Ekesote 4
4
Ko i o Moisese
1Ti na tali loa Moisese : Ko leinei, e leaise lotou tui loa kiate au, ti e leaise lotou fakalogo loa ki loku leo. Kae e lotou pati loa : Na leaise sa le Eteleno kiate koe.
2Ti na pati loa le Eteleno kiate ia : Kolea i lou lima ? Ti na tali loa a ia : Ko se tokotoko. 3Ti na pati loa le Eteleno : Ti le tokotoko ki le kele. Ti na ti loa a ia e Moisese ki le kele, ti na liliu loa le tokotoko ko se gata. Ti na sola loa Moisese i ona mua. 4Ti na pati loa le Eteleno kia Moisese : Falo lou lima, o too a ia i lona siku. Ti na falo loa e ia lona lima o too a ia ; ti na toe liliu loa le gata ko se tokotoko i lona lima. 5Na pati loa le Eteleno : Ko lena le nea leia e tonu ke ke fai, ke lotou tui loa na sa kiate koe le Eteleno, le Atua o olatou tamana, le Atua o Apalaamo, le Atua o Isaake, le Atua o Sakopo.
6Na toe pati loa le Eteleno kiate ia : Teki lou lima ki lou fatafata. Ti na teki loa e ia lona lima ki lona fatafata ; ti na too ake loa e ia lona lima, ti ko leinei, kua kilia katoa lona lima, ti kua tea a ia ofaipe le nive. 7Na pati loa le Eteleno : Toe teki lou lima ki lou fatafata. Ti na toe teki loa e ia lona lima ki lona fatafata ; ti na too ake loa e ia lona lima mei lona fatafata, ti ko leinei, kua toe liliu a ia o tatau mo lona kanofi. 8Ti na pati loa le Eteleno : Kapau e leaise lotou tui loa kiate koe, ti kapau e leaise lotou fakalogo loa ki le leo o le uluaki fakamailoga, kae e lotou tui loa ki le leo o le fakamailoga fakamuli. 9Ti kapau e leaise lotou tui loa ki fakamailoga ana e lua, ti kapau e leaise lotou fakalogo ki lou leo, e ke too loa se vai mei le vaitafe, ti ke liligi loa a ia ki le kele, ti e liliu loa le vai lena ko se toto i le kele.
10Na pati loa Moisese ki le Eteleno : Ei loku Aliki, e leaise ko se tagata au leia e masau faigaofie, ti e leaise ko se nea fua mei nanafi, pe ko leia atu a aso, pe ko le aso leia na ke kamata masau ai ki lau tagata fakasausau ; talie e valea loku gutu mo loku alelo. 11Na pati loa le Eteleno kiate ia : Ko ai na fakatupu ia le gutu o le tagata ? Ti ko ai e fakaliliu ia le tagata o gutu mate, mo tulituli, mo tio pe kivi ? Pe leaise ko au leia ko le Eteleno ? 12Ke ke ano, e kau nofo loa mo lou gutu, ti e kau ako loa kiate koe le nea leia e tonu ke ke fakasa. 13Na pati loa Moisese : Ei loku Aliki, e kau kole atu kiate koe ke ke kakau se tasi ake leia e ke loto loa ki ai. 14Ti na ita loa le Eteleno kia Moisese, o pati : Pe leaise ko lou taina Alone, le tagata Levi ? E kau iloa e masau faigaofie a ia. Ti ko leinei a ia totonu e au kiate koe ; ti ka tio loa a ia kiate koe, e fiafia loa a ia i lona loto. 15E ke masau loa kiate ia, ti e ke tuku loa au masau ki lona gutu, ti ko au e kau nofo loa mo lou gutu ti mo lona gutu, ti e kau ako loa kia koulua le nea leia e tonu ke kolua fai. 16E fakasoko loa e ia au masau ki le kakai ; ti e liliu loa a ia kiate koe ko lou gutu, ti e ke liliu loa kiate ia ko le fakafofoga o le Atua. 17Too i lou lima le tokotoko lena, leia e ke fai loa ki ai a fakamailoga.
Toe liliu o Moisese ki Esipito
18Na ano loa Moisese ; ti na toe liliu loa a ia kia Setelo, lona tamana, ti na pati loa a ia kiate ia : E kau kole atu kiate koe, ke ke tuku mai au ke kau ano o fakafelavei ki oku fetaina ala e nonofo i Esipito, o tio pe koi lotou mauuli. Na pati loa Setelo kia Moisese : Ano i le tokamalie.
19Na pati loa le Eteleno kia Moisese, i Matiane : Ano, o toe liliu ki Esipito, talie kua mate latou fuli ala na afa ki lou mauli. 20Na too loa e Moisese lona avaga mo ona vosa, o fakaeke latou ki ni asino, ti na toe liliu loa a ia ki le fenua o Esipito. Na too loa e ia i lona lima le tokotoko o le Atua. 21Na pati loa le Eteleno kia Moisese : E ke toe liliu loa ki Esipito, tio, kua kau tuku a nea fakamanamana kesekese ki lou lima : e ke fai loa latou i mua o Falaone. Ti ko au, e kau fakafefeka ia loa lona loto, ti e leaise tuku loa e ia le kakai ke ano. 22E ke pati loa kia Falaone : E masau le Eteleno, o pati : Ko loku vosa Iselaele, loku uluaki. 23E kau pati atu kiate koe : Tuku loku vosa ke ano, o tupu ke tausi a ia kiate au ; kapau e ke fakafiti ke tuku a ia ke ano, ti e kau tamate loa lou vosa uluaki.
24I le lolotoga o lana fanoga, i se ganea leia na moe ai loa Moisese i le pouli, na osoi loa a ia e le Eteleno, ti na loto loa a ia ke tamate Moisese. 25Kae na too loa e Sefola se fa fatu matakakai, o tuuti ai loa le mui kilikili o lona vosa, o ti a ia ki vae o Moisese, o pati : Ko se avaga a koe o le toto kiate au ! 26Ti na tuku loa e le Eteleno a Moisese. Ti na pati loa le fafine : Avaga o le toto ! o tupu ko le silikosisio.
27Na pati loa le Eteleno kia Alone : Ano i le toafa ki mua o Moisese. Ti na ano loa Alone ; ti na felavei loa a ia mo Moisese i le mauga o le Atua ; na sogi loa a ia kia Moisese. 28Ti na fakasa loa e Moisese kia Alone a folafola fuli a le Eteleno, leia na kakau ia a ia, mo fakamailoga fuli ala na fakatotonu e ia ke fai. 29Na soko atu loa le fanoga o Moisese mo Alone, ti na la fakatasii loa le kau matua fuli o fanau a Iselaele. 30Ti na fakasa loa e Alone a folafola fuli ala na tuku e le Eteleno kia Moisese, ti na fakasoko loa e ia a fakamailoga fuli i mua o le kakai. 31Ti na tui loa le kakai. Na lotou iloa loa kua asiasi le Eteleno ki fanau a Iselaele, ti kua tio a ia ki lolatou mamae ; ti na lotou tulolo loa ki le kele, o fakafetai.
Currently Selected:
Ekesote 4: FB2000
Highlight
Share
Compare
Copy
Want to have your highlights saved across all your devices? Sign up or sign in
© Société Biblique de Genève, 2000-2020
