E kau lua fa kela loa le fa sikele e tasi. Ti e kau ono fa sikele loa le fa mine e tasi.
13Ko leinei le moliga leia e tonu ke kotou fai loa : E kotou soli loa le vaega ono o le efa i se omele falina e tasi, mo le vaega ono o le efa i le omele olese e tasi. 14Ko le lolo leia e tonu loa ke kotou soli : i le pate e tasi e kotou soli loa le vaega kau agafulu o se pate i se kole e tasi, leia e tatau mo se omele leia e kau agafulu pate, talie e tatau le omele e tasi mo pate e kau agafulu. 15E kotou soli loa se ovi e tasi i se kau manu o ni ovi e kau lelau lua, i faisaga sesega malie o Iselaele, ki le moliga, mo le failaulau mo le sakilifisio fakafetai, o tupu ke momoli ofaipe se vikitima fakamolemole o le agasala, e pati le Aliki, le Eteleno. 16E tonu ke fai le moliga lena e le kakai katoa o le fenua ki le tama aliki o Iselaele.
17E tokaga loa le tama aliki ki failaulau, mo moliga nea kai, mo moliga vino, mo aso lalasi o masina foou, mo sapato, mo aso lalasi fuli o le fale o Iselaele. E momoli loa e ia le sakilifisio fakamolemole o agasala, mo le moliga nea kai, mo le failaulau, mo sakilifisio fakafetai, mo sakilifisio ki le fakamolemole o agasala o le fale o Iselaele.
18E folafola le Aliki, le Eteleno, o pati : I le uluaki aso o le uluaki masina, e ke too loa se pipi tagata muli lee mele, ti e ke fai loa le fakamea o le fale tapu. 19E too loa e le tagata faisakilifisio le toto o le vikitima ki le fakamolemole o le agasala, ti e takai loa e ia ki ai a pou o le fale tapu, mo tifi e fa o le laupapa o le aletale, mo pou o le matapa o le malae loto. 20E ke toe fai loa le nea lena i le aso fitu o le masina, kia latou ala e faisala pe loto noa ; e kotou fakamea loa i ai le fale tapu.
21I le aso kau agafulu tupu fa o le uluaki masina, e kotou fai loa le Pasikate. E fai loa a ia i ni aso e fitu ; ti e kai loa ni pane sala fakatupu. 22E momoli loa e le tama aliki i le aso lena, kiate ia mo le kakai katoa o le fenua, se pipi tagata muli i se sakilifisio ki le fakamolemole o agasala. 23I aso e fitu o le Pasikate, e momoli loa e ia se failaulau ki le Eteleno ko ni pipi tagata e fitu, mo ni akeno tagata lee mele e fitu, i aso taki tasi o aso ana e fitu, mo se koti tagata ki le sakilifisio fakamolemole o agasala, i aso taki tasi. 24E teki loa e ia ki ai se moliga nea kai ko se efa e tasi ki le pipi tagata e tasi, mo se efa e tasi ki se ovi tagata e tasi, mo se ini lolo e tasi ki se efa e tasi.
25I le aso kau agafulu tupu lima o le masina fitu, i le aso lasi, e momoli loa e ia i le lolotoga o aso e fitu, a sakilifisio ana ki le fakamolemole, mo failaulau, mo le moliga lolo.
Currently Selected:
Esekiele 45: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
