Ekesote 33
33
Fakamolemole a le Atua
1Na pati loa le Eteleno kia Moisese : Ano, mavae i leinei, a koe mo le kakai leia na ke fakamavae mei le fenua o Esipito ; pale ki le fenua leia na kau fakapapau ke soli kia Apalaamo, mo Isaake, mo Sakopo, o pati : E kau soli loa le fenua ki lou sakoga. 2E kau kakau loa i ou mua se aselo, ti e kau kapu loa le kau Kanaane, mo le kau Amole, mo le kau Eti, mo le kau Felesi, mo le kau Evi, mo le kau Sepusi. 3Pale ki le fenua lena leia e tafe ai le sua manu mo le meli. Kae e leaise kau pale loa i loto malie o ou, talie ke aua na kau fakapuli ia loa a koe i le ala, talie ko se kakai ua fefeka a koe.
4I le logo loa a le kakai ki masau fakaii ana, na lotou fetagisi loa ; ti na leaise tui loa e se tasi ona nea fakateuteu. 5Ti na pati loa le Eteleno kia Moisese : Pati ki fanau a Iselaele : Ko se kakai ua fefeka koutou ; kapau e kau ano i se ga temi ikiiki fua i loto malie o koutou, e kau fakapuli loa koutou. Koia ke kotou tatala ai okoutou nea fakateuteu, ti e kau tio loa pe kolea le nea leia e kau fai loa kia koutou. 6Na tatala loa e fanau a Iselaele olatou nea fakateuteu, ti na lotou fakamamao loa mei le mauga o Olepe.
Le falela o le felavei i tua o le nofolaga
7Na siki loa e Moisese le falela, o fakatuu a ia i le tua nofolaga, o mamao i le nofolaga. Na fakaigoa loa e ia a ia ko le falela o le felavei ; ti ko latou fuli ala na fia felavei mo le Eteleno na ano loa ki le falela o le felavei, i tua o le nofolaga. 8Ka ano Moisese ki le falela, na tutuu loa le kakai katoa ki aluga ; na tasi tuu le tagata i mua o lona falela o tio kia Moisese, o kaku ki lana ulu ki le falela. 9Ka ulu Moisese ki le falela, na ifo loa le pou ao, o tuu i le uluaga o le falela, ti na masau loa le Eteleno mo Moisese. 10Na tio le kakai katoa ki le pou ao leia na tuu i le matapa o le falela, ti na tutuu le kakai katoa ki aluga, o su i mua o olatou falela. 11Na masau loa le Eteleno mo Moisese o feagaaki a mata ki mata, ofaipe se tagata leia na masau mo lona kaukau nea. Ti oki, na toe liliu loa Moisese ki le nofolaga ; kae ko lana tagata fakasausau tupulaga ko Sosue, vosa o Nune, na leaise mavae loa a ia mei loto o le falela.
Tio o Moisese ki le kololia o le Atua
12Na pati loa Moisese ki le Eteleno : Ko leinei, e ke pati mai kiate au : Taki le kakai leinei ! Ti e leaise ke fakasa mai kiate au pe ko ai leia e ke kakau loa mo au. Kae kua ke pati : E kau iloa a koe i lou igoa totonu, ti kua ke alofa kiate au. 13I le temi nei, kapau kua kau maua lou alofa, fakasa mai kiate au ou ala ; ti e kau iloa maoki loa a koe, ti e kau toe maua loa lou alofa. Ke aua na galo kiate koe ko le kakai leinei ko lou kakai totonu. 14Na tali loa le Eteleno : E kau ano loa mo koe, ti e kau soli loa kiate koe se maloloaga. 15Na tali loa Moisese : Kapau e leaise ke saele a koe totonu mo matou, ti ke aua na ke fakamavae matou i leinei. 16Kapau e leaise ke saele a koe totonu mo matou, pe motou iloa feaki loa kua ke alofa kiate au mo lou kakai ? Pe leaise ko le temi loa leia e ke saele ai loa a koe totonu mo matou, ti e ke fakakese ai loa au mo lou kakai i kakai fuli i aluga o le malama nei ? 17Na pati loa le Eteleno kia Moisese : E kau fai loa le nea leia e ke kole mai ki ai, talie kua kau alofa kiate koe, ti e kau iloa a koe i lou igoa. 18Na pati loa Moisese : Fakatio au ki lou kololia ! 19Na tali loa le Eteleno : E kau saele loa i ou mua ti e kau fakasa loa kiate koe loku agamalie katoa, ti e kau kalagai loa i ou mua le suafa o le Eteleno ; e kau soli loku alofa ki leia e kau alofa ki ai, ti e kau manava alofa ki leia e kau manava alofa ki ai. 20Na pati loa le Eteleno : E leaise feala ke ke tio ki oku mata, talie e leaise feala ke tio le tagata kiate au ti mauli. 21Na pati loa le Eteleno : Ko leinei se ganea i oku tafa : e ke tuu loa i aluga o le utu. 22Ka fakalaka loa loku kololia, e kau tuku loa a koe ki se mafaa o le utu, ti e kau uufi loa a koe ki loku lima o kaku ki laku fakalaka. 23Ti ka kau too loa loku lima, e ke tio mai loa kiate au mei muli ; kae e leaise feala loa ke ke tio ki oku mata.
Currently Selected:
Ekesote 33: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
